അബൂദബിയില്‍  രണ്ട് കാറുകളും ബസും ഉള്‍പ്പെട്ട അപകടത്തില്‍ മൂന്നുപേര്‍ മരിക്കുകയും 44 പേര്‍ക്ക് പരിക്കേല്‍ക്കുകയും ചെയ്തു. ഷവാമെഖ് പാലത്തിലേക്ക് വരുന്ന റോഡില്‍ തിങ്കളാഴ്ചയാണ് അപകടം. തൊഴിലാളികളെ കൊണ്ടുപോവുകയായിരുന്ന ബസാണ് അപകടത്തില്‍ പെട്ടത്. മരിച്ചവരും പരിക്കേറ്റവരുമെല്ലാം ബസിലുള്ളവരാണ്.
അപകടത്തെ തുടര്‍ന്ന് റോഡരികിലുള്ള സൂചനബോര്‍ഡിന്റെ ലോഹക്കാല് ബസിന് മുകളില്‍ വീണാണ് മരണം സംഭവിച്ചത്. ഒരു ലോറി പെട്ടെന്ന് മുന്നില്‍ പ്രത്യക്ഷപ്പെട്ടപ്പോള്‍ താന്‍ വാഹനം വെട്ടിക്കുകയായിരുന്നുവെന്നാണ് ബസ് ഡ്രൈവര്‍ പൊലീസിനോട് പറഞ്ഞത്. തുടര്‍ന്ന് ബസ് നിസാന്‍ പട്രോള്‍ കാറുമായി കൂട്ടിയിടിച്ചു. കാര്‍ ഡ്രൈവര്‍  കൂട്ടിയിടി ഒഴിവാക്കാന്‍ ശ്രമിക്കവേ വാഹനം മിനിവാനില്‍ പോയി ഇടിക്കുകയായിരുന്നു.

ബസ് നാല് തവണ മറിഞ്ഞതിനാല്‍ ഡ്രൈവര്‍ അമിത വേഗതയില്‍ വാഹനം ഓടിക്കുകയായിരുന്നുവെന്ന നിഗമനത്തിലാണ് പൊലീസ്. നാലാമത്തെ മറിച്ചിലില്‍ ബസ് ടയറില്‍ നേരെ നില്‍ക്കുകയായിരുന്നു. ബസ് കാറില്‍നിന്ന് നിശ്ചിത അകലവും പാലിച്ചിരുന്നില്ലെന്ന് പൊലീസ് പറഞ്ഞു.

ബസ് െ്രെഡവറും ലോറി ഡ്രൈവറും മൊബൈല്‍ ഫോണ്‍ ഉപയോഗിച്ചതാണ് അപകടത്തിന്റെ പ്രധാന കാരണമെന്ന് സംശയിക്കുന്നു. ഇക്കാര്യം സ്ഥിരീകരിക്കുന്നതിനുള്ള അന്വേഷണം നടത്തിവരികയാണെന്ന് അബൂദബി ട്രാഫിക് പൊലീസിലെ എക്‌സ്റ്റീരിയര്‍ റോഡ്‌സ് മേധാവി ബ്രിഗേഡിയര്‍ ജനറല്‍ സാലിം ആല്‍ ദാഹിരി പറഞ്ഞു.

കാര്‍ െ്രെഡവറായ ഇമാറാത്തിയും മിനി വാന്‍ ഡ്രൈവറായ ഏഷ്യക്കാരനും അപകടത്തിന്റെ ഇരകള്‍ മാത്രമായതിനാല്‍ അവര്‍ക്കെതിരെ കേസെടുത്തിട്ടില്ല. അപകടം സംബന്ധിച്ച് രാവിലെ 7.30നാണ് പൊലീസിന് വിവരം ലഭിച്ചത്.
പൊലീസും ആംബുലന്‍സുകളും ആശുപത്രി ജീവനക്കാരും സംഭവസ്ഥലത്ത് കുതിച്ചെത്തി. പരിക്കേറ്റവരെ റഹ്ബയിലെയും മഫ്‌റഖിലെയും ആശുപത്രികളിലേക്ക് മാറ്റി.