പാകിസ്ഥാനിലെ ഭരണാധികാരികള്‍ക്ക് ഒരു പ്രത്യേകതയുണ്ട്. കാലാവധി പൂര്‍ത്തിയാക്കാന്‍ ഭാഗ്യമില്ലാത്തവരാണ് അവര്‍. പാരമ്പര്യമായി രാജ്യത്തിന് കിട്ടിയിട്ടുള്ള ആ ദുഷ്‌പേര് എന്തായാലും ഇത്തവണും കാത്തു. പാക് പ്രധാനമന്ത്രിയായിരുന്ന ഇമ്രാന്‍ഖാന്‍ സ്ഥാനത്ത്‌നിന്ന് പടിയിറങ്ങിയിരിക്കുന്നു.

എന്നാല്‍ മറ്റ് പ്രധാനമന്ത്രിമാരും സ്വന്തമാക്കാത്ത ഒരു പേരും ഇമ്രാന്‍ ഖാന് ലഭിച്ചിട്ടുണ്ട്. നമുക്കറിയാം മുന്‍ പ്രധാനമന്ത്രിയായിരുന്ന ബാനസീര്‍ ഭൂട്ടോയെ ചാവേറുകള്‍ കൊലപ്പെടുത്തുകയാണ് ഉണ്ടായത്. നവാസ് ഷെരീഫാണെങ്കില്‍ പട്ടാള അട്ടിമറിയിലൂടെയാണ് പുറത്തുപോയത്. അതുകൊണ്ട് തന്നെ പാക് ചരിത്രത്തില്‍ ആദ്യമായി അവിശ്വാസപ്രമേയത്തിലൂടെ പുറത്തേക്ക് പോവുന്ന പ്രധാനമന്ത്രിയായി ഇമ്രാന്‍ ഖാന്‍ ഇനിമുതല്‍ അറിയപ്പെടും.

സുപ്രീം കോടതിയുടേയും സൈന്യത്തിന്റെയും നിര്‍ണായക ഇടപെടലുകളാണ് ഇമ്രാന്‍ ഖാന് തിരിച്ചടിയായത് എന്ന് വളരെ വ്യക്തമായി തന്നെ പറയാന്‍ സാധിക്കും. അതുകൊണ്ടാണ് ഖാന്റെ എല്ലാ തന്ത്രങ്ങളും പാളിയത്. സ്ഥാനത്ത് നിന്ന് പുറത്തുപോകാതിരിക്കാന്‍ കുറെ നാടകങ്ങളാണ് അദ്ദേഹത്തിന്റെ നേതൃത്വത്തില്‍ കളിച്ചത്. ഭരണകക്ഷി അംഗങ്ങള്‍ വോട്ടെടുപ്പില്‍ നിന്ന് വിട്ടുനിന്നു.

വോട്ടെടുപ്പിന് മുമ്പ് സ്പീക്കറും ഡെപ്യൂട്ടി സ്പീക്കറും രാജിവെച്ചു. എന്നിട്ടൊന്നും കാര്യമുണ്ടായില്ല. നേരത്തെ പാക് നാഷണല്‍ അസംബ്ലിയില്‍ പങ്കെടുക്കാതെ ഒളിച്ചു കഴിഞ്ഞെങ്കിലും സുപ്രീംകോടതിയുടെ നിര്‍ണായക ഇടപെടലിനെ തുടര്‍ന്നാണ് വോട്ടെടുപ്പ് നടത്താന്‍ സര്‍ക്കാര്‍ നിര്‍ബന്ധിതരായത്.

ഇനി കഴിഞ്ഞ രാത്രിയില്‍ നടന്ന ചില നാടകീയ സംഭവങ്ങള്‍ ഒന്ന് നോക്കാം..

അവിശ്വാസ പ്രമേയ നടപടികള്‍ക്കായി ഇന്നലെ രാവിലെയാണ് പാര്‍ലമെന്റ് ചേര്‍ന്നത്, എങ്കിലും വോട്ടെടുപ്പു നടത്താതെ സമ്മേളനം രാത്രി വരെ നീട്ടി. രാത്രി 9നു ചേര്‍ന്ന അടിയന്തര മന്ത്രിസഭാ യോഗം ഇമ്രാന്‍ ഖാന്‍ രാജിവയ്‌ക്കേണ്ടതില്ലെന്ന തീരുമാനമെടുത്തു പിരിഞ്ഞു. അതിനിടെ, സേനാ മേധാവി ഖമര്‍ ജാവേദ് ബജ്വ ഇമ്രാനുമായി കൂടിക്കാഴ്ച നടത്തി.

തുടര്‍ന്ന് പാര്‍ലമെന്റിനു പുറത്ത് സൈനികവ്യൂഹം നിരന്നു.വോട്ടെടുപ്പിനു സഭാ സ്പീക്കര്‍ അനുവദിക്കാത്തതിനെത്തുടര്‍ന്ന് സുപ്രീം കോടതി ചീഫ് ജസ്റ്റിസ് ഉമര്‍ ബന്ദ്യാല്‍ അര്‍ധരാത്രി പ്രത്യേക സിറ്റിങ്ങിനു കോടതി തുറക്കാന്‍ നിര്‍ദ്ദേശം നല്‍കി.

എന്നാല്‍ വോട്ടെടുപ്പ് വൈകിയതും സര്‍ക്കാരിനെതിരെയുള്ള ആയുധമാക്കി മാറ്റാന്‍ പ്രതിപക്ഷം ശ്രമിച്ചിരുന്നു. ഇമ്രാന്‍ നടത്തുന്ന അവസാനത്തെ കള്ളക്കളിയുടെ ഫലമായാണ് വോട്ടെടുപ്പ് വൈകിക്കുന്നതെന്നായിരുന്നു അവര്‍ ആരോപിച്ചിരുന്നത്. സത്യത്തില്‍ സമയം വൈകിപ്പിച്ച് വോട്ടെടുപ്പ് നീട്ടിവെക്കാന്‍ തന്നെയായിരുന്നു ഇമ്രന്‍ാഖാന്റെ പ്ലാന്‍. എന്നാല്‍ അതും പാളി.

അഴിമതിക്കാരുടെ ശല്യത്തില്‍ പൊറുതിമുട്ടിയ പാകിസ്ഥാനികള്‍ക്ക് ഇമ്രാന്റെ വരവ് ഒരു ആശ്വാസമായിരുന്നു. അധികാരത്തിലേറുമ്പോള്‍ അഴിമതിമുക്ത പാകിസ്ഥാന്‍ അണ് തന്റെ ലക്ഷ്ം എന്നായിരുന്നു ഖാന്‍ പറഞ്ഞിരുന്നത്. അനക്കമില്ലാതെ കിടന്നിരുന്ന പാക് ക്രിക്കറ്റ് ടീമിനെ ആന്താരാഷ്ട്ര തലത്തില്‍ എത്തിച്ച് ലോക ചാമ്പ്യന്മാരാക്കിയ ഖാന്റ ആ നേതൃപാടവം മുന്നില്‍ കണ്ടാണ് ജനങ്ങള്‍ ഇമ്രാനെ തങ്ങുടെ ദൈവമായി കരുതിയിരുന്നത്.

എന്നാല്‍ ജനങ്ങളുടെ സ്വപ്‌നങ്ങള്‍ സഫലമാക്കാന്‍ ഖാന് കഴിഞ്ഞില്ല എന്നുള്ളതാണ് പിന്നീടുളഅള ദിവസങ്ങളില്‍ നമ്മള്‍ കണ്ടത്. പ്രധാനമന്ത്രിയുടെ അധികാരം ഉപയോഗിച്ച് ഖാന്‍ കാണിച്ചുകൂട്ടിയ കാര്യങ്ങള്‍ അദ്ദേഹത്തിന് തന്നെ വിനയായി മാറി. ജനപ്രീതി കുറഞ്ഞു, വിവാദങ്ങള്‍ തലപൊക്കി.

പാകിസ്ഥാനില്‍ സ്ത്രീകള്‍ നേരിടുന്ന പ്രശ്‌നങ്ങൡ പ്രതികണങ്ങള്‍ നടത്താതെ കുറ്റവാളികളെ സംരക്ഷിക്കുന്നു എന്നുള്ള ചീത്തപ്പേരും ഖാന്‍ സ്വന്തമാക്കിയിട്ടുണ്ട്. മാത്രമല്ല പടിറക്കിത്തിന് ദിവസങ്ങള്‍ മാത്രം ബാക്കി നില്‍ക്കുമ്പോള്‍ ഫറ ഖാന്‍ എന്ന പാക് സുന്ദരി 90,000 ഡോളറുമായി മുങ്ങിയിരിക്കുന്നു എന്ന വാര്‍ത്തയും പുറത്ത് വരുന്നിരുന്നു. ശ്രദ്ധിക്കണം അഴിമതി വിമുക്ത പാകിസ്ഥാന്‍ എന്ന ഖാന്റെ വാഗ്ദാനങ്ങളെ പൊളിച്ചടുക്കിയാണ് ഈ പാക് സുന്ദരി രാജ്യം വിട്ടത്.പ്രതിപക്ഷം അഴിമതിയുടെ മാതാവ് എന്ന് വിശേഷിപ്പിക്കുന്ന ഫറ ഇമ്രാന്‍ഖാന്റെ ഭാര്യയുടെ സുഹൃത്താണ് എന്നുള്ളതാണ് മറ്റൊരു ഞെട്ടിക്കുന്ന സംഭവം. ഇതെല്ലാം തന്നെ ജനപ്രീതിയിലില്‍ വന്‍ ഇടിവുണ്ടാക്കാന്‍ കാരണമായിട്ടുണ്ട്. സൈന്യത്തിന്റെ അപ്രീതിക്കൊപ്പം ഇമ്രാന്‍ഖാന് തിരിച്ചടിയായി.

കഴിഞ്ഞ കുറച്ച് കാലമായി ഖാന്റെ ധാര്‍ഷ്ട്യ സ്വഭാവം ജനപ്രീതി കുറയാന്‍ ഇടയാക്കിയിട്ടുണ്ട്. കൂടാതെ കടക്കെണിയും വിലക്കയറ്റവും രൂക്ഷമായിരിക്കുകയുമാണ്. ഇപ്പോള്‍ പാകിസ്ഥാന്റെ അവസ്ഥ ഏതാണ്ട് ശ്രീലങ്കക്ക് തുല്യമായിട്ടുണ്ടെന്ന് നിസ്സംശയം പറയാന്‍ സാധക്കും. ഇമ്രാന്‍ ഖാന്‍ അധികാരത്തിലെത്തിയ ശേഷമാണ് രൂപയുടെ മൂല്യം ഇടിഞ്ഞതെന്നുള്ള ആരോപണം നേരത്തെ ഉയര്‍ന്നിരുന്നു. ചെറിയ രാജ്യങ്ങളില്‍ നിന്ന് പോലും ഇപ്പോള്‍ കടം വാങ്ങിക്കേണ്ട അവസ്ഥയാണ് പാകിസ്ഥാന്.

ഇതിനെല്ലാം പുറമെ പട്ടാളവുമായുള്ള ഖാന്റെ പിണക്കവും അദ്ദേഹത്തിന്റെ നിലനില്‍പ്പിനെ സാരമായി ബാധിച്ചിട്ടുണ്ട്. ഇവിടെ നമ്മള്‍ ശ്രദ്ദിക്കേണ്ട ഒരു കാര്യം ഭരണം നടത്തുന്നത് പ്രധാനമന്ത്രിയാണെങ്കിലും വിദേശ നയങ്ങളിലും പ്രതിരോധ മേഖലയിലും നിര്‍ണായക തീരുമാനങ്ങള്‍ സ്വീകരിക്കുന്നത് പട്ടാളമാണ് എന്നുള്ളതാണ്.

പാകിസ്ഥാനെ സംബന്ധിച്ചിടത്തോളം ഇതൊരു കീഴ്‌വഴക്കവുമാണ്. മാത്രമല്ല ഇപ്പോള്‍ ഇമ്രാന്‍ ഖാന്റെ ശത്രുവായി പട്ടാളം മാറുമ്പോള്‍ ശ്രദ്ദിക്കേണ്ടത്, അപ്പുറത്ത് നവാസ് ഷെരീഫിനുള്ള വാതില്‍ തുറന്നു എന്നുതന്നെയാണ്. കാരണം പട്ടാളവുമായുള്ള നല്ല ബന്ധം കാരണം മൂന്നുതവണയായി ഒമ്പത് വര്‍ഷം അദ്ദേഹത്തിന് പാകിസ്ഥാന്റെ തലവനായിരിക്കാന്‍ സാധിച്ചു.

എന്തായാലും പ്രധാനമന്ത്രി കസേര തെറിച്ചതിന് പിന്നാലെ ഖാന്‍ വീട്ടുതടങ്കലില്‍ ആണെന്നാണ് പുറത്തുവരുന്ന വാര്‍ത്തകള്‍. മാത്രമല്ല അദ്ദേഹത്തിന് പാകിസ്ഥാനില്‍ ഇനി രാഷ്ട്രീയ ഭാവി ഉണ്ടോ എന്നത് സംശയമുള്ള കാര്യമാണ്. കൂടാതെ ഇടക്കാല പ്രധാനമന്ത്രിയായി ഷഹബാസ് തുടരുമെന്നാണ് സൂചനകള്‍.