വെനസ്വേലയിലെ രാഷ്ട്രീയ പ്രതിസന്ധി ; പുതിയ തെരെഞ്ഞെടുപ്പ് വേണമെന്ന അമേരിക്കയുടെ ആവശ്യത്തെ വീറ്റോ ചെയ്ത് റഷ്യയും ചൈനയും
വെനസ്വേലയില് പുതിയ തെരഞ്ഞെടുപ്പ് വേണമെന്ന അമേരിക്കയുടെ ആവശ്യം തള്ളി ചൈനയും റഷ്യയും. ഐക്യരാഷ്ട്രസഭയിലാണ് ചൈനയും റഷ്യയും തങ്ങളുടെ വീറ്റോ അധികാരം ഉപയോഗിച്ച് അമേരിക്കയുടെ ആവശ്യത്തെ തള്ളിയത്. പുതിയ തെരഞ്ഞെടുപ്പിനൊപ്പം മാനുഷിക ഇടപെടല് ആവശ്യപ്പെട്ടായിരുന്നു പ്രമേയം.
15 അംഗ സുരക്ഷാ കൗണ്സിലില് 9 വോട്ട് അമേരിക്കയ്ക്ക് അനുകൂലമായി ലഭിച്ചിരുന്നു. എന്നാല്, റഷ്യയും ചൈനയും വീറ്റോ ഉപയോഗിച്ചതോടെ പ്രമേയം തള്ളുകയായിരുന്നു. ഇതിനു ബദലായി വെനസ്വേലയില് സമാധാനപരമായ ഇടപെടല് ആവശ്യപ്പെട്ട് കൊണ്ട് റഷ്യ പ്രമേയം അവതരിപ്പിച്ചു.
മഡൂറോ ആവശ്യപ്പെട്ടാല് മാത്രം സഹായം ലഭ്യമാക്കിയാല് മതിയെന്നാണ് റഷ്യ ആവശ്യപ്പെട്ടത്. എന്നാല്, ഈ പ്രമേയത്തിന് നാലു രാജ്യങ്ങളുടെ പിന്തുണയേ ലഭിച്ചുള്ളൂ. ഏഴു രാജ്യങ്ങള് എതിര്പ്പ് അറിയിച്ച് രംഗത്ത് വന്നു.
വെനസ്വേലയിലെ ജനങ്ങളെ പീഡിപ്പിച്ചുകൊണ്ട് മഡൂറോയെ സംരക്ഷിക്കാനാണ് റഷ്യ ശ്രമിക്കുന്നതെന്ന് അമേരിക്ക ആരോപിച്ചു. എന്നാല്, ഭരണ കൈമാറ്റം ആഗ്രഹിക്കുന്ന അമേരിക്കയാണോ ജനങ്ങളുടെ സുരക്ഷയെക്കുറിച്ച് ആശങ്ക പ്രകടിപ്പിക്കുന്നതെന്ന് റഷ്യ തിരിച്ചടിച്ചു. ലിബിയയിലും ഇറാഖിലും സിറിയയിലും അഫ്ഗാനിസ്ഥാനിലും സമാനമായ ഇടപെടലുകള് നടത്തിയതിന്റെ പ്രത്യാഘാതങ്ങള് ലോകം കണ്ടതാണെന്നും റഷ്യ പറഞ്ഞു.
അമേരിക്കയാണ് വെനസ്വേലയില് ക്രമസമാധാനം നശിപ്പിക്കാന് ശ്രമിക്കുന്നതെന്ന് വെനസ്വേലയുടെ അംബാസഡര് വസിലി നെബന്സിയ ആരോപിച്ചു. ഗുഅയ്ഡോയെ ഭരണത്തിലെത്തിക്കാന് ഏതു മാര്ഗവും സ്വീകരിക്കുമെന്ന ട്രംപിന്റെ പ്രസ്താവന ഇത് വ്യക്തമാക്കുന്നുണ്ടെന്നും നെബന്സിയ പറഞ്ഞു.
ബ്രസീലിയന് അതിര്ത്തിയില്നിന്ന് വെനസ്വേലയിലേക്ക് സഹായമെത്തിക്കാന് ഗുഅയ്ഡോ നടത്തിയ ശ്രമത്തില് സംഘര്ഷമുണ്ടായിരുന്നു. ഇതില് നാലുപേര് കൊല്ലപ്പെട്ട സാഹചര്യത്തിലാണ് ഐക്യരാഷ്ട്രസഭയില് പ്രമേയവുമായി അമേരിക്ക എത്തിയത്.
https://www.facebook.com/Malayalivartha
