ആരോഗ്യ പ്രശ്നങ്ങളെ തുടര്ന്ന് ജപ്പാന് പ്രധാനമന്ത്രി ഷിന്സോ ആബെ രാജിവച്ചു
ഏറെക്കാലമായി ബുദ്ധിമുട്ടിക്കുന്ന വന്കുടലിലെ രോഗം മൂലം ജനങ്ങള് ഏല്പ്പിച്ച ഉത്തരവാദിത്തം നിറവേറ്റാനാവാത്തതിനാല് ജപ്പാന് പ്രധാനമന്ത്രി ഷിന്സോ ആബെ (65) രാജിവച്ചു.
ആബെ 2006-ല് ആണ് ആദ്യം അധികാരത്തിലെത്തിയത്. 2012 മുതല് 3 തവണ തുടര്ച്ചയായി അധികാരത്തിലെത്തി. രാജ്യത്ത് ഏറ്റവും ദീര്ഘകാലം പ്രധാനമന്ത്രി സ്ഥാനം വഹിച്ച ആബെയ്ക്ക് 2021 സെപ്റ്റംബര് വരെ കാലാവധിയുണ്ടായിരുന്നു.
ജപ്പാന്റെ സാമ്പത്തിക, രാഷ്ട്രീയ രംഗത്ത് പ്രത്യാഘാതങ്ങള് ഉണ്ടാക്കുന്ന തീരുമാനമാണ് ആരോഗ്യകാരണങ്ങളാല് ആബെയ്ക്ക് സ്വീകരിക്കേണ്ടിവന്നത്.
'നിരവധി സ്വപ്നങ്ങള് ബാക്കി നിര്ത്തി, വേദനയോടെ സ്ഥാനമൊഴിയുന്നു, ക്ഷമിക്കുക' രാജി തീരുമാനം അറിയിച്ചുകൊണ്ട് ജപ്പാന് പ്രധാനമന്ത്രി ഷിന്സോ ആബെ പറഞ്ഞു. ജനങ്ങള്ക്കു വേണ്ടി ശരിയായ തീരുമാനങ്ങള് എടുക്കാന് കഴിയില്ലെങ്കില് തുടരുന്നതില് കാര്യമില്ലെന്നും ആബെ കൂട്ടിച്ചേര്ത്തു.
രണ്ടാം ലോകമഹായുദ്ധത്തിലെ പരാജയത്തെ തുടര്ന്ന് അമേരിക്കന് സമ്മര്ദത്തിനു വഴങ്ങി ഭരണഘടനയില് എഴുതിച്ചേര്ത്ത പ്രതിരോധാവശ്യത്തിനു മാത്രം സൈന്യം മതി എന്നു വ്യവസ്ഥ ചെയ്യുന്ന ആര്ട്ടിക്കിള് 9 ജപ്പാന്റെ അഭിമാനത്തിനേറ്റ മുറിവായിരുന്നു. അതു മാറ്റിയെഴുതി സൈനികശക്തിയാകണമെന്ന് ഏതൊരു ജപ്പാന്കാരനെയും പോലെ ആബെയും ആഗ്രഹിച്ചിരുന്നു.
രാഷ്ട്രീയ സ്ഥിരതയില്ലാത്ത സര്ക്കാരുകളെ ഏറെ കണ്ട രാജ്യമാണ് ജപ്പാന്. എന്നാല് ആബെയുടെ നീണ്ട കാലഘട്ടം ലോകത്തെ മൂന്നാമത്തെ വലിയ സാമ്പത്തിക ശക്തിയായ ജപ്പാന് തിരിച്ചുവരവിന്റെ കാലമായിരുന്നു. രാജ്യാന്തര കാര്യങ്ങളില് ഇടപെടാന് കരുത്തുള്ള മികച്ച സൈനിക ശക്തിയായി രാജ്യത്തെ മാറ്റണം എന്നതായിരുന്നു ആബെയുടെ സ്വപ്നം. ജപ്പാന് സൈന്യത്തിന് രാജ്യത്തിനു പുറത്തുപോയി യുദ്ധം ചെയ്യാന് അനുമതി നല്കുന്ന ഭരണഘടനാ ഭേദഗതി 2014-ല് കൊണ്ടുവരാന് ആബെയ്ക്ക് കഴിഞ്ഞു.
2006-ല് 52-ാം വയസ്സില് ലിബറല് ഡെമോക്രാറ്റിക് പാര്ട്ടി (എല്ഡിപി) പ്രതിനിധിയായി ജപ്പാനിലെ ഏറ്റവും പ്രായം കുറഞ്ഞ പ്രധാനമന്ത്രിയായ ആബെ ഒരു വര്ഷം കഴിഞ്ഞപ്പോള് ആരോഗ്യകാരണങ്ങളാല് ഒഴിഞ്ഞു. വീണ്ടും 2012-ല് അധികാരത്തില് തിരിച്ചെത്തി. ചെറുപ്പം മുതല് ആബെയെ അലട്ടിയിരുന്ന കുടല് രോഗം കഴിഞ്ഞ ജൂണില് നടത്തിയ പരിശോധനയില് ഗുരുതരമായതായി കണ്ടെത്തിയിരുന്നു. ടോക്കിയോയിലെ കിയോ ആശുപത്രിയില് രണ്ടാഴ്ച മുന്പ് പരിശോധനകള്ക്കു പോയശേഷം അദ്ദേഹത്തിന്റെ ആരോഗ്യത്തെപ്പറ്റി വാര്ത്തകള് പ്രചരിച്ചിരുന്നു. ഊഹാപോഹങ്ങള്ക്ക് അവസാനമിട്ട് ഒടുവില് ആബേ തന്നെ രംഗത്തുവന്നു. രോഗം മാറുമെന്ന് ഉറപ്പില്ലാത്തതിനാല് അധികാരമൊഴിയുകയാണെന്ന് വ്യക്തമാക്കി.
പ്രതിരോധ മന്ത്രി താരോ കോനോ, മുന് പ്രതിരോധമന്ത്രി ഷിഗെരു ഇഷിബ, മുന് വിദേശകാര്യമന്ത്രി ഫുമിയോ കിഷിദ, ചീഫ് കാബിനറ്റ് സെക്രട്ടറി യോഷിഹിദെ സുഗ എന്നിവരില് ആരെങ്കിലും അടുത്ത പ്രധാനമന്ത്രിയാവാനാണ് സാധ്യത.
https://www.facebook.com/Malayalivartha