കശ്മീരില്‍ വെടിനിര്‍ത്തല്‍ സാധ്യമാക്കുന്നതിന് ഇന്ത്യയ്ക്കും പാകിസ്താനുമിടയില്‍ മധ്യസ്ഥത വഹിച്ച യുഎഇയുടെ നടപടിയെ പ്രകീര്‍ത്തിച്ച് പാക് വിദേശകാര്യമന്ത്രി ഷാ മഹ്മൂദ് ഖുറേഷി. യുഎഇ സന്ദര്‍ശനത്തിനിടയാണ് യുഎഇയില്‍ വെച്ച് നടന്ന ഇന്ത്യ-പാക് ചര്‍ച്ചയെ കുറിച്ചും അതില്‍ യുഎഇയുടെ മധ്യസ്ഥതയെയും കുറിച്ച് സംസാരിച്ചത്.

പതിറ്റാണ്ടുകളായി പാകിസ്താന്റെ സുഹൃത്ത് രാഷ്ട്രമായ യുഎഇയെ കുറിച്ച് തങ്ങള്‍ക്ക് വിശ്വാസമുണ്ടെന്നും ആ വിശ്വാസമാണ് ഇന്ത്യന്‍ പ്രതിനിധികളുമായുള്ള ചര്‍ച്ചയ്ക്ക് യുഎഇയുടെ മധ്യസ്ഥത തങ്ങള്‍ അംഗീകരിച്ചതെന്നും അദ്ദേഹം പറഞ്ഞു.

ഇതാദ്യമായാണ് ഇന്ത്യയുമായി യുഎഇയില്‍ വെച്ച് വെടിനിര്‍ത്തല്‍ ചര്‍ച്ചകള്‍ നടന്ന കാര്യം ഒരു പാക് ഭരണാധികാരി ശരിവയ്ക്കുന്നത്. പാകിസ്താനില്‍ നിന്നും ഇന്ത്യയില്‍ നിന്നുമുള്ള നിരവധി പേര്‍ യുഎഇയില്‍ താമസിക്കുന്നുണ്ട് എന്നതിനാല്‍ ഇരു രാജ്യങ്ങള്‍ക്കുമിടയില്‍ സമാധാനം പുലര്‍ന്നുകാണുന്നതില്‍ അവര്‍ക്കുള്ള താല്‍പര്യത്തില്‍ അല്‍ഭുതപ്പെടാനില്ല.

യുഎഇ ആയാലും മറ്റേതെങ്കിലും രാജ്യമാണെങ്കിലും മൂന്നാം കക്ഷിയുടെ മധ്യസ്ഥത പാകിസ്താന്‍ എന്നും സ്വാഗതം ചെയ്തതാണെന്നും അദ്ദേഹം പറഞ്ഞു. മൂന്ന് ദിവസത്തെ സന്ദര്‍ശനത്തിനായി യുഎഇയിലെത്തിയ പാക് വിദേശകാര്യമന്ത്രി, പക്ഷെ, യുഎഇ സന്ദര്‍ശിക്കുന്ന ഇന്ത്യന്‍ വിദേശകാര്യമന്ത്രി എസ് ജെയ്ശങ്കറുമായി കൂടിക്കാഴ്ച നടത്തിയേക്കുമെന്നുള്ള റിപ്പോര്‍ട്ടുകള്‍ നിഷേധിച്ചു.

രണ്ട് ആണവ ശക്തികള്‍ തമ്മില്‍ ആരോഗ്യകരമായ ബന്ധം പുനസ്ഥാപിക്കുന്നതിന് ഇരു രാജ്യങ്ങള്‍ക്കുമിടയില്‍ യുഎഇ മധ്യസ്ഥത വഹിക്കുന്ന കാര്യം കഴിഞ്ഞ ദിവസം യുഎഇയുടെ യുഎസ് അംബാസഡര്‍ യൂസുഫ് അല്‍ ഉതൈബയും തുറന്നു പറഞ്ഞിരുന്നു.

സ്റ്റാന്‍ഫോര്‍ഡ് യൂണിവേഴ്‌സിറ്റിയിലെ ഹൂവര്‍ ഇന്‍സ്റ്റിറ്റിയൂഷനില്‍ നടന്ന ചര്‍ച്ചയിലായിരുന്നു അദ്ദേഹം ഇക്കാര്യം വ്യക്തമാക്കിയത്. കാശ്മീരിലെ സംഘര്‍ഷത്തിന് അയവ് വരുത്താനും വെടി നിര്‍ത്തല്‍ യാഥാര്‍ഥ്യമാക്കാനുമാണ് യുഎഇയുടെ ശ്രമമെന്നും അദ്ദേഹം പറയുകയുണ്ടായി.

അടുത്ത കാലത്തായി റഷ്യയുമായും മധ്യേഷ്യന്‍ രാജ്യങ്ങളുമായും കൂടുതല്‍ അടുത്തത് പാകിസ്താന്റെ വിദേശനയത്തിലുണ്ടായ മാറ്റമാണോ എന്ന ചോദ്യത്തിന് അല്ലെന്നായിരുന്നു ഖുറേഷിയുടെ മറുപടി.

ലോകത്തെ ഏറ്റവും വലിയ സൈനിക-സാമ്പത്തിക ശക്തി അമേരിക്ക തന്നെയാണെന്നും അമേരിക്കയുടെ സഖ്യകക്ഷിയാണ് തങ്ങളെന്നും അദ്ദേഹം കൂട്ടിച്ചേര്‍ത്തു.

അതേസമയം, റഷ്യയുമായുള്ള പാകിസ്താന്റെ ബന്ധത്തില്‍ കാതലായ മഞ്ഞുരുക്കം ഉണ്ടായിട്ടുണ്ടെന്നും ഈയിടെയുണ്ടായ റഷ്യന്‍ വിദേശകാര്യമന്ത്രിയുടെ സന്ദര്‍ശനം ഇതില്‍ കാര്യമായ സംഭാവന നല്‍കിയതായും അദ്ദേഹം ചൂണ്ടിക്കാട്ടി.