അഫ്ഗാനിസ്ഥാനില്‍ വന്‍ ഭൂചലനം. 250ല്‍ കൂടുതല്‍ ആളുകള്‍ കൊല്ലപ്പെട്ടു എന്നാണ് ലഭിക്കുന്ന വിവരം. അഫ്ഗാനിസ്ഥാന്റെയും പാക്കിസ്ഥാന്റെയും ജനസാന്ദ്രതയേറിയ ചില ഭാഗങ്ങളിലാണ് ബുധനാഴ്ച പുലര്‍ച്ചെ 1.54ന് റിക്ടര്‍ സ്‌കെയിലില്‍ 6.1 തീവ്രത രേഖപ്പെടുത്തിയ ഭൂചലനം ഉണ്ടായത്. മരണസംഖ്യ ഇനിയും വര്‍ധിക്കാന്‍ സാധ്യതയുണ്ടെന്നാണ് വിവരം.

തെക്കുകിഴക്കന്‍ അഫ്ഗാനിസ്ഥാനിലെ ഖോസ്റ്റ് നഗരത്തില്‍ നിന്ന് 44 കിലോമീറ്റര്‍ താഴ്ചയിലാണ് ഭൂചലനം ഉണ്ടായത് എന്നാണ് യുഎസ് ജിയോളജിക്കല്‍ സര്‍വേ പറയുന്നത്.

പാകിസ്ഥാന്റേയും, ഇന്ത്യയുടേയും അഫ്ഗിനിസ്ഥാനോട് ചേര്‍ന്ന 500 കിലോമീറ്ററോളം ദൂരം കുലുക്കം അനുഭവപ്പെട്ടതായി യൂറോപ്യന്‍ മെഡിറ്ററേനിയന്‍ സീസ്‌മോളജിക്കല്‍ സെന്റര്‍ ട്വീറ്ററിലൂടെ പറഞ്ഞു. അഫ്ഗാനിസ്ഥാന്റെ തലസ്ഥാനമായ കാബൂളിലും പാക്കിസ്ഥാന്റെ തലസ്ഥാനമായ ഇസ്ലാമാബാദിലും ഭൂകമ്പത്തിന്റെ തീവ്രത നന്നായി ഉണ്ടായി എന്നാണ് ഇഎംഎസ്‌സി വെബ്‌സൈറ്റ് നല്‍കുന്ന വിവരം.

അഫ്ഗാനിസ്ഥാനില്‍ വലിയ നാശനഷ്ടമാണ് റിപ്പോര്‍ട്ട് ചെയ്തതെങ്കിലും പാകിസ്ഥാനില്‍ വലിയ നാശനഷ്ടങ്ങളൊന്നും ഉണ്ടായിട്ടില്ല എന്നാണ് അന്താരാഷ്ട്ര മാധ്യമങ്ങള്‍ നല്‍കുന്ന വിവരം.

പെഷവാര്‍, ഇസ്ലാമാബാദ്, ലാഹോര്‍, പഞ്ചാബിന്റെ മറ്റ് ഭാഗങ്ങള്‍ എന്നിവിടങ്ങളിലും ഖൈബര്‍പഖ്തൂണ്‍ഖ്വ പ്രവിശ്യകളിലും ഭൂചലനം അനുഭവപ്പെട്ടു. എന്നാല്‍ ഇവിടെ ഇതുവരെ ആളപായമോ മറ്റ് നാശമഷ്ടങ്ങളോ റിപ്പോര്‍ട്ട് ചെയ്തിട്ടില്ല.

പാകിസ്ഥാനില്‍ അടിക്കടി ഭൂകമ്പങ്ങള്‍ ഉണ്ടാകാറുണ്ട്. വലിയതും ചെറിയതുമായ നിരവധി ഭൂകമ്പങ്ങള്‍ പലപ്പോഴും റിപ്പോര്‍ട്ട് ചെയ്യാറുണ്ട്. ജൂണ്‍ 17 ന് രാജ്യത്തിന്റെ വിവിധ ഭാഗങ്ങളില്‍ 5.2 തീവ്രത രേഖപ്പെടുത്തിയ ഭൂചലനം ഉണ്ടായിട്ടുണ്ട്. ശേഷം ഒരാഴ്ചയ്ക്കിടെ ഉണ്ടാകുന്ന രണ്ടാമത്തെ ഭൂചലനമാണിത് . 2005ല്‍ 74,000ത്തിലധികം ആളുകള്‍ കൊല്ലപ്പെട്ട ഒരു മാരകമായ ഭൂകമ്പം പാകിസ്ഥാനില്‍ ഉണ്ടായിട്ടുണ്ട്.

എന്തായാലും അഫ്ഗാനിസ്ഥാനില്‍ ഇനിയും മരണസംഖ്യ വര്‍ധിക്കുമെന്നാണ് സൂചന...