അനാശാസ്യത്തിലൂടെ സമ്പാദിച്ച കള്ളപ്പണം വെളുപ്പിച്ച കേസില്‍ ഏഷ്യക്കാരനായ യുവാവിനെതിരെ ഹൈ ക്രിമിനല്‍ കോടതിയില്‍ വിചാരണ ആരംഭിച്ചു. 57,000 ദീനാറിന്റെ കള്ളപ്പണക്കേസിലാണ് നടപടി. രണ്ട് ഏഷ്യന്‍ യുവതികളുമായി ചേര്‍ന്ന് വേശ്യാലയം നടത്തിയതിന് മൂന്നു വര്‍ഷത്തെ ജയില്‍ ശിക്ഷ അനുഭവിച്ചു വരുകയാണ് ഇയാള്‍.

35കാരനായ പ്രതിക്കെതിരെ ആഭ്യന്തര മന്ത്രാലയം നടത്തിയ അന്വേഷണത്തിലാണ് 35 ഇടപാടുകളിലായി 57,000 ദീനാറിന്റെ കള്ളപ്പണം കടത്തിയതായി കണ്ടെത്തിയത്. ഇക്കാലയളവില്‍ ഇയാള്‍ക്ക് ജോലിയോ ശമ്പളമോ ഉണ്ടായിരുന്നില്ല. നേരത്തേ എടുത്ത ഒരു ബാങ്ക് വായ്പയും ഇക്കാലത്ത് ഇയാള്‍ അടച്ചു തീര്‍ത്തിരുന്നു. കള്ളപ്പണം കണ്ടെത്താതിരിക്കാന്‍ കറന്‍സിയായാണ് പണം നല്‍കിയത്.

തുടര്‍ന്ന് നടത്തിയ അന്വേഷണത്തില്‍ ഇയാള്‍ സ്വന്തം രാജ്യത്തേക്ക് വന്‍തോതില്‍ പണം കടത്തിയതായി വ്യക്തമായി. പ്രത്യേക വരുമാന സ്രോതസ്സില്ലാതിരിക്കേ കറന്‍സി വിനിമയം നടത്തിയതായും കണ്ടെത്തി. എന്നാല്‍, ആരോപണങ്ങള്‍ പ്രതി നിഷേധിച്ചു. 2005ല്‍ ബഹ്റൈനില്‍ എത്തിയ താന്‍ ആദ്യം ടെക്നീഷ്യനായും തുടര്‍ന്ന്

ഡ്രൈവറായുമാണ് ജോലി ചെയ്തതെന്നും മാസം 60 ദീനാര്‍ വീതമാണ് കുടുംബത്തിന് അയച്ചുനല്‍കിയിരുന്നതെന്നുമാണ് ഇയാള്‍ അന്വേഷണ സംഘത്തോട് പറഞ്ഞത്. മനുഷ്യക്കടത്തിലൂടെയും അനാശാസ്യ പ്രവര്‍ത്തനങ്ങളിലൂടെയും സമ്പാദിച്ച കള്ളപ്പണം വെളുപ്പിച്ചെന്ന കുറ്റം ചുമത്തിയാണ് പ്രോസിക്യൂഷന്‍ വിചാരണക്കായി കേസ് കോടതിക്ക് കൈമാറിയത്.