സ്ത്രീകള് രാത്രിയില് ജോലി ചെയ്യുന്നതിന് വിലക്ക് ഏര്പ്പെടുത്തി കുവൈറ്റ്
രാത്രിയില് സ്ത്രീകള് ജോലി ചെയ്യുന്നതിന് വിലക്ക് ഏര്പ്പെടുത്തി കുവൈറ്റ് .15 മേഖലകളിലാണ് വിലക്കുള്ളത്. പെയ്ന്റിങ്, ആസ്ബസ്റ്റോസ് നിര്മാണം, ക്ലോറിന്, സോഡ നിര്മാണം, ഫാക്ടറികള്, കീടനാശിനി വില്പന നിര്മാണ കേന്ദ്രങ്ങള്, മാംസ വില്പന സ്ഥാപനങ്ങള്, വിവിധയിനം എന്ജിനുകളുടെ നിര്മാണ കേന്ദ്രങ്ങള്, ഇലക്ട്രിക് ബാറ്ററി നിര്മാണം അറ്റകുറ്റപ്പണി, കെട്ടിട നിര്മാണം തുടങ്ങിയ വലിയ അധ്വാനം ആവശ്യമുള്ള തൊഴില് മേഖലകളിലാണ് മാന്പവര് പബ്ലിക് അതോറിറ്റി രാത്രിയില് സ്ത്രീകള്ക്ക് ജോലി വിലക്ക് ഏര്പ്പെടുത്തിയത്.
ഹോട്ടലുകള്, ഫാര്മസികള്, മെഡിക്കല് ലാബ്, ബാങ്കുകള്, ഉല്ലാസ കേന്ദ്രങ്ങള്, അഭിഭാഷക ഓഫിസുകള്, സഹകരണ സംഘങ്ങള്, വിദ്യാഭ്യാസ സ്ഥാപനങ്ങള്, ബ്യൂട്ടി പാര്ലറുകള്, ടൂറിസ്റ്റ് കേന്ദ്രങ്ങള്, തിയറ്ററുകള്, ടി.വി, റേഡിയോ, വിമാനത്താവളത്തിലെയും തുറമുഖത്തെയും കച്ചവട സ്ഥാപനങ്ങള്, എണ്ണമേഖല, സര്ക്കാറുമായി കരാറുള്ള കമ്പനികള് തുടങ്ങിയ മേഖലകളില് റമദാനില് ഒഴികെ രാത്രി 12 മണി വരെയാണ് സ്ത്രീകള്ക്ക് ജോലി ചെയ്യാന് അനുമതിയുള്ളത്.
ലേഡീസ് ഹെല്ത്ത് സെന്ററുകള്, ലേഡീസ് ബ്യുട്ടിപാര്ലറുകള്, സ്ത്രീകളുടെ വസ്ത്ര വ്യാപാര കേന്ദ്രങ്ങള് എന്നിവിടങ്ങളില് പുരുഷന്മാര്ക്ക് ജോലി വിലക്ക് ഏര്പ്പെടുത്തിയതായും മാന്പവര് അതോറിറ്റി അറിയിച്ചു. വിവാഹ മോചിതയായ സ്ത്രീകള്ക്ക് അവരുടെ 'ഇദ്ദ' കാലമായ നാല് മാസവും പത്ത് ദിവസം ശമ്പളത്തോടെ അവധി നല്കേണ്ടതാണ്.
സ്ത്രീകള്ക്ക് കുട്ടികളെ മുലയൂട്ടാന് ദിവസവും രണ്ട് മണിക്കൂര് സമയം അനുവദിക്കണം. കുട്ടികള്ക്ക് രണ്ടു വയസ്സാകുന്നതു വരെയാണ് ഈ ഇളവ് ലഭിക്കുക. തൊഴിലുടമയുടെ കടമയാണ് രാത്രിയില് ജോലി ചെയ്യുന്ന സ്ത്രീകള്ക്ക് യാത്രാ സൗകര്യവും സുരക്ഷയും നല്കുക എന്നത് .
https://www.facebook.com/Malayalivartha
