ഒരാഴ്ച മുന്‍പാണ്, അമേരിക്കയിലെ ഒറിഗോണിലുള്ള, ക്രേറ്റര്‍ ലേക്ക് ദേശീയ പാര്‍ക്കിലെ നിഷ്‌ക്രിയമായ അഗ്‌നിപര്‍വ്വത മുഖത്തേക്ക് ഒരാള്‍ വീണുപോയത്. പക്ഷേ അയാളെ, രക്ഷപ്പെടുത്താനായി എന്നത് ഏവരിലും അത്ഭുതം ഉയര്‍ത്തുന്നു. പരിക്കുകള്‍ പൂര്‍ണ്ണമായി ഭേദമായിട്ടില്ലെങ്കിലും പരിക്കേറ്റയാള്‍ക്ക് ആശുപത്രി വിടാന്‍ കഴിഞ്ഞിട്ടുണ്ട്. എഴുന്നേറ്റ് നടക്കാന്‍ കൂടുതല്‍ സമയമെടുത്തേക്കും. എന്നാലും ഇദ്ദേഹം മരണത്തില്‍ നിന്നും രക്ഷപെട്ടത് ഏവര്‍ക്കും അത്ഭുതമാണ്.

ഇക്കഴിഞ്ഞ ചൊവ്വാഴ്ചയാണ് മറ്റ് സഞ്ചാരികള്‍ നോക്കി നില്‍ക്കെ, മഞ്ഞില്‍ തുള്ളിച്ചാടുന്നതിനിടയില്‍ ഇയാള്‍ കാല്‍ വഴുതി വീണത്. സംരക്ഷിത വനപ്രദേശത്താണ് ഈ അഗ്‌നിപര്‍വത മുഖം എന്നതിനാല്‍ വീഴ്ച തടയാനുള്ള കമ്പിവേലിയോ മറ്റ് സംവിധാനങ്ങളോ ഇവിടെ ഉണ്ടായിരുന്നില്ല. അപകടം നടന്ന ഉടന്‍ തന്നെ മറ്റു സഞ്ചാരികള്‍ അധികൃതരെ വിവരം അറിയച്ചതാണ് ഈ വ്യക്തിയെ രക്ഷിക്കുന്നിനു സഹായിച്ചത്. എന്നാല്‍ അത്യഗാധമായ ആഴത്തിലേക്ക് വീണതിനാല്‍ രക്ഷാപ്രവര്‍ത്തനം അത്ര എളുപ്പമായിരുന്നില്ല. തുടക്കത്തില്‍ 180 മീറ്റര്‍ ആഴം വരെ മാത്രമാണ് രക്ഷാപ്രവര്‍ത്തകര്‍ക്ക് ഇറങ്ങിച്ചെല്ലാന്‍ സാധിച്ചത്. ആള്‍ വീണത് എവിടേക്കാണെന്നത് വ്യക്തമല്ലാത്തതും വെളിച്ചക്കുറവ് ഉണ്ടായിരുന്നതും രക്ഷാപ്രവര്‍ത്തനത്തിന് വലിയ തടസ്സം ഉണ്ടാക്കിയിരുന്നു. 180 മീറ്ററില്‍ വച്ച് രക്ഷാപ്രവര്‍ത്തനം അവസാനിപ്പിച്ച് തിരികെ കയറാന്‍ തുടങ്ങുമ്പോള്‍ കൂടുതല്‍ ആഴത്തില്‍ നിന്ന് ആളുടെ നിലവിളി കേട്ടതാണ് വഴിത്തിരിവായത്.

രക്ഷാപ്രവര്‍ത്തകരുടെ ശബ്ദങ്ങള്‍ കേട്ടിട്ടായിരിക്കാം പാതി ബോധത്തിലും പരിക്കേറ്റ വ്യക്തി നിലവിളിച്ചതെന്നാണ് കരുതുന്നത്. ഏതായാലും ഇതോടെ കൂടുതല്‍ ആഴത്തിലേക്കിറങ്ങാന്‍ രക്ഷാപ്രവര്‍ത്തകര്‍ തീരുമാനിച്ചു.

ഒടുവില്‍ 240 മീറ്റര്‍ താഴ്ചയില്‍ പരിക്കേറ്റു കിടക്കുന്ന വിനോദസഞ്ചാരിയെ കണ്ടെത്തുകയായിരുന്നു. ഗര്‍ത്തിന്റെ താഴേയ്ക്കുള്ള ഭാഗം ഇടുങ്ങിയതായതിനാലാണ് പരിക്കേറ്റയാളുടെ നിലവിളി രക്ഷാപ്രവര്‍ത്തകര്‍ കേട്ടത്. ഇല്ലെങ്കില്‍ ഒരുപക്ഷേ താരതമ്യേന നേര്‍ത്ത ശബ്ദം കേള്‍ക്കാനുള്ള സാധ്യത വിരളമാണെന്ന് രക്ഷാപ്രവര്‍ത്തകരും വ്യക്തമാക്കി.

ഗര്‍ത്തത്തില്‍ നിന്ന് ആളെ കണ്ടെത്തി അര മണിക്കൂറിനുള്ളില്‍ പുറത്തെത്തിക്കാന്‍ രക്ഷാപ്രവര്‍ത്തകര്‍ക്കു കഴിഞ്ഞു. വൈകാതെ ഹെലികോപ്റ്ററില്‍ ഇയാളെ ആശുപത്രിയില്‍ എത്തിക്കുകയും ചെയ്തു. കഴുത്തിനും വാരിയെല്ലുകള്‍ക്കും ഒരു കൈക്കുമാണ് വീഴ്ചയില്‍ സാരമായ പരിക്കേറ്റത്. ആശുപത്രി വിട്ടെങ്കിലും സാധാരണ ജീവിതത്തിലേക്ക് ഇയാള്‍ തിരിച്ചു വരാന്‍ മാസങ്ങളെടുക്കുമെന്നാണു കരുതുന്നത്. സമാനമായ രീതിയില്‍ ഹവായിയിലെ ഒരു അഗ്‌നിപര്‍വത മുഖത്തേക്ക് വീണ അമേരിക്കന്‍ സൈനികനെ ഒരു മാസം മുന്‍പ് രക്ഷപെടുത്തിയിരുന്നു.