യുദ്ധമുഖത്ത് പുത്തന്‍ തന്ത്രങ്ങളുമായി യുക്രൈന്‍ അനുകൂല സംഘടനകള്‍. യുദ്ധത്തിനാവശ്യമായ ആയുധങ്ങള്‍ വാങ്ങുന്നതിനാണ് യുക്രെയ്ന്‍ സേനയ്‌ക്കൊപ്പം പോരാട്ടത്തിലുറച്ചുനില്‍ക്കുന്ന പൗരന്മാര്‍ പുതിയ തന്ത്രവുമായി രംഗത്തിറങ്ങിയിരിക്കുന്നത്. അതായത് യുദ്ധഫണ്ടിലേക്ക് 40 ഡോളര്‍ സംഭാവന ചെയ്യുകയാണെങ്കില്‍. റഷ്യ തൊടുത്ത ആര്‍ട്ടിലറി ഷെല്ലിലോ പൊട്ടിച്ചിതറിയ ഗ്രനേഡ് പാളിയിലോ തകര്‍ന്ന യുദ്ധ ടാങ്കുകളുടെ ലോഹത്തകിടിലോ നിങ്ങള്‍ ആവശ്യപ്പെടുന്ന സന്ദേശം പതിച്ചു കൈമാറും എന്നാണ് വ്യവസ്ഥ.

മാത്രമല്ല നാലക്കമുള്ള തുക സംഭാവന ചെയ്താല്‍ തകര്‍ന്നുവീണ റഷ്യന്‍ ഹെലികോപ്റ്റര്‍ പാളിയിലോ ഫൈറ്റര്‍ ജെറ്റിന്റെ തകിടിലോ സന്ദേശമെഴുതി തരുമത്രേ. യൂറോപ്യന്‍ യൂണിയന്റെ സഹകരണം ലഭിക്കുമെന്നു പ്രതീക്ഷയിലിരിക്കുന്ന യുക്രെയ്‌നിന്റെ പ്രതിരോധ രംഗത്ത് കഴിയുംവിധം സഹായമെത്തിക്കുകയാണ് ഇവരുടെ ലക്ഷ്യം. വെബ് സൈറ്റുകളിലും ടെലഗ്രാം പോലെയുള്ള മെസേജിങ് ആപ്പുകളിലുമെല്ലാം യുദ്ധഫണ്ട് സമാഹരണത്തിനായി യുക്രെയ്ന്‍ പൗരന്മാര്‍ വിവിധ പരിപാടികള്‍ നടത്തുന്നുമുണ്ട്. യുദ്ധരംഗത്തുള്ള സൈനികര്‍ക്ക് വേണ്ട ആയുധമുള്‍പ്പെടെയുള്ളവ വാങ്ങാന്‍ ഈ ഫണ്ട് ഉപയോഗിക്കുന്നതാണ് രീതി

താരതമ്യേന ദുര്‍ബലരെന്നു ലോകം വിലയിരുത്തിയ യുക്രെയ്ന്‍ യുദ്ധത്തിന്റെ നവീന സാധ്യതകളാണ് നിലവില്‍ പ്രതിരോധത്തിന് ഉപയോഗിക്കുന്നത്. റഷ്യന്‍ ബ്ലാക് സീ ഫ്‌ലീറ്റിലുണ്ടായ മോസ്‌കാവ എന്ന യുദ്ധക്കപ്പല്‍ കപ്പല്‍വേധ മിസൈന്‍ ഉപയോഗിച്ച് യുക്രെയ്ന്‍ തകര്‍ത്തത് രാജ്യാന്തര തലത്തില്‍ തന്നെ വലിയ വാര്‍ത്തയായി. രണ്ടാം ലോക മഹായുദ്ധത്തിനു ശേഷം ആദ്യമായാണ് റഷ്യയ്ക്ക് യുദ്ധക്കപ്പല്‍ ഇത്തരത്തില്‍ നഷ്ടമാകുന്നത്. ഡ്രോണുകളുടെ സൂക്ഷ്മമായ ഉപയോഗം, ആര്‍ട്ടിലറിയുടെയും ടാങ്കുകളുടെയും കണിശമായ ഉപയോഗം തുടങ്ങി പല മേഖലകളിലും പ്രതിരോധത്തിന്റെ പുത്തന്‍ രീതികള്‍ തീര്‍ത്ത യുക്രെയ്ന്‍ പക്ഷേ റഷ്യയെ മാനസികമായി തകര്‍ത്തത് മറ്റൊരു രീതിയിലാണെന്നു വിദഗ്ധര്‍ വിലയിരുത്തുന്നു. യുക്രെയ്‌നിലെ യുദ്ധരംഗത്തു നിന്ന് തുടര്‍ച്ചയായി യുദ്ധദൃശ്യങ്ങള്‍ സേന മൊബൈല്‍ ഫോണില്‍ ചിത്രീകരിച്ച് സമൂഹമാധ്യമങ്ങളിലൂടെ പ്രചരിപ്പിക്കുകയാണ്. കരുത്തരായ റഷ്യയുടെ ഫൈറ്റര്‍ ജെറ്റുകള്‍ തകര്‍ക്കുന്നതും ഒറ്റപ്പെട്ടു പോയ റഷ്യന്‍ സൈനികനെ യുക്രെയ്ന്‍ ഡ്രോണ്‍ പിന്തുടര്‍ന്നു തുരത്തുന്നതും ഹെലികോപ്റ്ററും റഷ്യയുടെ അചഞ്ചലമായ ടാങ്കുകള്‍ നിഷ്പ്രഭമാകുന്നതുമെല്ലാം ഇന്നു സമൂഹമാധ്യമങ്ങളില്‍ തരംഗമാണ്. ഈ അപമാനം റഷ്യ പോലെയൊരു രാജ്യത്തിന് താങ്ങാനാവുന്നതിലും അപ്പുറമാണെന്നാണ് വിലയിരുത്തല്‍. വിവിധ രാജ്യങ്ങള്‍ക്ക് ആയുധങ്ങള്‍ വില്‍പന നടത്തുന്ന റഷ്യയ്ക്ക് ലഭിക്കാവുന്ന ഏറ്റവും വലിയ തിരിച്ചടി ഇതാണെന്ന് സമൂഹമാധ്യമങ്ങളില്‍ പ്രചാരണവുമുണ്ട്.

റഷ്യ പോലൊരു സാമ്പത്തിക ശക്തിയോട് പോരടിക്കുന്ന യുക്രെയ്ന്‍ യുദ്ധ ഫണ്ട് സമാഹരണത്തിനും നവീന രീതികള്‍ അവലംബിച്ചിരിക്കുന്നത് ലോകത്തെ തന്നെ ഞെട്ടിച്ചിരിക്കുകയാണ്. യുദ്ധ ഫണ്ടിലേക്ക് ഏത് രാജ്യത്തിരുന്ന് ആര്‍ക്കുവേണമെങ്കിലും സംഭാവന ചെയ്യാം. ഇതിനു വേണ്ട അനുമതി യുഎസിന്റെ അനുമതിയോടെ വിവിധ സമൂഹമാധ്യമ സ്ഥാപനങ്ങള്‍ ചെയ്തു നല്‍കുകയും ചെയ്തു. യുദ്ധഫണ്ട് സമാഹരിക്കാന്‍ പ്രത്യേക അക്കൗണ്ട് ആരംഭിച്ച യുക്രെയ്ന്‍, ഈ അക്കൗണ്ട് ഗൂഗിള്‍ പേയിലേക്ക് ലിങ്ക് ചെയ്യുകയും ചെയ്തു. യുക്രെയന്‍ സെന്‍ട്രല്‍ ബാങ്കില്‍ ആരംഭിച്ചിരിക്കുന്ന ഈ അക്കൗണ്ടിലേക്ക് ഏതു രാജ്യക്കാര്‍ക്കും നേരിട്ട് പണം അയക്കാം. യുഎസ് ഡോളര്‍, പൗണ്ട്, യൂറോ തുടങ്ങിയ കറന്‍സികളിലാണ് പണമയക്കാന്‍ കഴിയുക.