ഏറെ നാളത്തെ നാടകീയ നീക്കങ്ങള്‍ക്കൊടുവില്‍ പാക്കിസ്ഥാന്‍ പ്രധാനമന്ത്രി സ്ഥാനത്ത് നിന്നും ഇമ്രാന്‍ ഖാന്‍ പുറത്തായിരിക്കുന്നു. അര്‍ദ്ധ രാത്രി വരെ നീണ്ട ആ ചരിത്രപരമായ പുറത്താക്കല്‍ അര്‍ത്ഥരാത്രിയിലും ഇമ്രാന്‍ അനുകൂലികള്‍ വേദനയോടെയും മറ്റളുള്ളവര്‍ ആകാംശയോടെയുമാണ് നോക്കിക്കണ്ടു. ദേശീയ അസംബ്ലിയില്‍ പ്രതിപക്ഷം കൊണ്ടുവന്ന അവിശ്വാസ പ്രമേയം പാസ്സായതോടെ ഇമ്രാന്‍ ഖാന് പുറത്തുപോവുകയല്ലാതെ വേറെ നിവര്‍ത്തിയില്ലാതായി. രാത്രി പന്ത്രണ്ടേ മുക്കാലോടെയാണ് സഭയില്‍ ഇമ്രാന്‍ സര്‍ക്കാരിനെതിരായ പ്രമേയം പാസാകുന്നത്. ഭരണകക്ഷി അംഗങ്ങള്‍ വിട്ടു നിന്ന വോട്ടെടുപ്പില്‍ 174 വോട്ടുകള്‍ക്കാണ് അവിശ്വാസ പ്രമേയം പാസായത്.

അവസാന അടവായി ഇന്ത്യയെ വാനോളം പുകഴ്തിയിട്ടും ഇമ്രാനുവേണ്ടി ബാഹ്യമായ ഒരിടപെടലും ഇന്ത്യ നടത്തിയില്ല.. കാരണം കശ്മീരിനെ തൊട്ടുള്ള കളി തീക്കളിയാണെന്ന് ഇമ്രാന്‍ അണിയണം എന്നതുകൊണ്ടു കൂടിയാകാം.. എന്തായാലും ആ നാണക്കേട് ജീവിതകാലം മുഴുവനും ഇമ്രാനെ വേട്ടയാടും വിശ്വാസ വോട്ടെടുപ്പില്‍ തോറ്റ് പുറത്താകുന്ന ആദ്യ പാക് പ്രധാനമന്ത്രി എന്ന നാണക്കേട്. വോട്ടെടുപ്പിന് മുന്‍പ് തന്നെ സ്പീക്കറും, ഡപ്യൂട്ടി സ്പീക്കറും രാജിവെച്ചിരുന്നു. ഇമ്രാനെതിരായ നടപടി കൊള്ളക്കാരുടെ തിരിച്ചുവരവെന്നായിരുന്നു ഇമ്രാന്റെ ഉറ്റ അനുയായിയായ ഫവാദ് ചൗധരിയുടെ ട്വീറ്റ്. പ്രതിഷേധവും കലാപവും ഉണ്ടാകാനുള്ള സാധ്യത കണക്കിലെടുത്ത് സുരക്ഷയൊരുക്കാന്‍ വന്‍ സൈനിക വ്യൂഹമാണ് അസംബ്ലിക്ക് പുറത്ത് വിന്യസിച്ചത്. പക്ഷേ പേരിനുവേണ്ടി പാട്ടിക്കാരല്ലാതെ ഇമ്രാനുവേണ്ടി ശബ്ദമുയര്‍ത്താന്‍ അവിടുത്തെ ജനങ്ങള്‍ ഇറങ്ങിയതുപോലും ഇല്ല.

അതേസമയം അവിശ്വാസ വോട്ടെടുപ്പില്‍ പരാജയപ്പെടുന്നതിന് മുമ്പുതന്നെ അദ്ദേഹം പാക് പ്രധാനമന്ത്രിയുടെ ഔദ്യോഗിക വസതി ഒഴിഞ്ഞിരുന്നു. അവിശ്വാസ പ്രമേയം പാസായതിന് പിന്നാലെ ദേശീയ അസംബ്ലിയില്‍ ഉണ്ടായിരുന്ന പ്രതിപക്ഷ പാര്‍ട്ടി നേതാക്കള്‍ പിഎംഎല്‍എന്‍ നേതാവും പാക് മുന്‍ പ്രധാനമന്ത്രി നവാസ് ഷെരീഫിന്റെ സഹോദരനുമായ ഷെഹ്ബാസ് ഷെരീഫിനെ അഭിനന്ദിക്കാന്‍ തിരക്കുകൂട്ടി. ഷെഹ്ബാസ് ഷെരീഫ് തന്നെയാകും അടുത്ത പ്രധാനമന്ത്രി എന്നാണ് റിപ്പോര്‍ട്ടുകള്‍.

പാകിസ്താനിലെ പുതിയ സര്‍ക്കാര്‍ പ്രതികാര രാഷ്ട്രീയം കളിക്കില്ലെന്നും പിഎംഎല്‍എന്‍ വ്യക്തമാക്കിയിട്ടുണ്ട്. മുന്‍പ് നടന്ന കയ്‌പ്പേറിയ സംഭവങ്ങള്‍ ആവര്‍ത്തിക്കാന്‍ ആഗ്രഹിക്കുന്നില്ലെന്ന് അവിശ്വാസ പ്രമേയം പാസായതിന് പിന്നാലെ ഷെഹ്ബാസ് ഷെരീഫ് പറഞ്ഞത്. ഇമ്രാന് വലിയ ആശ്വാസമാകുകയാണ്. 'പഴയതെല്ലാം മറന്ന് മുന്നോട്ടു പോകാനാണ് ആഗ്രഹിക്കുന്നത്. ആരോടും അനീതി കാട്ടുകയോ, പ്രതികാരം ചെയ്യുകയോ ഇല്ല. ഒരു കാരണവും ഇല്ലാതെ ആരെയും ജയിലില്‍ അടയ്ക്കില്ല. നിയമവും നീതിയും അതിന്റെ വഴിയ്ക്ക് പോകും' ഷെഹ്ബാസ് പറഞ്ഞു. അവിശ്വാസ പ്രമേയം പാസാക്കിയ ദേശീയ അസംബ്ലിയെ പാകിസ്താന്‍ പീപ്പിള്‍സ് പാര്‍ട്ടി (പി.പി.പി) നേതാവ് ബിലാവല്‍ ഭൂട്ടോയും അഭിനന്ദിച്ചു. അതിനിടെ ഇമ്രാന്റെ പാര്‍ട്ടിയായ പാകിസ്താന്‍ തെഹ്‌രീക് ഇ ഇന്‍സാഫ് (പിടിഐ) പ്രവര്‍ത്തകര്‍ അസംബ്ലിക്ക് പുറത്ത് പ്രതിഷേധ പ്രകടനം നടത്തി.

മാര്‍ച്ച് എട്ടിന് ഷെഹ്ബാസ് ഷെരീഫാണ് പാക് ദേശീയ അസംബ്ലിയില്‍ ഇമ്രാന്‍ ഖാനെതിരെ അവിശ്വാസ പ്രമേയം കൊണ്ടുവരുന്നത്. അഴിമതി, സാമ്പത്തിക രംഗത്തെ പ്രശ്‌നങ്ങള്‍ എന്നിവയുടെ പശ്ചാത്തലത്തിലാണ് നീക്കമെന്ന് പ്രതിപക്ഷം അവകാശപ്പെട്ടിരുന്നു. എന്നാല്‍ വിദേശ ഗൂഢാലോചനയുടെ ഭാഗമായാണ് തനിക്കെതിരായ നീക്കമെന്നാണ് ഇമ്രാന്‍ ഖാന്‍ ആരോപിച്ചത്. അമേരിക്കയ്‌ക്കെതിരെ അദ്ദേഹം വിരല്‍ചൂണ്ടുകയും ചെയ്തിരുന്നു. ഏപ്രില്‍ മൂന്നിനാണ് അവിശ്വാസ പ്രമേയത്തിന്മേല്‍ വോട്ടെടുപ്പ് നടത്താന്‍ ആദ്യം നിശ്ചയിച്ചിരുന്നത്. എന്നാല്‍ ദേശീയ അസംബ്ലിയിലെ ഡെപ്യൂട്ടി സ്പീക്കര്‍ ഇതിനോട് വിയോജിച്ചു. പിന്നാലെ ദേശീയ അസംബ്ലി പിരിച്ചുവിടാനും രാജ്യത്ത് തിരഞ്ഞെടുപ്പ് നടത്താനും ഇമ്രാന്‍ ഖാന്‍ പാക് പ്രസിഡന്റിനോട് നിര്‍ദ്ദേശിച്ചു. എന്നാല്‍ അവിശ്വാസ പ്രമേയത്തിന്മേല്‍ ഏപ്രില്‍ ഒന്‍പതിന് വോട്ടെടുപ്പ് നടത്താന്‍ പാക് സുപ്രീം കോടതി നിര്‍ദ്ദേശിക്കുകയായിരുന്നു.