ഇന്ത്യ-ചൈന അതിര്‍ത്തിത്തര്‍ക്കം: പത്ത് ചര്‍ച്ചകള്‍ നടക്കും, 1962-ല്‍ ചൈനയോടു പരാജയപ്പെട്ട സേനയല്ല ഇന്നത്തേതെന്നും ഏതു വെല്ലുവിളിയും നേരിടാന്‍ സജ്ജമാണെന്നും സേനാ വൃത്തങ്ങള്‍
അതിര്‍ത്തിത്തര്‍ക്കം പരിഹരിക്കാന്‍ ഇരുരാജ്യങ്ങളും തമ്മില്‍ മുന്‍പുണ്ടാക്കിയ കരാറുകളുടെ പകര്‍പ്പുമായി ചര്‍ച്ചകള്‍ക്കെത്തുന്ന ഇന്ത്യന്‍ സംഘം, അവ പാലിക്കപ്പെടേണ്ടതാണെന്ന് ചൈനയെ ഓര്‍മിപ്പിക്കുന്നു. ഇരുപക്ഷവും തമ്മില്‍ മാരത്തണ്‍ ചര്‍ച്ചകള്‍ക്കു തയാറെടുക്കുകയാണ്. ഇന്ത്യ - ചൈന സേനകള്‍ തമ്മില്‍ 10 ചര്‍ച്ചകള്‍ നടക്കുമെന്നു സേനാ വൃത്തങ്ങള്‍ പറഞ്ഞു. പാംഗോങ് ട്‌സോ മലനിരകളില്‍ നിന്നുള്ള പിന്മാറില്ല എന്ന കാര്യത്തില്‍ ചൈന കടുംപിടിത്തം തുടരുകയാണ്.
ബലപ്രയോഗം വേണ്ടെന്നാണ് ഇന്ത്യയുടെ തീരുമാനം. ചൈനയുമായുള്ള ഇടപെടലുകളില്‍ ക്ഷമയ്ക്ക് സ്ഥാനമേറെയുണ്ടെന്ന യാഥാര്‍ഥ്യം മനസ്സിലാക്കിയാണ് ഇന്ത്യന്‍ സേനയുടെ ഇടപെടലുകള്‍. എന്നാലും കിഴക്കന്‍ ലഡാക്കിലെ അതിര്‍ത്തിയിലുടനീളം ഇന്ത്യ ശക്തമായ പടയൊരുക്കം നടത്തിയതോടെ, കൂടുതല്‍ മുന്നോട്ടുനീങ്ങാന്‍ ചൈനയ്ക്കു സാധ്യമല്ലെന്നു സേനാ വൃത്തങ്ങള്‍ ചൂണ്ടിക്കാട്ടി. എങ്കിലും, നിലവിലുള്ള കടന്നുകയറ്റങ്ങളില്‍ നിന്ന് ഒഴിയാന്‍ അവര്‍ തയാറാവണം.
അതിര്‍ത്തിത്തര്‍ക്കം രമ്യമായി പരിഹരിക്കാന്‍ നയതന്ത്ര, സേനാ തലങ്ങളിലുള്ള ചര്‍ച്ചകള്‍ ഇന്ത്യയും ചൈനയും തുടരുകയാണെന്നു വിദേശകാര്യ മന്ത്രാലയം. ഇരു രാജ്യങ്ങളിലെയും ഭരണനേതൃത്വങ്ങള്‍ തമ്മിലുണ്ടാക്കിയ ധാരണകള്‍ പ്രകാരം പ്രശ്‌നം എത്രയും വേഗം പരിഹരിക്കേണ്ടതുണ്ടെന്ന കാര്യത്തില്‍ കഴിഞ്ഞ ദിവസത്തെ യോഗത്തില്‍ ഉന്നത സേനാ കമാന്‍ഡര്‍മാര്‍ യോജിച്ചതായി വിദേശകാര്യ വക്താവ് അനുരാഗ് ശ്രീവാസ്തവ പറഞ്ഞു. സംഘര്‍ഷത്തില്‍ അയവു വരുത്താനുള്ള നടപടികള്‍ ഇരു രാജ്യങ്ങളും ആരംഭിച്ചതായി ചൈനീസ് വിദേശകാര്യ മന്ത്രാലയം ബുധനാഴ്ച വ്യക്തമാക്കിയിരുന്നു
ഇന്ത്യയ്ക്ക് ചൈനീസ് അതിര്‍ത്തിയുടെ സുരക്ഷയ്ക്കായി ്3 ലക്ഷത്തിലധികം പട്ടാളക്കാരാണുള്ളത്. 3488 കിലോമീറ്റര്‍ വരുന്ന യഥാര്‍ഥ നിയന്ത്രണ രേഖയുടെ ചുമതല വഹിക്കുന്ന വിവിധ കോറുകളിലെ അംഗങ്ങളുടെ എണ്ണമാണിത്. 1962-ല്‍ ചൈനയോടു പരാജയപ്പെട്ട സേനയല്ല ഇന്നത്തേതെന്നും ഏതു വെല്ലുവിളിയും നേരിടാന്‍ സജ്ജമാണെന്നും സേനാ വൃത്തങ്ങള്‍ പറഞ്ഞു.
ചൈനീസ് അതിര്‍ത്തിയിലെ കോറുകള്‍: (ഒരു കോറില്‍ ചുരുങ്ങിയത് 60,000 അംഗങ്ങള്‍.) നിലവില്‍ സംഘര്‍ഷം നടക്കുന്ന ലഡാക്ക്: 14 കോര്‍ (വിളിപ്പേര് - ഫയര്‍ ആന്‍ഡ് ഫ്യൂറി കോര്‍, ആസ്ഥാനം - കശ്മീരിലെ ലേ)
സിക്കിം: 33 കോര്‍ (ത്രിശക്തി കോര്‍, ബംഗാളിലെ സിലിഗുഡി), അരുണാചല്‍ പ്രദേശ്: 3 കോര്‍ (സ്പിയര്‍ കോര്‍, നാഗാലന്‍ഡിലെ ദിമാപുര്‍), 4 കോര്‍ (ഗജ്രാജ് കോര്‍, അസമിലെ തേസ്പുര്‍)
അതിര്‍ത്തിയിലുടനീളമുള്ള ആക്രമണ നിര: 17 മൗണ്ടന്‍ സ്‌ട്രൈക്ക് കോര്‍ - ബംഗാളിലെ പാണാഗഡ് ആണ് ആസ്ഥാനമെങ്കിലും അതിര്‍ത്തിയിലെവിടെയും എപ്പോള്‍ വേണമെങ്കിലും നിലയുറപ്പിക്കാന്‍ സജ്ജം. സംഘര്‍ഷം രൂക്ഷമായാല്‍ മൗണ്ടന്‍ സ്‌ട്രൈക്ക് കോറിന്റെ അപ്രതീക്ഷിത നീക്കങ്ങള്‍ ചൈനയ്ക്കു തലവേദനയാകും.
https://www.facebook.com/Malayalivartha
