ഹിസ്ബുള്ള ഉടനെയൊന്നും പത്തി പൊക്കില്ല; ഹിസ്ബുള്ള നിര്‍മിച്ച ഭൂഗര്‍ഭ തുരങ്കം തകര്‍ത്ത് ഇസ്രായേല്‍ പ്രതിരോധ സേന
ഇനി ഹിസ്ബുള്ള ഉടനെയൊന്നും പത്തി പൊക്കില്ല. ക്രിസ്ത്യന്‍ പള്ളി കൈവശപ്പെടുത്തി പള്ളിയുടെ സെമിത്തേരിയുടെ അടിയില്‍ ഹിസ്ബുള്ള നിര്‍മിച്ച ഭൂഗര്‍ഭ തുരങ്കം തകര്‍ക്കുക മാത്രമല്ല അതില്‍ ഒളിച്ചിരിക്കുന്ന തീവ്രവാദികളെ പുറത്തിറങ്ങാന്‍പോലും അനുവദിക്കാതെ വായു കടക്കാത്ത വിധം തുരങ്കം അടയ്ക്കുകയും ചെയ്തു. സമാനമായ പത്തോളം തുരങ്കങ്ങള്‍ക്കൂടി ലെബനോനിലുണ്ടെന്നും വന്‍ ആയുധശേഖം അവിടെ ഒളിപ്പിച്ചിരിക്കുന്നതായും ഇസ്രായേല്‍ കണ്ടെത്തിയിരിക്കുന്നു.
തെക്കന്‍ ലെബനോനില്‍ ഹിസ്ബുള്ളയുടെ ഭൂഗര്‍ഭ തുരങ്ക ശൃംഖലകള്‍ ബോംബ് ആക്രമണത്തില്‍ ഇസ്രയേല്‍ പ്രതിരോധ സേന തകര്‍ക്കുക മാത്രമല്ല അവയുടെ ഫോട്ടോയും വീഡിയോയും പുറത്തുവിടുകയും ചെയ്തു. കൂറ്റന്‍ തുരങ്കം സെമിത്തേരിയുടെ അടിയിലാണെന്നും തുരങ്കത്തില്‍ വന്‍ ആയുധശേഖരവും അതിനുള്ളില്‍ ഹിസ്ബുള്ള തീവ്രവാദികളും ഒളിച്ചിരിക്കുന്നതായി കഴിഞ്ഞ മാസം ഇസ്രായേല്‍ ഡ്രോണുകള്‍ കണ്ടെത്തിയിരുന്നു. ഒരു മാസത്തേക്കുള്ള ഭക്ഷണവും ശീതീകരിച്ച കിടുപ്പുമുറികളുമൊക്കെ ഈ തുരങ്കങ്ങളില്‍ സജ്ജീകരിച്ചിരുന്നു. ഇവിടെയുള്ള ഹിസ്ബുള്ളയുടെ കണ്‍ട്രോള്‍ റൂമുകളും തീവ്രവാദികള്‍ക്ക് ഉറങ്ങാനുള്ള മുറികളും സൈന്യം തകര്‍ത്തു.
റോക്കറ്റ്, ഗ്രനേഡ് ലോഞ്ചറുകള്‍, തോക്കുകള്‍, ബുള്ളറ്റുകള്‍ തുടങ്ങി ഹിസ്ബുള്ളയുടെ വന്‍ ആയുധ ശേഖരമാണ് ഇവിടെ കണ്ടെത്തിത്. കൈയ്യില്‍നിന്നും തൊടുത്ത് വിടുന്ന ഷെല്ലുകള്‍, ജനറേറ്ററുകളുടെ സംഭരണ മുറി, വാട്ടര്‍ ടാങ്കുകള്‍, പാചകമുറികള്‍ എന്നിവയെല്ലാം ടണലിനുള്ളില്‍ ഉണ്ടായിരുന്നു. സെമിത്തേരിയില്‍ മൃതദേഹം സംസ്‌കരിച്ചിടത്തു പോലും സ്ലാബുകള്‍ മാറ്റി ഹിസ്ബുല്ല റഷ്യ, ഇറാന്‍ എന്നിവിടങ്ങളില്‍നിന്നുള്ള ആയുധങ്ങള്‍ സൂക്ഷിച്ചിരുന്നു. ലെബനോനിലെ ഹിസ്ബുള്ള അംഗങ്ങള്‍ ഉപയോഗിച്ചിരുന്ന ഒന്നിലധികം ഭൂഗര്‍ഭ തുരങ്കങ്ങള്‍ തകര്‍ത്തതായി ഇസ്രായേല്‍ സൈന്യം അറിയിച്ചു. ഒറ്റ നോട്ടത്തില്‍ സെമിത്തേരിയെന്ന് തോന്നുമെങ്കിലും അടിയില്‍ ഭീമന്‍ ടണലുകളാണ് ഇവര്‍ നിര്‍മിച്ചിരുന്നത്. കല്ലറ എന്ന് തോന്നിക്കുന്ന വിധമാണ് ഇതിന്റെ വാതില്‍ പണിതിരിക്കുന്നത്. കിലോമീറ്ററുകളോളം വ്യാപിച്ചുകിടക്കുന്ന തുരങ്കം കമാന്‍ഡ് ആന്റ് കണ്‍ട്രോള്‍ റൂമായാണ് പ്രവര്‍ത്തിച്ചിരുന്നതെന്ന് ഇസ്രായേല്‍ സൈന്യം അറിയിച്ചു.
ലബനന്‍ അതിര്‍ത്തി കടന്ന് പരിശോധിച്ചപ്പോള്‍ ഇത്തരത്തിലുള്ള നിരവധി തുരങ്കങ്ങള്‍ കാണാന്‍ സാധിച്ചെന്നും സൈന്യം അവകാശപ്പെടുന്നു. ദീര്‍ഘകാലം താമസിക്കാന്‍ പാകത്തിലുളള സൗകര്യങ്ങളും ആക്രമിക്കാന്‍ പര്യാപ്തമായ ആയുധങ്ങളും ഇതിനിടെയില്‍ കണ്ടെടുത്തെന്നും ഇസ്രായേല്‍ പറയുന്നു. എ.കെ.-47 ഉള്‍പ്പെടെ വലിയ ആയുധശേഖരമാണ് ഇവിടെ നിന്നും പിടിച്ചെടുത്തത്. ഒരു തീവ്രവാദി പോലും പുറത്തിറങ്ങാത്ത വിധവും ഇനിയൊരുക്കലും തുറക്കാനാവാത്ത വിധവും 4500 ഘനമീറ്റര്‍ കോണ്‍ക്രീറ്റ് പമ്പുചെയ്താണ് ഇസ്രായേല്‍ തുരങ്കം അടച്ചുകളഞ്ഞത്.
തുരങ്കത്തിലേക്ക് ഇസ്രായേല്‍ വിഷപ്പുക അടിച്ചശേഷമാണ് തുരങ്കം അടച്ചതെന്നും റിപ്പോര്‍ട്ടുകള്‍ പുറത്തുവരുന്നുണ്ട്. ഗാസയില്‍ ഹമാസിന്റെ ഇരുപതു കിലോമീറ്റര്‍ ദൈര്‍ഘ്യമുള്ള തുരങ്കങ്ങള്‍ പോലെയല്ല, ഭീകരര്‍ക്ക് ദിവസങ്ങളോളം എല്ലാസൗകര്യങ്ങളോടുംകൂടി തങ്ങാന്‍ പാകത്തില്‍ രൂപപ്പെടുത്തിയിട്ടുള്ളതാണ് ഹിസ്ബുള്ളയുടെ തുരങ്കങ്ങള്‍. തെക്കന്‍ ലെബനോനനിലെ ഗ്രാമങ്ങളിലുടനീളം ഇത്തരത്തിലുള്ള ഭീകരത്താവളങ്ങള്‍ ഹിസ്ബുള്ള പണിതിട്ടുണ്ടെന്ന് ഇസ്രായേല്‍ കണ്ടെത്തിയ സാഹചര്യത്തില്‍ വന്‍പോരാട്ടത്തിനുള്ള സാഹചര്യമാണ് മുന്നിലുള്ളത്. വരും ദിവസങ്ങളില്‍ തുരങ്കങ്ങള്‍ ഒന്നൊന്നായി തകര്‍ത്ത് ഹിസ്ബുള്ളയെ നാമാവശേഷമാക്കാനാണ് ഇസ്രായേലിന്റെ നീക്കം. ലെബനോനനിലെ ഒരുഗ്രാമംപോലും കൈയടക്കാന്‍ ഇസ്രയേല്‍ സൈന്യത്തിനാവില്ലെന്ന് തിങ്കളാഴ്ച ഹിസ്ബുള്ള പറഞ്ഞതിനു പിന്നാലെയാണ് ഇസ്രായേല്‍ അതിമാരകമായ ആക്രമണം അഴിച്ചുവിട്ടത്.
സെപ്തംബര്‍ അവസാനം മുതല്‍ 1,350ലേറെ പേരാണ് ഇസ്രയേല്‍ ആക്രമണങ്ങള്‍ക്കിടെ ലെബനനില്‍ കൊല്ലപ്പെട്ടത്. അതിനിടെ സിറിയയുടെ തലസ്ഥാനമായ ഡമാസ്‌കസിനു സമീപം ഇസ്രയേല്‍ നടത്തിയ ആക്രമണത്തില്‍ ഏഴു പേര്‍ കൊല്ലപ്പെട്ടു. 14 പേര്‍ക്ക് പരിക്കേറ്റു. ഹിസ്ബുള്ളയുടെ ബഹുനിലക്കെട്ടിടത്തിനുനേരേയാണ് ആക്രമണമുണ്ടായത്. ഹിസ്ബുള്ള അംഗങ്ങളെ ലക്ഷ്യമിട്ട് ലെബനനിലുടനീളം മൊബൈല്‍ സ്ഫോടന പരമ്പര നടത്താന്‍ ഇസ്രായേല്‍ നീക്കം നടത്തുകയാണ്. സെപ്റ്റംബര്‍ 17-നാണ് ലെബനോന്റെയും സിറിയയുടെയും വിവിധഭാഗങ്ങളില്‍ ഒരേസമയം പേജറുകള്‍ പൊട്ടിത്തെറിച്ച് 40 പേര്‍ കൊല്ലപ്പെടുകയും 3000 പേര്‍ക്ക് പരിക്കേല്‍ക്കുകയും ചെയ്തിരുന്നു.
ഹമാസിനൊപ്പം ചേര്‍ന്ന് ഇസ്രായേലിനെതിരെ ആക്രമണം കടുപ്പിച്ചതോടെ ഇസ്രായേല്‍ ഹിസ്ബുള്ളയോടും യുദ്ധം തുടങ്ങുകയായിരുന്നു. . സെപ്തംബര്‍ 27 നാണ് ഹിസ്ബുള്ള തലവന്‍ ഹസന്‍ നസ്രുള്ളയെ ഇസ്രയേല്‍ വ്യോമാക്രമണത്തിലൂടെ വധിച്ചത്. ഇതിന് പിന്നാലെ പിന്‍ഗാമിയായി വരാനിരുന്ന ഹിസ്ബുള്ള നേതാവ് ഹാഷിം സഫീദിനെയും ഇസ്രായേല്‍ പ്രതിരോധ സേന വകവരുത്തി. കഴിഞ്ഞ ദിവസം തെക്കന്‍ ലെബനീസ് നഗരമായ ടയറിലെ ഹിസ്ബുള്ള കമാന്‍ഡ് സെന്ററുകളില്‍ ഇസ്രായേല്‍ സേന വ്യോമാക്രമണം നടത്തിയിരുന്നു.
https://www.facebook.com/Malayalivartha
