ബ്രിട്ടനിലെ ഇപ്പോഴത്തെ ഹീറോ ഒരു കുഞ്ഞാണ്. ജനിച്ച് മിനിറ്റുകള്‍ മാത്രം ജീവിച്ച ടെഡിയെന്ന കുഞ്ഞാണ് ഈ ഹീറോ. ജെസ്സ് ഇവാന്‍സമെക് ഹോള്‍സ്റ്റണ്‍ ദമ്പതികള്‍ക്ക് കഴിഞ്ഞ വര്‍ഷം ഏപ്രില്‍ 22നാണ് ഇരട്ട കുട്ടികള്‍ ഉണ്ടായത്. ഇതില്‍ ഒരാളായിരുന്നു ടെഡി. ജനിച്ച് 100 മിനിറ്റ് മാത്രമാണ് ടെഡി ഹോള്‍സ്റ്റണ്‍ ജീവിച്ചിരുന്നത്.
തലച്ചോറിലെ ഗുരുതരമായ രോഗത്തെ തുടര്‍ന്നാണു ടെഡി മരിച്ചത്. അവന്റെ അവയവങ്ങള്‍ ആവശ്യക്കാര്‍ക്ക് മാതാപിതാക്കള്‍ ദാനം ചെയ്തതിലൂടെയാണ് ഇപ്പോള്‍ ടെഡി ഹീറോയായിരിക്കുന്നത്. ഒരു വര്‍ഷം മുമ്പ് നടന്ന സംഭവം ഇപ്പോഴാണ് മാതാപിതാക്കള്‍ സോഷ്യല്‍ മിഡീയായിലൂടെ പുറത്തുവിട്ടത്. ടെഡിയുടെ ഓര്‍മയ്ക്കായി ഉണ്ടാക്കിയിരുന്ന ചാരിറ്റബിള്‍ സൊസൈറ്റിയുടെ ഫേസ്ബുക്ക് പേജിലാണ് ഇവര്‍ ഇക്കാര്യം വെളിപ്പെടുത്തിയത്.
ഇരട്ടകളാണെന്ന് അറിഞ്ഞതോടെ അവരുടെ പേരുകള്‍വരെ ഇവര്‍ തീരുമാനിച്ചിരുന്നു. ഒരു കുട്ടിക്ക് ടെഡി നോഹ ഹോ ള്‍ട്ടണ്‍ എന്നും അടുത്ത കുട്ടിക്ക് നോഹ ടെഡി ഹോള്‍ട്ടണ്‍ എന്നുമാണ് അവര്‍ പേരുകള്‍ തീരുമാനിച്ചിരുന്നത്. പിന്നീടുള്ള മെഡിക്കല്‍ പരിശോധനയിലാണ് ഒരു കുഞ്ഞിന്റെ കാര്യത്തില്‍ ചില പ്രശ്‌നങ്ങള്‍ കണ്ടത്. അപുര്‍വമായ രോഗം ഒരു കുട്ടിക്ക് ഉണ്ടെന്നായിരുന്നു മെഡിക്കല്‍ റിപ്പോര്‍ട്ട്. ജനിച്ചാല്‍ ഒരു ദിവസം പോലും ജീവിച്ചിരിക്കില്ലെന്ന് ഡോക്ടര്‍ പറഞ്ഞു. തലച്ചോറ് ഇല്ലാതെയോ, നട്ടെല്ലിന് എന്തെങ്കിലും കുഴപ്പമോ ബധിരനോ മൂകനോ കോമ സ്‌റ്റേജിലോ അയിരിക്കും കുഞ്ഞ് ജനിക്കുകയെന്ന് ഡോക്ടര്‍മാര്‍ പറഞ്ഞു.
അതുകൊണ്ട് ഗര്‍ഭം അലസിപ്പിക്കാനും ഇവര്‍ നിര്‍ദേശിച്ചു. എന്നാല്‍ കുട്ടി ഒരു നിമിഷമോ മിനിറ്റോ മണിക്കൂറോ ജീവിച്ചിരുന്നാലും തങ്ങള്‍ക്ക് ആ കുട്ടിയെ വേണമെന്ന് ജെസും മെകും തീരുമാനിച്ചു. മാത്രമല്ല തങ്ങളുടെ കുഞ്ഞിന്റെ അവയവങ്ങള്‍ ആവശ്യക്കാര്‍ക്ക് ദാനം ചെയ്യാനും തീരുമാനമെടുത്തു. കിഡ്‌നി ആവശ്യമുള്ള ഒരാള്‍ക്കാണ് ടെഡിയുടെ അവയവം കൊടുത്തത്. പ്രായപൂര്‍ത്തിയായ ആള്‍ക്ക് അനുയോജ്യമായ തരത്തില്‍ കിഡ്‌നിയെ വലുതാക്കിയാണ് ഡോക്ടര്‍മാര്‍ ഉപയോഗിച്ചത്. ടെഡിയുടെ കരള്‍, ഹൃദയം, ശ്വാസകോശം എന്നിവയും ദാനം ചെയ്തിരുന്നു.
ടെഡിക്കൊപ്പം ജനിച്ച കുഞ്ഞ് ആരോഗ്യവതിയായിരുന്നു. ടെഡി ജനിച്ചതും മരിച്ചതും ഒരു ഹീറോ യായിട്ടാണെന്നാണ് മാതാപിതാക്കളായ ജെസ്സിയും മെകിയും ഫേസ്ബുക്കില്‍ കുറിച്ചത്. ടെഡിയുടെ ജീവിതം വളരെപ്പേര്‍ക്ക് മാതൃകയാക്കണമെന്നാണ് ഇവര്‍ പറയുന്നത്. തങ്ങളുടെ പ്രിയപ്പെട്ടവരുടെ ഭാഗങ്ങള്‍ മറ്റാരുടെയെങ്കിലും ജീവന് കാരണമാകുന്നതില്‍ നാം സന്തോഷിക്കണമെന്നും ഇവര്‍ പറയുന്നു. കഴിഞ്ഞ 22ന് നിരവധി ജന്മദിന ആശംസകളാണ് ടെഡിയുടെ ഫേസ്ബുക്കില്‍ വന്നത്. ഈ കുറിപ്പ് പുറത്തുവന്നതിനു ശേഷം രണ്ടായിരം പേരാണ് അവയവദാനത്തിന് സന്നദ്ധരായി ചാരിറ്റബില്‍ സൊസൈറ്റിയെ സമീപിച്ചിരിക്കുന്നത്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha