തിരഞ്ഞെടുപ്പ് എതിരാളികളെയെല്ലാം പിന്നിലാക്കി മുന്നേറിയ ബ്രിട്ടീഷ് പ്രധാനമന്ത്രി ഡേവിഡ് കാമറോണിന് പത്തുവയസുകാരി ഇന്ത്യന്‍ വിദ്യാര്‍ഥിനിയുടെ ചോദ്യത്തിനുമുന്നില്‍ പതറി. ഗ്രേറ്റര്‍ മാഞ്ചസ്റ്ററില്‍ പ്രചാരണ പര്യടനം നടത്തുന്നതിനിടെ ബിബിസിയുടെ ന്യൂസ്‌റൗണ്ട് പരിപാടിയിലാണ് സാല്‍ഫോഡിലെ റീമ എന്ന ഇന്ത്യന്‍ വിദ്യാര്‍ത്ഥിയുടെ ചോദ്യം ഓര്‍ക്കാപുറത്ത് കാമറോണിന് നേരിടേണ്ടി വന്നത്.
\'താങ്കള്‍ക്കു പുറമെ വിജയിക്കണമെന്ന് താങ്കള്‍ ആഗ്രഹിക്കുന്ന മറ്റേതെങ്കിലും രാഷ്ട്രീയ നേതാവുണ്ടോ? ഉണ്ടെങ്കില്‍ അത് ആരാണ്? എന്തു കൊണ്ട്?\' എന്ന റീമയുടെ ചോദ്യമാണ് കാമറോണിനെ വെള്ളം കുടിപ്പിച്ചത്. വോട്ടര്‍മാര്‍ക്ക് വലിയ വാഗ്ദാനങ്ങള്‍ വാരിക്കോരി നല്‍കുന്ന കണ്‍സര്‍വേറ്റീവ് പാര്‍ട്ടിയുടെ പുതിയ പ്രകടന പത്രിക പുറത്തിറക്കിയതിനു തൊട്ടു പിറകെയായിരുന്നു ഇത്. ആശ്ചര്യം പ്രകടിപ്പിച്ചും മരിച്ചവരാണോ ജീവിച്ചിരിക്കുന്നവരാണോ എന്നു ചോദിച്ചും സമയം തീര്‍ത്ത് തലയൂരാന്‍ ശ്രമിച്ച പ്രധാനമന്ത്രിക്കു പക്ഷേ അതിനു സാധിച്ചില്ല. ചോദ്യം നേരിട്ടുള്ളതായതിനാല്‍ ഒഴിഞ്ഞു മാറാന്‍ അദ്ദേഹത്തിനായില്ല. ഒടുവില്‍ ഒരു വിധം പറഞ്ഞൊപ്പിച്ചാണ് കാമറോണ്‍ തലയൂരിയത്.
ജയിക്കാന്‍ യോഗ്യരായ മറ്റാരെങ്കിലും ഉണ്ടായിരുന്നെങ്കില്‍ താനൊരിക്കലും മത്സര രംഗത്തുണ്ടാകുമായിരുന്നില്ലെന്നാണ് അദ്ദേഹം പറഞ്ഞത്. മറ്റാര് ജയിക്കണമെന്ന ചോദ്യത്തിന് വാസ്തവത്തില്‍ തനിക്ക് ഉത്തരം പറയാനാകില്ലെന്ന് കാമറോണ്‍ സമ്മതിക്കുകയും ചെയ്തു. \'രാജ്യത്ത് എനിക്ക് പ്രതീക്ഷയുള്ള ഒരുപാട് സ്ഥാനാര്‍ത്ഥികളുണ്ട്. എനിക്കു പകരം മറ്റാരെങ്കിലും ജയിച്ചു കാണാന്‍ ആഗ്രഹമുണ്ടെന്ന് പറയുക പ്രയാസമാണ്,\' കാമറോണ്‍ പഞ്ഞു. ഈ ചോദ്യമാണ് തെരഞ്ഞെടുപ്പ് പ്രചാരണത്തിനിടെ തനിക്ക് നേരിടേണ്ടി വന്നതില്‍ ഏറ്റവും കഠിനമായ ചോദ്യമെന്നു പറഞ്ഞ കാമറോണ്‍ കൊച്ചുമിടുക്കിയെ അഭിനന്ദിക്കാനും മറന്നില്ല.
മറ്റു നേതാക്കളെയെല്ലാം പിന്തള്ളിയ പ്രധാനമന്ത്രി ഡേവിഡ് കാമറോണിന് തന്നെയാണ് വിജയ സാധ്യത കല്‍പ്പിക്കപ്പെടുന്നത്. പ്രധാന എതിരാളിയായ ലേബര്‍ നേതാവ് എഡ് മിലിബാന്‍ഡ്, സഖ്യകക്ഷി നേതാവ് നിക്ക് ക്ലെഗ്, യുകിപിന്റെ നൈജല്‍ ഫരാഗെ എന്നിവരെ പിന്നിലാക്കുന്നതിലും കാമറോണ്‍ വിജയിച്ചു. പക്ഷെ ഒരു പത്തു വയസ്സുകാരി ഇന്ത്യന്‍ പെണ്‍കുട്ടിയുടെ ചോദ്യത്തിനു മുന്നില്‍ കാമറോണിന് കഴിഞ്ഞ ദിവസം മുട്ടു മടക്കേണ്ടി വന്നു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha