ആണുങ്ങള്‍ കുത്തകയാക്കി വച്ചിരിക്കുന്ന ബോഡി ബില്‍ഡിങ്ങ് വിഭാഗത്തിലേക്ക് ഒരു ഇന്ത്യന്‍ യുവതിയുടെ വിജയക്കൊടി. കരുത്തുറ്റ ശരീരമുള്ളവരെ കണ്ടെത്താന്‍ നടത്തുന്ന ഇന്റര്‍നാഷണല്‍ ഫിഗര്‍ കോംപറ്റീഷനില്‍ ഇത്തവണ വിജയിച്ചത് ഇന്ത്യയില്‍ നിന്നുള്ള ഒരു 31കാരിയാണ്. പുനെ സ്വദേശിയായ ദീപിക ചൗധരി. പുനെയില്‍ സയന്‍സില്‍ പിജി ചെയ്യുന്ന ദീപിക സാധാരണ കുടുംബത്തില്‍ നിന്നാണ് ലോകമറിയുന്ന ബോഡി ബില്‍ഡറായി വളര്‍ന്നത്.
എന്നാല്‍, ഭര്‍ത്താവിന്റെ വീട്ടുകാര്‍ക്കൊന്നും തന്നെ ഇഷ്ടമായിരുന്നില്ലെന്നു ദീപിക പറയുന്നു. തങ്ങളുടെ വാക്കു കേള്‍ക്കാതെ ഇഷ്ടപ്പെട്ട പെണ്‍കുട്ടിയെ മകന്‍ വിവാഹം കഴിച്ചതിലുള്ള എതിര്‍പ്പായിരുന്നു വീട്ടുകാര്‍ക്ക്. എന്നാല്‍, തന്റെ വിഷമങ്ങളൊക്കെ മനസിലാക്കി ഒപ്പം നിന്ന ഭര്‍ത്താവിന്റെ പ്രചോദനമാണ് പുതിയ മേഖലയിലേക്കു കടക്കാന്‍ ദീപികയ്ക്കു കരുത്തായത്.
ദിവസവും കാലത്ത് 5.30ന് എഴുന്നേറ്റ് ജോഗിങ്ങിനു പോകുന്ന ദീപിക തിരിച്ചെത്തി വീട്ടുകാര്യങ്ങളൊക്കെ നോക്കിയശേഷമാണ് ഓഫീസിലേക്കു പോകുന്നത്. വൈകുന്നേരം ആറോടെ വീടിനു സമീപത്തെ ജിംനേഷ്യത്തിലേക്കു പോകുമ്പോള്‍ ഭര്‍ത്താവ് തനുജീത്തും ഒപ്പമുണ്ടാകും.
അഞ്ചുവര്‍ഷം മുമ്പായിരുന്നു ദീപികയുടെയും ബംഗാള്‍ സ്വദേശിയായ തനുജീത്തിന്റെയും വിവാഹം. പതിനഞ്ചു വര്‍ഷം നീണ്ട സൗഹൃദം പ്രണയത്തിനു വഴിമാറിയപ്പോഴാണ് ദീപികയും തനുജീത്തും വിവാഹം കഴിച്ചത്.
ഫ്‌ളോറിഡയിലെ ഡെയ്‌ടോണ ബീച്ചില്‍ നടന്ന അന്താരാഷ്ട്ര മത്സരത്തില്‍ അമേരിക്കയില്‍ നിന്നും പോര്‍ട്ടോ റിക്കോയില്‍ നിന്നുമുള്ള പതിനഞ്ച് കായികതാരങ്ങളെ പിന്നിലാക്കിയാണ് ദീപിക വിജയക്കൊടി നാട്ടിയത്. തന്റെ വിജയങ്ങള്‍ക്ക് എന്നും കരുത്തു പകര്‍ന്നത് ഭര്‍ത്താവ് തനുജീത്താണെന്ന് ദീപിക പറയുന്നു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha