യുക്രൈനില്‍ റഷ്യയ്ക്കുണ്ടായ നഷ്ടക്കണക്കുകള്‍ പുറത്തുവരുന്നതിനിടെ മറ്റൊരു വെളിപ്പെടുത്തല്‍ യുക്രൈനിലേക്ക് സ്റ്റാര്‍ലിങ്ക് ടെര്‍മിനലുകളയക്കാന്‍ പണം ചെലവഴിച്ചത് അമേരിക്കന്‍ ഭരണകൂടമാണെന്നുള്ള വെളിപ്പെടുത്തലാണ് ഇപ്പോള്‍ വരുന്നത്. ഇതിന് വേണ്ടി ലക്ഷക്കണക്കിന് ഡോളര്‍ യുഎസ് ചെലവഴിച്ചിട്ടുണ്ടെന്നാണ് വാഷിങ്ടണ്‍ പോസ്റ്റ് റിപ്പോര്‍ട്ട് ചെയ്യുന്നത്.

എന്നാല്‍ ഈ വാദത്തെ സ്‌പേസ് എക്‌സ് നേരത്തെ നിഷോധിച്ചിരുന്നു. യുഎസ് ഏജന്‍സി ഫോര്‍ ഇന്റര്‍നാഷണല്‍ ഡെവലപ്പ്‌മെന്റ് (യു.എസ്.എ.ഐ.ഡി.) 1,333 ടെര്‍മിനലുകള്‍ക്കായി 1,500 ഡോളര്‍ വീതം ചെലവാക്കിയിട്ടുണ്ടെന്നാണ് റിപ്പോര്‍ട്ടില്‍ പറയുന്നത്. ആകെ 20 ലക്ഷത്തോളം ഡോളര്‍ ചെലവഴിച്ചു. സ്‌പേസ് എക്‌സുമായി ചേര്‍ന്ന് പൊതുസ്വകാര്യ പങ്കാളിത്തത്തോടെ യുക്രൈന്‍ സര്‍ക്കാരിന് 5000 സ്റ്റാര്‍ലിങ്ക് ടെര്‍മിനലുകള്‍ വിതരണം ചെയ്തതായി യുഎസ്എഐഡി അടുത്തിടെ വ്യക്തമാക്കിയിരുന്നു.

സ്റ്റാര്‍ലിങ്കിന്റെ സ്റ്റാന്റേഡ് ടെര്‍മിനലുകള്‍ക്ക് 600 ഡോളറും അഡ്വാന്‍സ്ഡ് ടെര്‍മിനലുകള്‍ക്ക് 2500 ഡോളറുമാണ് ചെലവ്. ഇതില്‍ ഏതാണ് യുക്രൈനിന് നല്‍കിയതെന്ന് വ്യക്തമല്ല. ഉപഗ്രഹത്തില്‍ നിന്ന് നേരിട്ടെത്തുന്ന ഇന്റര്‍നെറ്റ് കണക്റ്റിവിറ്റി ആയതിനാല്‍ യുക്രൈനില്‍ എവിടെ നിന്നും ഇന്റര്‍നെറ്റ് ഉപയോഗിക്കാന്‍ സ്റ്റാര്‍ലിങ്ക് ടെര്‍മിനലുകള്‍ സഹായിക്കും.

റഷ്യയില്‍ നിന്നുള്ള ആക്രമണത്തെ തുടര്‍ന്ന് യുക്രൈനില്‍ പല മേഖലകളിലും ഇന്റര്‍നെറ്റ് കേബിള്‍ ശൃംഖല തകരാറിലായിട്ടുണ്ട്. ഈ സാഹചര്യത്തില്‍ സ്റ്റാര്‍ലിങ്ക് ടെര്‍മിനലുകള്‍ സര്‍ക്കാര്‍ സ്ഥാപനങ്ങള്‍ക്കും വ്യക്തികള്‍ക്കും ഗുണകരമാവും.