തടവുകാരെ കൈമാറുന്നതിന് ഇന്ത്യയും കുവൈത്തും ഒപ്പുവെച്ച കരാറിന് കുവൈത്ത് പാര്‍ലമെന്റ് അംഗീകാരം നല്‍കി. പ്രധാനമന്ത്രി ശൈഖ് ജാബിര്‍ അല്‍മുബാറക് അല്‍ഹമദ് അസ്സബാഹിന്റെ 2013ലെ ഇന്ത്യ സന്ദര്‍ശനത്തിനിടെ ഒപ്പുവെച്ച കരാറിനാണ് കുവൈത്ത് പാര്‍ലമെന്റ് അംഗീകാരം നല്‍കിയത്. ഇന്ത്യന്‍ പാര്‍ലമെന്റ് ഇതിന് നേരത്തേ അംഗീകാരം നല്‍കിയിരുന്നു. ഒരു മാസത്തിനകം കരാര്‍ നടപ്പില്‍വരുമെന്നാണ് സൂചന. വിവിധ കുറ്റകൃത്യങ്ങളില്‍ ശിക്ഷിക്കപ്പെട്ട് തടവില്‍ കഴിയുന്നവര്‍ക്കാണ് കരാറിന്റെ ആനുകുല്യം ലഭിക്കുക.
എന്നാല്‍, ഗുരുതര കുറ്റകൃത്യങ്ങളായി കണക്കാക്കപ്പെടുന്ന കൊലപാതക, മയക്കുമരുന്ന് കേസുകളില്‍ ഈ ആനുകൂല്യം ലഭിക്കില്ല. കുവൈത്തില്‍ തടവില്‍ കഴിയുന്ന ഇന്ത്യക്കാര്‍ക്ക് പുതിയ കരാര്‍ പ്രകാരം ശേഷിക്കുന്ന ശിക്ഷാ കാലയളവ് ഇന്ത്യയിലെ ജയിലില്‍ പൂര്‍ത്തിയാക്കാം. അടുത്തിടെ വിദേശകാര്യമന്ത്രി സുഷമ സ്വരാജ് ലോക്‌സഭയില്‍ അറിയിച്ച കണക്കനുസരിച്ച് 290 ഇന്ത്യക്കാര്‍ കുവൈത്തില്‍ തടവില്‍ കഴിയുന്നുണ്ട്. ഇവരില്‍ എല്ലാവര്‍ക്കും ഇതിന്റെ ആനുകൂല്യം ലഭിക്കില്ല. കൈമാറ്റം തീരുമാനിക്കുമ്പോള്‍ തടവുകാരുടെ താല്‍പര്യം കൂടി പരിഗണിക്കും.
സ്വന്തം രാജ്യത്ത് തടവുശിക്ഷ അനുഭവിക്കുമ്പോള്‍ ബന്ധുക്കള്‍ക്കും മറ്റും ജയിലില്‍ സന്ദര്‍ശനം സാധ്യമാകുമെന്ന മാനുഷിക പരിഗണനയും ഈ തീരുമാനത്തിന് പിന്നിലുണ്ട്. ശിക്ഷിക്കപ്പെട്ട രാജ്യത്തുതന്നെ തടവില്‍ തുടരുകയാണെങ്കില്‍ ലഭിച്ചേക്കാവുന്ന ആനുകൂല്യങ്ങള്‍ സ്വദേശത്തെ തടവുകാലത്തിനിടെ തടവുകാര്‍ക്ക് ലഭിക്കും. കുവൈത്ത് ജയിലില്‍നിന്ന് ഇന്ത്യയിലെ ജയിലിലേക്ക് മാറ്റപ്പെടുന്ന തടവുകാര്‍ ദേശീയ ദിനത്തോടനുബന്ധിച്ച് അമീരി കാരുണ്യത്തിന്റെ ഭാഗമായുള്ള മാപ്പിനും ശിക്ഷ ഇളവിനുമൊക്കെ അര്‍ഹരായിരിക്കുമെന്ന് ചുരുക്കം.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha