മലയാളികൾക്ക് പുതുവർഷത്തിന്റെയും പ്രതീക്ഷകളുടെയും പുത്തൻ ഉണർവുകൾ സമ്മാനിച്ചു കൊണ്ട് മറ്റൊരു ചിങ്ങമാസം കൂടി പിറന്നു. കൊല്ലവർഷത്തിലെ ആദ്യ മാസമായ ചിങ്ങം ഒന്നിനെ കേരളീയർ ഏറെ ആവേശത്തോടെയും സന്തോഷത്തോടെയുമാണ് വരവേൽക്കുന്നത്. പ്രകൃതി അതിന്റെ ഏറ്റവും മനോഹരമായ വഴികളിലൂടെ കടന്നുപോകുന്ന ഈ കാലം, കാർഷിക സംസ്കൃതിയുടെയും സമൃദ്ധിയുടെയും ഓർമ്മപ്പെടുത്തൽ കൂടിയാണ്.

അതേസമയം വറുതിയുടെ കർക്കടകത്തെ പിന്നിലാക്കി ഇന്ന് ചിങ്ങപ്പിറവി. മണ്ണിനെ പൊന്നാക്കിയ കർഷകരുടെ ദിനം. കേരളത്തിന്റെ ഭൂവിസ്തൃതിയുടെ നല്ലൊരു പങ്കും കൃഷിയിടമാണ്. ഏകദേശം 46 ലക്ഷം ഏക്കർ ഭൂമിയാണ് ഒരു വർഷം കൃഷിക്ക് ഉപയോഗിക്കുന്നത്.

ഓരോ വർഷവും ഒന്നിലധികം വിളകളാണ് ഒരേ മണ്ണിൽ കൃഷി ചെയ്യുന്നത്. കേരളത്തിലെ കൃഷിഭൂമിയുടെ (ഗ്രോസ് ക്രോപ്പ്ഡ് ഏരിയ) സിംഹഭാഗവും (65.7%) തേങ്ങ, റബർ തുടങ്ങിയ നാണ്യവിളകളാണ്. നെൽകൃഷി 7.01 %. ഭക്ഷ്യവിളകളുടെ കൃഷി കുറഞ്ഞിട്ടുണ്ടെങ്കിലും, ഒട്ടേറെ യുവാക്കൾ മേഖലയിലേക്ക് കടന്നു വരുന്നുണ്ട്.

പുതുവർഷവും പുതിയ പ്രതീക്ഷകളും നമ്മുടെ ഉള്ളിൽ പുതിയ ഉണർവും ഊർജ്ജവും നിറയ്ക്കുകയാണ്. ഇന്നലെയുടെ വിഷമങ്ങളും വീഴ്ചകളും മാറ്റിവെച്ച്, നാളെയുടെ നന്മയ്ക്കായി ഒരു പുതിയ തുടക്കം കുറിക്കാനായി ഓരോ പുതുവർഷവും നമുക്ക് അവസരം നൽകുകയാണ്.