അമേരിക്കന്‍ പ്രസിഡന്റ് തെരഞ്ഞെടുപ്പില്‍ ആദ്യ ഫലസൂചനകള്‍ റിപ്പബ്ലിക്കന്‍ സ്ഥാനാര്‍ത്ഥിയായ ഡൊണാള്‍ഡ് ട്രംപിന് അനുകൂലം. 15 സംസ്ഥാനങ്ങളില്‍ ട്രംപ് വിജയിച്ചു .

ഓക്ലഹോമ, മിസ്സിസിപ്പി, അലബാമ, ടെന്നസി, കെന്റക്കി, ഇന്‍ഡിയാന, വെസ്റ്റ് വിര്‍ജീനിയ, സൗത്ത് കാരലൈന, ഫ്‌ലോറിഡ, ആര്‍കന്‍സോ, നോര്‍ത്ത് ഡക്കോട്ട, സൗത്ത് ഡക്കോട്ട, വയോമിങ്, ലുയീസിയാന, ഒഹായോ, നെബ്രാസ്‌ക, ടെക്‌സസ് എന്നീ സംസ്ഥാനങ്ങളിലാണ് ട്രംപ് വിജയിച്ചിരിക്കുന്നത്.

അതേസമയം, ന്യൂ ജേഴ്‌സി, മാസചുസെറ്റ്, ഇല്ലിനോയ്, ഡെലവേര്‍, വെര്‍മോണ്‍ട്, മേരിലാന്‍ഡ്, കണക്റ്റികട്ട്, ന്യൂയോര്‍ക്ക് എന്നീ സംസ്ഥാനങ്ങളില്‍ ഡെമോക്രാറ്റിക് സ്ഥാനാര്‍ത്ഥിയായ കമല ഹാരിസ് ലീഡ് ചെയ്യുന്നു.അരിസോണ, ജോര്‍ജിയ, മിഷിഗണ്‍, നെവാഡ, നോര്‍ത്ത് കാരലൈന, പെന്‍സില്‍വാനിയ, വിസ്‌കോണ്‍സിന്‍ എന്നീ സംസ്ഥാനങ്ങളിലെ ഫലസൂചനകളിലേയ്ക്കാണ് ഏവരും ഉറ്റുനോക്കുന്നത്.

പ്രസിഡന്റ് സ്ഥാനം അലങ്കരിക്കാനായി 270 ഇലക്ട്രല്‍ വോട്ടുകളാണ് ആവശ്യമായിട്ടുള്ളത്. വിജയിച്ചാല്‍ അമേരിക്കയുടെ ആദ്യത്തെ വനിതാ പ്രസിഡന്റ് എന്ന ചരിത്ര നേട്ടമാണ് കമല ഹാരിസിനെ കാത്തിരിക്കുന്നത്.

മറുഭാഗത്ത്, 127 വര്‍ഷത്തിന് ശേഷം തുടര്‍ച്ചയായല്ലാതെ വീണ്ടും അമേരിക്കന്‍ പ്രസിഡന്റാകുന്ന വ്യക്തിയെന്ന നേട്ടമാണ് ട്രംപിന് സ്വന്തമാകുക. ഇത്തവണ പോളിംഗ് ശതമാനം റെക്കോര്‍ഡിലെത്തുമെന്നാണ് പ്രതീക്ഷ.

അതേസമയം, ഡൊണാള്‍ഡ് ട്രംപ് ഫ്‌ലോറിഡയില്‍ വോട്ട് രേഖപ്പെടുത്തി. ഭാര്യ മെലാനിയ ട്രംപിനൊപ്പമാണ് അദ്ദേഹം പാം ബീച്ചിലെ വോട്ടിംഗ് സെന്ററിലെത്തിയത്. ഇക്കുറി വിജയമുറപ്പാണെന്നാണ് മുന്‍ പ്രസിഡന്റ് കൂടിയായ ട്രംപ് വോട്ട് ചെയ്ത ശേഷം പ്രതികരിച്ചത്. ഡെമോക്രാറ്റ് സ്ഥാനാര്‍ഥി കമല ഹാരിസും വോട്ട് രേഖപ്പെടുത്തി. നിലവിലെ പ്രസിഡന്റായ ജോ ബൈഡന്‍ നേരത്തെ തന്നെ വോട്ട് രേഖപ്പെടുത്തി.