യെമനില്‍ ഹൗതി ഷിയാകള്‍ക്കെതിരേയുള്ള വ്യോമാക്രമണം സൗദി അറേബ്യ ശക്തമാക്കി. ഇന്നലെ മധ്യയെമനിലും തെക്കന്‍ യെമനിലുമുള്ള ഹൗതി കേന്ദ്രങ്ങളില്‍ 20 തവണ ആക്രമണം നടത്തി.
ചെങ്കടല്‍ തീരത്തെ നഗരമായ ഹൊഡെയ്ഡയിലെ സൈനികതാവളത്തിലും സൗദി വിമാനങ്ങള്‍ ആക്രമണം നടത്തി. ഹൗതികളെ പിന്തുണയ്ക്കുന്ന സൈനിക വിഭാഗത്തിന്റെ നിയന്ത്രണത്തിലാണ് ഈ താവളം. 
ഏഡന്‍, ഇബ്, അല്‍കാഫ്് തുടങ്ങിയ സ്ഥലങ്ങളിലും വ്യോമാക്രമണമുണ്ടായി. ഒരുമാസമായി തുടരുന്ന വ്യോമാക്രമണം നിര്‍ത്തിവയ്ക്കുകയാണെന്നു ചൊവ്വാഴ്ച സൗദി പ്രഖ്യാപിച്ചെങ്കിലും യെമന്‍ പ്രസിഡന്റ് ഹാദിയെ അനുകൂലിക്കുന്ന സൈനിക ബ്രിഗേഡിന്റെ തെയ്‌സെയിലെ താവളം ഹൗതികള്‍ ആക്രമിച്ചതിനെത്തുടര്‍ന്നു സൗദി വ്യോമാക്രമണം പുനരാരംഭിക്കുകയായിരുന്നു. ഏഡനിലും മറ്റു നഗരങ്ങളിലും ഹൗതി ഷിയാകളും ഹാദിയെ പിന്തുണയ്ക്കുന്നവരും തമ്മില്‍ പോരാട്ടം തുടരുകയാണ്. ആക്രമണം നിര്‍ത്താന്‍ സൗദി സമ്മതിച്ചാലേ ചര്‍ച്ചയ്ക്കുള്ളൂവെന്ന് ഹൗതികള്‍ വ്യക്തമാക്കി.

ഇതിനിടെ, ഹൗതികള്‍ക്ക് ആയുധം നല്‍കുന്നതിനെതിരേ അമേരിക്ക ഇറാനു മുന്നറിയിപ്പു നല്‍കി. അമേരിക്കയുടെ യുഎസ്എസ് തിയഡോര്‍ റൂസ്്‌വെല്‍റ്റ് എന്ന വിമാനവാഹിനിയും നോര്‍മന്‍ഡി എന്ന മിസൈല്‍ വാഹിനിയും ഏഡന്‍ കടലിലേക്കു നീങ്ങിയിട്ടുണ്ട്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha