ജീവന് വേണ്ടിയുള്ള പോരാട്ടമാണ് അഫ്ഗാനിസ്ഥാനില്‍ കാണുന്നത്. ജീവിക്കാനായി വിമാനത്തില്‍ തൂങ്ങിക്കിടന്ന് താഴെ വീണ് മരിക്കുന്ന ഹൃദയഭേരകമായ രംഗങ്ങള്‍ ഒരു വശത്ത്. മറുവശത്ത് വരാനിരിക്കുന്നത് കൊടിയ പട്ടിണിയും പീഡനവും. അതിനിടെ താലിബാന്റെ നിറതോക്കിനു മുന്നില്‍ രാജ്യം തോല്‍വി സമ്മതിച്ചപ്പോഴും ചെറുത്തുനില്‍ക്കാന്‍ ധീരത കാട്ടിയ 2 അഫ്ഗാന്‍ വനിതകളെക്കുറിച്ചാണ് ഇപ്പോള്‍ ലോകമെങ്ങും ചര്‍ച്ച. സലിമ മസാരിയും അര്യാന സയീദുമാണ് ആ യുവതികള്‍.

തങ്ങള്‍ക്കെതിരെ ആയുധമെടുത്ത വനിതാ ഗവര്‍ണറായ സലിമ മസാരിയെ പിന്നീടു താലിബാന്‍ പിടികൂടി. അവര്‍ എവിടെയുണ്ടെന്ന് വ്യക്തമായിട്ടില്ല. സലിമയെ വധിക്കുമെന്ന ആശങ്ക ശക്തമാണ്.

അഫ്ഗാനിസ്ഥാനിലെ പ്രമുഖ പോപ് ഗായികയും താലിബാന്റെ കടുത്ത വിമര്‍ശകയുമായ അര്യാന സയീദാകട്ടെ, യുഎസ് ചരക്കുവിമാനത്തില്‍ രക്ഷപ്പെട്ട് ദോഹയിലും പിന്നീടു തുര്‍ക്കിയിലുമെത്തി.

അഫ്ഗാനിസ്ഥാനിലെ 3 വനിതാ ഗവര്‍ണര്‍മാരില്‍ പ്രമുഖയായിരുന്നു സലിമ മസാരി (40). ബല്‍ക്ക് പ്രവിശ്യയിലെ ചഹര്‍കിന്റ് ജില്ലയെ സംരക്ഷിക്കാനാണ് അവര്‍ തോക്കെടുത്തത്. ഷിയ വിഭാഗത്തിലെ ഹസാര സമുദായത്തില്‍പ്പെടുന്ന സലിമയുടെ നേതൃത്വത്തില്‍ അണിനിരന്ന തദ്ദേശീയരായ പോരാളികള്‍ അവസാന നിമിഷം വരെ താലിബാനെതിരെ പൊരുതി. കാബൂളിന്റെ നിയന്ത്രണം ഏറ്റെടുത്തശേഷം താലിബാന്‍ സലിമയെ പിടികൂടിയെന്നാണു കരുതുന്നത്.



2 ലക്ഷത്തിലേറെ ജനസംഖ്യയുള്ള ജില്ലയായിരുന്നു ചഹര്‍കിന്റില്‍. യുദ്ധം സര്‍വതും നശിപ്പിച്ചു. ഇപ്പോള്‍ 30,000 പേര്‍ മാത്രം. അവിടെ ഏറ്റവും സ്വാധീനമുള്ള നേതാക്കളില്‍ ഒരാളായ സലിമ എന്നും താലിബാന്റെ കണ്ണിലെ കരടായിരുന്നു. കഴിഞ്ഞ വര്‍ഷം സലിമയുടെ ഇടപെടലിനെ തുടര്‍ന്ന് നൂറോളം താലിബാന്‍ പ്രവര്‍ത്തകര്‍ കീഴടങ്ങിയിരുന്നു.

അഫ്ഗാനില്‍ നിന്ന് ഇറാനിലേക്കു കുടിയേറിയ കുടുംബത്തിലാണു സലിമയുടെ ജനനം. ടെഹ്‌റാന്‍ സര്‍വകലാശാലയില്‍ നിന്നു ബിരുദം നേടിയ കുറെക്കാലം അവിടെ ജോലി ചെയ്തു. പിന്നീട് നാട്ടില്‍ തിരിച്ചെത്തുകയും 2018 ല്‍ ചഹര്‍കിന്റ് ജില്ലാ ഗവര്‍ണറായി ചുമതലയേല്‍ക്കുകയും ചെയ്തു. 2 വര്‍ഷം മുന്‍പ് ഗ്രാമീണരെയും ആട്ടിടയന്മാരെയും കൂട്ടി സുരക്ഷാസേന രൂപീകരിച്ചതോടെ സലിമയ്ക്കു നേരെ താലിബാന്‍ ആക്രമണം പതിവായി. കഴിഞ്ഞ മേയില്‍ ഇവിടെ ഒരു സ്‌കൂളിനു നേരെയുണ്ടായ ബോംബ് ആക്രമണത്തില്‍ 80 പേര്‍ കൊല്ലപ്പെട്ടിരുന്നു.

അഫ്ഗാനിസ്ഥാനിലെ ഏറ്റവും പ്രശസ്തയായ പോപ് താരമാണ് അര്യാന സയീദ് (36). തരംകിട്ടിയപ്പോഴെല്ലാം താലിബാനെതിരെ നിശിതവിമര്‍ശനവുമായി മാധ്യമങ്ങളെ അഭിമുഖീകരിച്ച ധീരവനിത. താലിബാന്‍ പിടികൂടുമെന്ന് ഉറപ്പായപ്പോള്‍ കഴിഞ്ഞ ബുധനാഴ്ച യുഎസ് ചരക്കു വിമാനത്തില്‍ അവര്‍ രക്ഷപ്പെടുകയായിരുന്നു.



'മറക്കാനാവാത്ത രാത്രികള്‍ക്കു ശേഷം ഞാനിതാ ജീവനോടെ ഇരിക്കുന്നു. സുരക്ഷിതമായി ദോഹയിലെത്തി. ഇസ്താംബൂളിനുള്ള ഫ്‌ലൈറ്റ് കാത്തിരിക്കയാണ്' എന്നായിരുന്നു രക്ഷപ്പെടലിന് ശേഷമുള്ള സന്ദേശം. 13 ലക്ഷത്തോളം വരുന്ന ഇന്‍സ്റ്റഗ്രാം ഫോളോവേഴ്‌സിനെയാണ് അവര്‍ ഇക്കാര്യം അറിയിച്ചത്. തുര്‍ക്കിയിലേക്കുള്ള യാത്രയുടെ തല്‍സമയ വിവരങ്ങളും പങ്കുവച്ചു. വീട്ടില്‍ എത്തിയശേഷം ലോകത്തെ അറിയിക്കാന്‍ ഒരുപാടു കഥകളുണ്ടെന്നും കുറിച്ചു.