പ്രകാശ വിസ്മയം തീര്‍ത്ത് ഷാര്‍ജ ദീപോത്സവത്തിന് തുടക്കമായി
അഞ്ചാമത് ഷാര്‍ജ ദീപോത്സവത്തിന് തുടക്കമായി. ഖസബയിലെ വര്‍ണ മനോഹരമായ ചടങ്ങില്‍ യു.എ.ഇ സുപ്രീം കൗണ്‍സില്‍ അംഗവും ഷാര്‍ജ ഭരണാധികാരിയുമായ ഡോ. ശൈഖ് സുല്‍ത്താന്‍ ബിന്‍ മുഹമദ് ആല്‍ ഖാസിമിയാണ് ഉദ്ഘാടനം നിര്‍വഹിച്ചത്. അറബ് ടൂറിസം ഓര്‍ഗനൈസേഷന്‍ ഷാര്‍ജയെ അറബ് വിനോദസഞ്ചാര തലസ്ഥാനം 2015 ആയി തിരഞ്ഞെടുത്തതിന്റെ പ്രഖ്യാപനവും ചടങ്ങില്‍ നടന്നു.
ഷാര്‍ജയുടെ സാംസ്‌കാരിക ചൈതന്യം നെഞ്ചേറ്റുന്ന 14 കേന്ദ്രങ്ങളിലായി നടക്കുന്ന വര്‍ണോത്സവം കാണാന്‍ വന്‍ജനക്കൂട്ടമാണ് എത്തിയത്. ഉദ്ഘാടനത്തോടനുബന്ധിച്ച് ഖസബ കായലില്‍ പ്രത്യേക ആഘോഷ പരിപ്പാടികള്‍ സംഘടിപ്പിച്ചിരുന്നു. സംഗീതവും വര്‍ണവും ലയിച്ച് ചേരുന്ന ഒന്‍പത് വര്‍ണ സുരഭില രാവുകള്‍ ഇനി ഷാര്‍ജക്ക് സ്വന്തം. വര്‍ണത്തെ സംഗീത്തതില്‍ ലയിപ്പിച്ച് സാംസ്‌കാരികമായി അടയാളപ്പെടുത്തുന്ന കരവിരുതാണ് ഈ ഒമ്പത് ദിവസങ്ങളുടെ പ്രത്യേകത. അത്യാധുനിക സാങ്കേതിക വിദ്യ ഉപയോഗിച്ച് പൂര്‍വ കാലത്തെയും വര്‍ത്തമാന കാലത്തെയും മനോഹര കാഴ്ച്ചകള്‍ വെളിച്ചം ഉപയോഗിച്ച് ചുവരുകളില്‍ അടയാളപ്പെടുത്തുന്ന രീതി മനോഹരമാണ്.
വൈകീട്ട് ആറ് മുതലാണ് വെളിച്ചം വെഞ്ചാമരം വീശി ഉണരുന്നത്. മണിക്കൂര്‍ ഇടവിട്ട് നടക്കുന്ന വെളിച്ചത്തിന്റെ കുടമാറ്റത്തിന് 10 മിനുട്ട് മുതല്‍ അര മണിക്കൂര്‍ വരെ ദൈര്‍ഘ്യമുണ്ട്. അല്‍ ഖസബ, അല്‍മജാസ് വാട്ടര്‍ ഫ്രണ്ട്, കിങ് ഫൈസല്‍ പള്ളി, കുവൈത്ത് ചത്വരം, കള്‍ചറല്‍ പാലസ് സ്‌ക്വയര്‍, സെന്‍ട്രല്‍ സൂഖ്, ഡോ. സുല്‍ത്താന്‍ അല്‍ഖാസിമി സെന്റര്‍ ഓഫ് ഗള്‍ഫ് സ്റ്റഡീസ്, അല്‍ നൂര്‍ മസ്ജിദ്, ഷാര്‍ജ യൂണിവേഴ്‌സിറ്റി കല്‍ബ, മസ്ജിദ് അമ്മാര്‍ ബിന്‍ യാസര്‍ ദൈദ്, ഷാര്‍ജ യൂണിവേഴ്‌സിറ്റി ഖോര്‍ഫക്കാന്‍, ഖോര്‍ഫക്കാനിലെ ഉമര്‍ ബിന്‍ ഖത്താബ് പള്ളി തുടങ്ങിയ കേന്ദ്രങ്ങളിലാണ് വെളിച്ചം ഇന്ദ്രജാലവുമായി അരങ്ങിലത്തെിയിരിക്കുന്നത്.
വി.വി.ഐ.ഡി ലൈറ്റ് ഡിസ്പ്‌ളേയുടെയും വീഡിയോ പ്രൊജക്ടറുകളുടെയും ഏറ്റവും നൂതനമായ സംവിധാനങ്ങള്‍ ഉപയോഗപ്പെടുത്തിയാണ് കാലത്തെ ചുവരുകളില്‍ വെളിച്ചം കൊണ്ട് ആലേഖനം ചെയ്യുന്നത്.
ഷാര്‍ജയെ അറബ് വിനോദ സഞ്ചാര തലസ്ഥാന പദവിയിലേയ്ക്ക് തിരഞ്ഞെടുത്തതിന്റെ ആഘോഷ പരിപാടികള്‍ ഇതിനോടനുബന്ധിച്ച് നടക്കുന്നതിനാല്‍ സന്ദര്‍ശകര്‍ക്ക് ഇരട്ടി മധുരമാണ് ലഭിക്കുന്നത്.
https://www.facebook.com/Malayalivartha
