ഇന്ത്യയുമായി സ്വരച്ചേർച്ചയിലല്ലാത്ത താലിബാനുമായി ഇന്ത്യ ചർച്ചയ്‌ക്കൊരുങ്ങുന്നതായി റിപ്പോർട്ടുകൾ. മോസ്‌കോയില്‍ വെച്ച് നടക്കാനിരിക്കുന്ന സമാധാന ചര്‍ച്ചാ വേദിയിലാകും ഇന്ത്യ-താലിബാൻ ചർച്ച നടത്താൻ സാധ്യതയുള്ളത്. ചരിത്രത്തിലാദ്യമായാണ് ഇത്തരത്തിലൊരു കൂടിക്കാഴ്ച നടത്തുന്നതെന്ന് അന്തർദേശീയ മാധ്യമങ്ങൾ സൂചിപ്പിക്കുന്നു.

ചർച്ചക്ക്​ വിളിച്ചതും സമാധാന പ്രവർത്തനങ്ങൾക്ക്​ മുൻകൈയെടുക്കുന്നത്​ റഷ്യയാണ്​. ഇന്ത്യയെ കൂടാതെ യു.എസ്​, പാകിസ്​താൻ, ചൈന എന്നീ രാജ്യങ്ങളും പങ്കെടുക്കുന്നുണ്ട്​. എന്നാൽ മോസ്‌കോ ഫോര്‍മാറ്റ് എന്നു പേരിട്ടിരിക്കുന്ന ചര്‍ച്ചയില്‍ പങ്കെടുക്കാന്‍ ഇറാന്‍, കസാഖിസ്ഥാന്‍, കിര്‍ഗിസ്താന്‍, താജിക്കിസ്താന്‍, തുര്‍ക്ക്‌മെനിസ്താന്‍, ഉസ്‌ബെക്കിസ്താന്‍ എന്നീ രാജ്യങ്ങള്‍ക്കും ക്ഷണപത്രം അയച്ചിട്ടുള്ളതായി റഷ്യന്‍ വാര്‍ത്താ ഏജന്‍സി സ്പുട്‌നിക് റിപ്പോര്‍ട്ട് ചെയ്തു.

അതേസമയം അഫ്​ഗാനിസ്​താൻ വിഷയത്തിൽ നവംബർ ഒമ്പതിന്​ റഷ്യ മോസ്​കോയിൽ വെച്ച്​ സമാധാന ചർച്ച നടത്തുന്നുവെന്നറിയാം എന്നാണ്​ ഇതേ കുറിച്ച്​ വിദേശകാര്യ വാക്​താവ്​ രവീഷ്​ കുമാർ അറിയിച്ചത്​. അഫ്​ഗാനിസ്​താനിൽ സമാധാനവും സുരക്ഷയും കൊണ്ടുവരാനുള്ള എല്ലാ ശ്രമങ്ങൾക്കും ഇന്ത്യ പിന്തുണ നൽകുമെന്നും രവീഷ്​ കുമാർ പറഞ്ഞു.

അനൗദ്യോഗികമായാണ്​ ഇന്ത്യ ചർച്ചയിൽ പങ്കാളിയാകുന്നത്​. അഫ്​ഗാനിസ്​ഥാനിലെ ഇന്ത്യൻ അംബാസിഡർ അമർ സിൻഹ, പാകിസ്​താനിലെ മുൻ ഇന്ത്യൻ ഹൈകമീഷണർ ടി.സി.എ രാഘവൻ എന്നിവരാണ്​ ​ചർച്ചയിൽ ഇന്ത്യയെ പ്രതിനിധീകരിക്കുന്നത്​. റഷ്യൻ പ്രസിഡൻറ്​ വ്ലാദിമർ പുചിൻ കഴിഞ്ഞ മാസം ഇന്ത്യയിലെത്തിയതിനു പിറകെയാണ്​ ഇൗ തീരുമാനമുണ്ടായത്.