പ്രധാനമന്ത്രി നരേന്ദ്ര മോദിക്ക് പരമോന്നത സിവിലിയന്‍ ബഹുമതി സമ്മാനിച്ച് ഗയാന....ഈ ബഹുമതി തനിക്ക് മാത്രമുള്ളതല്ലെന്നും 140 കോടി ഇന്ത്യക്കാര്‍ക്ക് കൂടി ലഭിക്കുന്ന അംഗീകാരമാണെന്നും മോദി
പ്രധാനമന്ത്രി നരേന്ദ്ര മോദിക്ക് പരമോന്നത സിവിലിയന്‍ ബഹുമതി സമ്മാനിച്ച് ഗയാന. തലസ്ഥാനമായ ജോര്‍ജ്ടൗണില്‍ വെച്ച് പ്രസിഡന്റ് ഡോ. ഇര്‍ഫാന്‍ അലിയാണ് പുരസ്‌കാരം മോദിക്ക് സമ്മാനിച്ചത്.
ഈ ബഹുമതി തനിക്ക് മാത്രമുള്ളതല്ലെന്നും 140 കോടി ഇന്ത്യക്കാര്‍ക്ക് കൂടി ലഭിക്കുന്ന അംഗീകാരമാണെന്നും മോദി പറഞ്ഞു.ജോര്‍ജ്ടൗണിലെ സ്റ്റേറ്റ് ഹൗസില്‍ വെച്ചാണ് ഗയാനയുടെ പരമോന്നത ദേശീയ പുരസ്‌കാരമായ 'ദ ഓര്‍ഡര്‍ ഓഫ് എക്‌സലന്‍സ്' മോദിക്ക് സമ്മാനിച്ചത്.
ഇന്ത്യയും ഗയാനയും തമ്മിലുള്ള ബന്ധം വരും കാലത്ത് കൂടുതല്‍ ശക്തമായി വളരുമെന്ന് പ്രധാനമന്ത്രി പുരസ്‌കാരം സ്വീകരിച്ച ശേഷം പ്രത്യാശ പ്രകടിപ്പിക്കുകയും ചെയ്തു. ചരിത്രപരമായിത്തന്നെ രണ്ട് രാജ്യങ്ങളും തമ്മില്‍ ആഴത്തില്‍ വേരൂന്നിയ ബന്ധമാണുള്ളതെന്നും ആ സൗഹൃദം കൂടുതല്‍ ശക്തമാക്കുന്നതിനുള്ള ഇന്ത്യയുടെ പ്രതിബദ്ധതയുടെ തെളിവാണ് തന്റെ സന്ദര്‍ശനമെന്നും മോദി പറഞ്ഞു.
ഗയാനയുടെ പരമോന്നത സിവിലിയന്‍ പുരസ്‌കാരം സമ്മാനിക്കപ്പെടുന്ന നാലാമത്തെ വിദേശ രാഷ്ട്ര നേതാവാണ് നരേന്ദ്ര മോദി. അഞ്ച് ദിവസത്തെ വിദേശ സന്ദര്‍ശനത്തിന്റെ ഭാഗമായാണ് കഴിഞ്ഞ ദിവസം പ്രധാനമന്ത്രി നരേന്ദ്രമോദി ഗയാനയിലെത്തിയത്. 56 വര്‍ഷത്തിനിടെ ഇതാദ്യമായാണ് ഒരു ഇന്ത്യന്‍ പ്രധാനമന്ത്രി ഗയാനയിലെത്തുന്നത്. ഗയാനയ്ക്ക് പുറമെ ബാര്‍ബഡോസിന്റെ ഉന്നത ബഹുമാതിയായ 'ഓണററി ഓര്‍ഡര്‍ ഓഫ് ഫ്രീഡം ഓഫ് ബാര്‍ബഡോസും' മോദിക്ക് സമ്മാനിക്കുന്നതാണ്‌
"
https://www.facebook.com/Malayalivartha
