തന്നെയും ഭാര്യയേയും കൊല്ലാന്‍ ഇറാനും അവരുടെ സഹായം സ്വീകരിക്കുന്ന ഭീകര സംഘനകളും നടത്തുന്ന ശ്രമങ്ങള്‍ അവരുടെ ശവക്കുഴിയിലേക്കുളള മാര്‍ഗമാണ്. മുന്‍പ് വീടിന് നേരെ ആക്രമണം നടത്തിയപ്പോള്‍ നെതന്യാഹു കൊടുത്ത മുന്നറിയിപ്പാണ്. ഇന്നിപ്പോള്‍ വീണ്ടും ആക്രമണം ഫഌഷ് ബോംബുകള്‍ പ്രയോഗിച്ച് ഭയപ്പെടുത്താനുള്ള ശ്രമം. എന്നാല്‍ ഹിസ്ബുള്ളകളുടെ കാലക്കേടിനാണ് ഈ ആക്രമണം നടത്തയത്. മൊസാദ് തലവന്‍ ഡേവിഡ് ഡാഡി ബര്‍ണിയ നെതന്യാഹുവുമായ് കൂടിക്കാഴ്ച നടത്തിയെന്ന വിവരങ്ങള്‍ പുറത്ത്. എന്തോ ഒരു നീക്കത്തിന് ഇസ്രയേല്‍ തയ്യാറെടുക്കുന്നുവെന്നാണ് റിപ്പോര്‍ട്ട്.

കനത്ത സുരക്ഷാ ഭീഷണികള്‍ക്കിടെ ഇസ്രായേല്‍ പ്രധാനമന്ത്രി ബെഞ്ചമിന്‍ നെതന്യാഹു കഴിയുന്നത് ബങ്കറിലെന്ന് റിപ്പോര്‍ട്ടുകളും പുറത്തുവന്നിരുന്നു. പ്രധാനമന്ത്രിയുടെ ഓഫീസിനു താഴെയുള്ള അതീവ സുരക്ഷാ സംവിധാനങ്ങളുള്ള ഭൂഗര്‍ഭ അറയിലാണ് അദ്ദേഹം ദൈനംദിന യോഗങ്ങള്‍ ഉള്‍പ്പെടെ ചേരുന്നതെന്ന് ഇസ്രായേല്‍ മാധ്യമമായ 'ചാനല്‍ 12' റിപ്പോര്‍ട്ട് ചെയ്യുന്നു. ഡ്രോണ്‍ ആക്രമണ ഭീഷണികള്‍ക്കിടെ സുരക്ഷാ ഉദ്യോഗസ്ഥരുടെ നിര്‍ദേശപ്രകാരമാണു നടപടി.

പ്രധാനമന്ത്രിയുടെ ഓഫീസിന്റെ മുകള്‍ നിലയിലുള്ള മുറിയിലാണു സാധാരണ യോഗങ്ങള്‍ ചേരാറുള്ളത്. ഇതാണിപ്പോള്‍ ഭൂഗര്‍ഭ മുറിയിലേക്കു മാറ്റിയിരിക്കുന്നതെന്ന് 'ജറൂസലം പോസ്റ്റ് റിപ്പോര്‍ട്ട് ചെയ്തു. ഓഫിസിലുണ്ടാകുമ്പോള്‍ ഭൂരിഭാഗം സമയവും നെതന്യാഹു ഇവിടെത്തന്നെയാണു കഴിയുന്നതെന്നാണു വിവരം. ഇവിടെ സുരക്ഷ കൂട്ടുകയും ചെയ്തിട്ടുണ്ട്.

കൂടുതല്‍ സമയം ഒരേ സ്ഥലത്ത് കഴിയരുതെന്നാണ് നെതന്യാഹുവിനോട് സുരക്ഷാ വിഭാഗം ആവശ്യപ്പെട്ടിരിക്കുന്നത്. പലയിടങ്ങളിലായി മാറിമാറിക്കഴിയാനും നിര്‍ദേശമുണ്ട്. സുരക്ഷാ ഭീഷണിയെ തുടര്‍ന്ന് മകന്‍ അവ്‌നെറിന്റെ വിവാഹവും നീട്ടിവയ്ക്കാന്‍ ആലോചിക്കുന്നുണ്ട്. ഇതേകാര്യം ചൂണ്ടിക്കാട്ടി അഴിമതിക്കേസില്‍ സത്യവാങ്മൂലം സമര്‍പ്പിക്കാനുള്ള ദിവസം മാറ്റിവയ്ക്കണമെന്ന ആവശ്യവുമായി അദ്ദേഹത്തിന്റെ അഭിഭാഷകസംഘം ജറൂസലം ജില്ലാ കോടതിയില്‍ ഹരജി സമര്‍പ്പിച്ചിരിക്കുകയാണ്. യുദ്ധത്തിന്റെ തിരക്കില്‍ നിയമവിഷയത്തില്‍ തയാറാകാനുള്ള സമയം കിട്ടിയില്ലെന്നും ഹരജിയില്‍ വാദിക്കുന്നുണ്ട്.

ഒക്ടോബര്‍ 25ന് ഇറാനില്‍ ഇസ്രായേല്‍ നടത്തിയ വ്യോമാക്രമണത്തിനു പിന്നാലെയും ഇസ്രായേല്‍ പ്രധാനമന്ത്രി ബെഞ്ചമിന്‍ നെതന്യാഹുവും പ്രതിരോധ മന്ത്രി യോവ് ഗാലന്റും സുരക്ഷിതകേന്ദ്രങ്ങളിലേക്കു മാറിയിരുന്നു. ഇറാന്റെ ഭാഗത്തുനിന്നു തിരിച്ചടി മുന്നില്‍കണ്ടായിരുന്നു നീക്കം. ആക്രമണസമയത്തെല്ലാം ഭൂഗര്‍ഭ അറയിലെ ബങ്കറുകളിലാണ് ഇരുവരും കഴിഞ്ഞതെന്ന് മാധ്യമങ്ങള്‍ റിപ്പോര്‍ട്ട് ചെയ്തിരുന്നു.

നേരത്തെ, കഴിഞ്ഞ ഒക്ടോബര്‍ ആദ്യത്തില്‍ ഇസ്രായേല്‍ തീരനഗരമായ സീസറിയയിലെ നെതന്യാഹുവിന്റെ സ്വകാര്യ വസതിയില്‍ ഹിസ്ബുല്ല ഡ്രോണ്‍ ആക്രമണം നടത്തിയിരുന്നു. ഇതിനുശേഷവും ഇസ്രായേല്‍ നഗരങ്ങള്‍ ലക്ഷ്യമിട്ട് ഡ്രോണ്‍റോക്കറ്റ് ആക്രമണങ്ങള്‍ തുടരുകയാണ്. തെല്‍ അവീവിലെ സൈനിക താവളങ്ങളും പ്രധാന വിമാനത്താവളം ഉള്‍പ്പെടെ ലക്ഷ്യമിട്ട് ഹൂതി മിസൈല്‍ ആക്രമണവും നടന്നിരുന്നു. ഏതുസമയവും ഇറാന്റെ പ്രത്യാക്രമണവും ഇസ്രായേല്‍ പ്രതീക്ഷിക്കുന്നുണ്ട്.

ഒക്ടോബര്‍ 13നായിരുന്നു സീസറിയയില്‍ ഹിസ്ബുല്ലയുടെ അപ്രതീക്ഷിത ആക്രമണമുണ്ടായത്. ലബനാനില്‍നിന്ന് 70 കി.മീറ്ററുകളോളം സഞ്ചരിച്ചാണ് ഡ്രോണുകള്‍ നെതന്യാഹുവിന്റെ വസതിയിലെത്തിയത്. ഈ സമയത്ത് നഗരത്തിലെ അപായ സൈറണുകളെല്ലാം പ്രവര്‍ത്തനരഹിതമായിരുന്നു. നെതന്യാഹുവിന്റെ വസതി ആക്രമിക്കപ്പെട്ടെന്ന് പ്രധാനമന്ത്രിയുടെ ഓഫീസ് മണിക്കൂറുകള്‍ക്കകം സ്ഥിരീകരിക്കുകയും ചെയ്തു.