പാക്കിസ്ഥാനില്‍ നിന്നും ശ്രീലങ്കന്‍ മത്സ്യ ബന്ധന ബോട്ടില്‍ 260 കിലോഗ്രാം ഹെറോയിന്‍ - ഹാഷിഷ് ഓയിലും നിരോധിത '' തുറയ്യ '' സാറ്റലൈറ്റ് ഫോണും എ കെ 47 മെഷീന്‍ തോക്കുകളും വെടിയുണ്ടകളും കേരളത്തിലേക്ക് കടത്തിയ കേസില്‍ കൃത്യത്തിന് നേതൃത്വം നല്‍കിയ ഉന്നതരെ കണ്ടെത്താന്‍ ഒന്നും നാലും പ്രതികളെ കസ്റ്റഡിയില്‍ വച്ച് ചോദ്യം ചെയ്യാന്‍ അനുമതി തേടി എന്‍.ഐ.എ തലസ്ഥാനത്തെ ജില്ലാ കോടതിയില്‍ കസ്റ്റഡി അപേക്ഷ സമര്‍പ്പിച്ചു.


പ്രതികള്‍ റിവേഴ്‌സ് ക്വാറന്റയിനിലായതിനാല്‍ കസ്റ്റഡി അപേക്ഷ ജൂണ്‍ 14 ന് പരിഗണിക്കാന്‍ തിരുവനന്തപുരം ഒന്നാം അഡീഷനല്‍ ജില്ലാ സെഷന്‍സ് കോടതിയുടെ ചാര്‍ജുള്ള ജഡ്ജി മിനി. എസ് . ദാസ് ഉത്തരവിട്ടു. കപ്പല്‍ വഴി മയക്കുമരുന്നും ആയുധങ്ങളും കടത്തിയ കേസ് രാജ്യാന്തര മാനങ്ങളുള്ളതിനാലാണ് കേസ് കേരള പോലീസില്‍ നിന്ന് നാഷണല്‍ ഇന്‍വെസ്റ്റിഗേറ്റിങ് ഏജന്‍സി ഏറ്റെടുത്തത്. ചില പ്രതികള്‍ക്ക് കോവിഡ് ഫലം പോസിറ്റീവായതിനാലാണ് കസ്റ്റഡി അപേക്ഷ നീണ്ടു പോയത്.

എന്നാല്‍ ഇതിനിടെ മുഖ്യ പ്രതികളെ എന്‍ ഐ എ കോടതി അനുമതിയോടെ കസ്റ്റഡിയില്‍ വാങ്ങി ചോദ്യം ചെയ്ത് തെളിവെടുപ്പ് നടത്തി. ഇവരില്‍ നിന്ന് ലഭിച്ച വെളിപ്പെടുത്തല്‍ മൊഴികളില്‍ വ്യക്തത വരുത്താനും കൂടുതല്‍ തെളിവ് ശേഖരണത്തിനും കൃത്യത്തിന് നേതൃത്വം കൊടുത്ത ഉന്നതരെ തിരിച്ചറിഞ്ഞ് അറസ്റ്റ് ചെയ്യുന്നതിനുമായാണ് എന്‍ഐഎ കസ്റ്റഡി അപേക്ഷ സമര്‍പ്പിച്ചത്.


കേരള വിഴിഞ്ഞം കോസ്റ്റ് ഗാര്‍ഡ് പോലീസ് പിടിയിലായ ശ്രീലങ്കന്‍ പൗരന് കോസ്റ്റ് ഗാര്‍ഡ് പോലീസ് കസ്റ്റഡിയില്‍ മൂന്നാം മുറ പ്രയോഗിച്ചുള്ള കസ്റ്റഡി മര്‍ദനം ഏറ്റിരുന്നു.കോസ്റ്റ് ഗാര്‍ഡ് പട്രോളിംഗ് ബോട്ടില്‍ ഭക്ഷണം പാകം ചെയ്യാന്‍ ഉപയോഗിക്കുന്ന ഗ്യാസടുപ്പ് കത്തിച്ച് വറചട്ടിയില്‍ മലര്‍ത്തിക്കിടത്തി ദേഹമാസകലം പൊള്ളിച്ചതായി ശ്രീലങ്കന്‍ പൗരനായ പ്രതി എല്‍.വൈ. നന്ദന ജഡ്ജിക്ക് മൊഴി നല്‍കിയിരുന്നു.





പൊള്ളല്‍ പരിക്കിന്റെ കാഠിന്യത്താല്‍ തനിക്ക് ഷര്‍ട്ട് ധരിക്കാന്‍ പറ്റുന്നില്ലെന്നും യുവാവ് പരാതിപ്പെട്ടു. സംഭവം സംബന്ധിച്ച പരാതിയില്‍ കേസെടുക്കാന്‍ തിരുവനന്തപുരം അഡീ. ജില്ലാ സെഷന്‍സ് ജഡ്ജി ബിജു. കെ. മേനോന്‍ ചീഫ് ജുഡീഷ്യല്‍ മജിസ്ട്രേട്ടിനോട് ഉത്തരവിട്ടു. പൂജപ്പുര ജില്ലാ ജയിലില്‍ നിന്നും വീഡിയോ കോണ്‍ഫറന്‍സ് വഴി പ്രതിയുടെ ജുഡീഷ്യല്‍ റിമാന്റ് 14 ദിവസത്തേക്ക് ദീര്‍ഘിപ്പിക്കവേയാണ് പ്രതി പരാതിപ്പെട്ടത്. പരാതി ക്രിമിനല്‍ നടപടി ക്രമത്തിലെ വകുപ്പ് 190 പ്രകാരം കോടതി രേഖപ്പെടുത്തിക്കൊണ്ടാണ് കേസെടുക്കാന്‍ സി.ജെ.എമ്മിനോട് ജില്ലാ കോടതി ഉത്തരവിട്ടത്.



ശ്രീലങ്കയിലെ മാഹുവാവെ , കാന്‍ഡി സ്വദേശികളായ ടി. കുരാരെ (68) , ഡബ്‌ള്യു. ഫെര്‍ണാണ്ടോ (50), സി.ദേശപ്പിയ (48) , ഡബ്‌ള്യു. അരുണ്‍കുമാര്‍ (24) , സദരുവന്‍ (24) , ജയതിസ്സ എന്ന എല്‍.വൈ. നന്ദന (30) എന്നിവരാണ് കേസിലെ പ്രതികള്‍. അന്താരാഷ്ട്ര വിപണിയില്‍ മുന്നൂറ് കോടി രൂപ വിലയുള്ള മയക്കുമരുന്ന് കടത്തിയെന്നാണ് കേസ്.




2021 മാര്‍ച്ച് 5 രാവിലെ 8.45 മണിയോടെയാണ് ശ്രീലങ്കന്‍ സംഘത്തെ വിഴിഞ്ഞം തീരസംരക്ഷണസേന പോലീസ് പിടികൂടിയത്. ആകര്‍ഷദുവെ എന്ന ശ്രീലങ്കന്‍ ബോട്ടില്‍ ലഹരിമരുന്നും സാറ്റലൈറ്റ് ഫോണും എ കെ 47 മെഷീന്‍ തോക്കുകളും തിരകളുമായി കേരള അതിര്‍ത്തി കടന്ന് വരവേ മിനിക്കോയിക്ക് സമീപം വെച്ചാണ് 6 അംഗ ശലങ്കന്‍ സംഘം കോസ്റ്റ് ഗാര്‍ഡിന്റെ പിടിയിലായത്.

അഞ്ചാം തീയതി രാവിലെയാണ് കോസ്റ്റ് ഗാര്‍ഡിന്റെ ഡോണിയര്‍ വിമാനവും വരാഹ പട്രോള്‍ ബോട്ടും ചേര്‍ന്ന് സമുദ്രനിരീക്ഷണവും പട്രോളിംഗും നടത്തുന്നതിനിടെ സംശയാസ്പദമായ രീതിയില്‍ ഇന്ത്യന്‍ അതിര്‍ത്തിക്കകത്ത് കൂടി സഞ്ചരിക്കുന്ന മൂന്നു ബോട്ടുകള്‍ കണ്ടത്.




ഡോണിയര്‍ വിമാനം ശ്രദ്ധയില്‍ പെട്ട ആകര്‍ഷദുവെ ബോട്ടിന്റെ ക്യാപ്റ്റന്‍ തുറയ്യ സാറ്റലൈറ്റ് ഫോണുപയോഗിച്ച് ലഹരിക്കടത്തിന് ചുക്കാന്‍ പിടിച്ച് വിദേശത്ത് കഴിയുന്ന സഞ്ജയ് അണ എന്നയാളുമായി നടത്തിയ സംഭാഷണം പിടിച്ചെടുത്ത രഹസ്യാന്വേഷണ ഏജന്‍സികള്‍ വിഴിഞ്ഞം കോസ്റ്റ് ഗാര്‍ഡിന് വിവരം കൈമാറുകയായിരുന്നു. തുടരന്വേഷണം നര്‍ക്കോട്ടിക് കണ്‍ട്രോള്‍ ബ്യൂറോ ഏറ്റെടുത്തു.