ബഹ്‌റൈന്‍ ചേംബര്‍ ഓഫ് കൊമേഴ്‌സ് ആന്‍ഡ് ഇന്‍ഡസ്ട്രി (ബിസിസിഐ) സംഘടിപ്പിച്ച ബഹ്‌റൈന്‍ഇന്ത്യ ബിസിനസ് ഫോറത്തില്‍ പങ്കെടുക്കവേയാണ് ബഹ്‌റൈന്‍ വാണിജ്യ അണ്ടര്‍ സെക്രട്ടറി നാദിര്‍ ഖാലിദ് അല്‍മൊയദ് ന്ത്യയുമായുള്ള ബഹ്‌റൈന്‍ വ്യാപാരത്തില്‍ 31% വര്‍ധന ഉണ്ടായതായി പറഞ്ഞത്. 987 ദശലക്ഷം ഡോളറിന്റെ വ്യാപാരം കഴിഞ്ഞവര്‍ഷം നടന്നതായി അദ്ദേഹം പറഞ്ഞു. കഴിഞ്ഞ വര്‍ഷത്തെ ഇറക്കുമതി 500 ദശലക്ഷം ഡോളറും കയറ്റുമതി 487 ദശലക്ഷം ഡോളറുമായിരുന്നെന്ന് അല്‍ മൊയദ് പറഞ്ഞു. ബഹ്‌റൈനില്‍നിന്ന് ഇന്ത്യയിലേക്കുള്ള നിക്ഷേപം വര്‍ധിച്ചിട്ടുണ്ട്. 2013ല്‍ 30 ലക്ഷം ഡോളറായിരുന്ന നിക്ഷേപം 2016 ആയപ്പോഴേക്കും 1.8 കോടി ഡോളറായി. നിലവില്‍ 3,181 കമ്പനികളാണ് ഇന്ത്യന്‍ പങ്കാളിത്തത്തോടുകൂടി ബഹ്‌റൈനില്‍ റജിസ്റ്റര്‍ ചെയ്തിട്ടുള്ളത്. 

വ്യോമയാനം, എന്‍ജിനീയറിങ്, ബാങ്കിങ്, ടെലികോം, സര്‍വീസ് മാനേജ്മന്റ് മേഖലകളിലെ 23 ഇന്ത്യന്‍ കമ്പനികളുടെ ശാഖകളും ബഹ്‌റൈനില്‍ റജിസ്റ്റര്‍ ചെയ്തിട്ടുണ്ട്. ബഹ്‌റൈനില്‍ വ്യവസായം ആരംഭിക്കുന്നതിനുള്ള തടസ്സങ്ങള്‍ ഒഴിവാക്കുന്നതിനായി എക്‌സ്‌പോര്‍ട്ട് ഡവലപ്‌മെന്റ് സെന്റര്‍ (ഇഡിസി) ആരംഭിക്കുമെന്നും അദ്ദേഹം പറഞ്ഞു. ഇന്ത്യയും ബഹ്‌റൈനുമായുള്ള വ്യാപാരബന്ധം കൂടുതല്‍ ശക്തമാകുകയാണെന്നു ബിസിസിഐ ചെയര്‍മാന്‍ ഖാലിദ് അല്‍മൊയ്ദ് പറഞ്ഞു. ഇന്ത്യന്‍ ഭരണകൂടവുമായി ചേര്‍ന്നു വ്യാപാരബന്ധം കൂടുതല്‍ ശക്തിപ്പെടുത്താനും ബഹ്‌റൈനില്‍ നിക്ഷേപം പ്രോത്സാഹിപ്പിക്കാനും നടപടികളുണ്ടാകുമെന്നും അദ്ദേഹം അറിയിച്ചു. ഇരുരാജ്യങ്ങളും തമ്മിലുള്ള വ്യാപാരബന്ധം ശക്തിപ്പെടുത്താന്‍ ഫോറം സഹായകമായെന്ന് ഇന്ത്യന്‍ സ്ഥാനപതി അലോക് കുമാര്‍ സിന്‍ഹ പറഞ്ഞു.