സമാധാന ശ്രമങ്ങള്‍ക്കും ഭീഷണികള്‍ക്കും വഴങ്ങാതെ ആക്രമണം തുടരുന്നു. ഗാസ മുനമ്പില്‍ ഇസ്രയേല്‍ നടത്തിയ ബോംബാക്രമണത്തില്‍ 31 പേര്‍ കൊല്ലപ്പെട്ടു. ഇതില്‍ പകുതിയിലേറെ മരണവും ബെയ്ത്ത് ലാഹിയ, ജബാലിയ എന്നിവിടങ്ങളിലെ അഭയാര്‍ഥിക്യാംപുകളിലാണ്. ഖാന്‍ യൂനിസില്‍ വ്യോമാക്രമണത്തില്‍ 7 പേര്‍ കൊല്ലപ്പെട്ടു.

പോളിയോ വാക്‌സിനേഷന്‍ നടക്കുന്നതിനിടെ ഗാസയിലെ ക്ലിനിക്കിനുനേരെ ഇസ്രയേല്‍ നടത്തിയ ഡ്രോണ്‍ ആക്രമണത്തില്‍ 4 കുട്ടികള്‍ ഉള്‍പ്പെടെ 6 പേര്‍ക്കു പരുക്കേറ്റു. ഗാസയില്‍ വാക്‌സിനേഷനു നേതൃത്വം നല്‍കുന്ന യുഎന്‍ ഏജന്‍സിയായ യുനിസെഫ് ആക്രമണത്തില്‍ നടുക്കം രേഖപ്പെടുത്തി. വാക്‌സിനേഷനു വേണ്ടി രാവിലെ 6 മുതല്‍ വൈകിട്ടു 4 വരെ ആക്രമണം ഒഴിവാക്കുമെന്ന ധാരണ ലംഘിക്കപ്പെട്ടതായും ആരോപിച്ചു.

എന്നാല്‍, ഇസ്രയേല്‍ ഇതു നിഷേധിച്ചു. തെക്കന്‍ ലബനനിലും ഇസ്രയേല്‍ ആക്രമണം തുടരുകയാണ്. ഹിസ്ബുല്ല റോക്കറ്റ് യൂണിറ്റ് കമാന്‍ഡര്‍ ജാഫര്‍ ഖാദര്‍ ഫൗറിനെ വധിച്ചതായി ഇസ്രയേല്‍ സൈന്യം അറിയിച്ചു.ഗാസയില്‍ ഇതുവരെ 43,341 പലസ്തീന്‍കാരാണു കൊല്ലപ്പെട്ടത്. 1,02,105 പേര്‍ക്കു പരുക്കേറ്റു.

അതേസമയം ഇസ്രയേലിലെ ഷാരോണ്‍ മേഖലയിലെ അറബ് നഗരമായ ടിറയില്‍ ഹിസ്ബുല്ലയുടെ റോക്കറ്റ് ആക്രമണം നടന്നു. ജനവാസമേഖലയിലെ കെട്ടിടത്തിന് നേരെയുണ്ടായ റോക്കറ്റ് ആക്രമണത്തില്‍ 19 പേര്‍ക്ക് പരുക്കേറ്റു. ലബനനില്‍ നിന്നാണ് മധ്യ ഇസ്രയേലിനെ ലക്ഷ്യമാക്കി മൂന്നു റോക്കറ്റുകള്‍ വന്ന് പതിച്ചതെന്ന് ഐഡിഎഫ് അറിയിച്ചു. ആക്രമണത്തില്‍ കെട്ടിടം ഭാഗികമായി തകര്‍ന്നിട്ടുണ്ട്.

ലബനനില്‍ നിന്ന് വിക്ഷേപിച്ച റോക്കറ്റുകളില്‍ ചിലത് പ്രതിരോധ സംവിധാനമായ അയേണ്‍ ഡോം തകര്‍ത്തുവെങ്കിലും മൂന്ന് റോക്കറ്റുകള്‍ ജനവാസമേഖയില്‍ പതിക്കുകയായിരുന്നു. ടെല്‍ അവീവില്‍ നിന്ന് ഏകദേശം 25 കിലോമീറ്റര്‍ വടക്കുകിഴക്കായി വെസ്റ്റ് ബാങ്ക് അതിര്‍ത്തിയിലാണ് അറബ് നഗരമായ ടിറ.

ലബനനിലെ സായുധ സംഘമായ ഹിസ്ബുല്ലയാണ് ആക്രമണത്തിന് പിന്നിലെന്ന് സ്ഥിരീകരിച്ചിട്ടുണ്ട്. ഹിസ്ബുല്ലയുമായുള്ള യുദ്ധം ആരംഭിച്ചതിന് ശേഷം ഇസ്രയേലില്‍ 63 പേര്‍ ഇതുവരെ കൊല്ലപ്പെട്ടിട്ടുണ്ട്. വ്യാഴാഴ്ച ലബനനില്‍ നിന്നുള്ള റോക്കറ്റ് ആക്രമണത്തില്‍ വടക്കന്‍ ഇസ്രയേലിലെ മെതുലയില്‍ നാല് കര്‍ഷകര്‍ ഉള്‍പ്പെടെ ഏഴ് പേര്‍ കൊല്ലപ്പെട്ടിരുന്നു. 2023 ഒക്ടോബറില്‍ ഇസ്രയേലിനെതിരെ നടന്ന ഹമാസ് ആക്രമണത്തില്‍ 1,206 പേരാണ് കൊല്ലപ്പെട്ടത്. ഗാസയില്‍ ഇസ്രയേല്‍ നടത്തിയ ആക്രമണത്തില്‍ 43,259 പലസ്തീനികളും കൊല്ലപ്പെട്ടു.

അതേസമയം ഇസ്രയേലിനെ ആക്രമിക്കാന്‍ ഇറാന്‍ തയാറെടുക്കുന്നെന്ന റിപ്പോര്‍ട്ടുകള്‍ക്കിടെ മുന്നറിയിപ്പുമായി യുഎസ്. ഇസ്രയേലിനെതിരെ വീണ്ടും ആക്രമണത്തിന് ഇറാന്‍ മുതിര്‍ന്നാല്‍ ഇസ്രയേല്‍ തിരിച്ചടിക്കുന്നതു തടയാന്‍ വാഷിങ്ടണിന് സാധിക്കില്ലെന്ന് യുഎസ് വ്യക്തമാക്കി. യുഎസ് സര്‍ക്കാരിനെ ഉദ്ധരിച്ച് രാജ്യാന്തര മാധ്യമമാണ് വാര്‍ത്ത റിപ്പോര്‍ട്ട് ചെയ്തത്.

യുഎസ് പ്രസിഡന്റ് തിരഞ്ഞെടുപ്പ് നടക്കുന്ന നവംബര്‍ 5ന് മുമ്പ് ഇറാന്‍ ഇസ്രയേലിനെ ആക്രമിച്ചേക്കുമെന്നാണ് റോയിട്ടേഴ്‌സ് അടക്കമുള്ള മാധ്യമങ്ങള്‍ റിപ്പോര്‍ട്ട് ചെയ്യുന്നത്. നിരവധി ബാലിസ്റ്റിക് മിസൈലുകളും ഡ്രോണുകളും ഉപയോഗിച്ച് ഇസ്രയേലിനെ ഇറാഖിന്റെ മണ്ണില്‍ നിന്ന് ഇറാന്‍ വരുംദിവസങ്ങളില്‍ തിരിച്ചടിക്കുമെന്നാണ് റിപ്പോര്‍ട്ടുകള്‍. ഇറാന്‍ ആക്രമിച്ചാല്‍ ഉടന്‍ പ്രത്യാക്രമണം നടത്തുമെന്ന് ഇസ്രയേലും സൂചിപ്പിച്ചിട്ടുണ്ട്.