ചിലിയില്‍ പ്രസിഡന്റ്‌ തെരെഞ്ഞെടുപ്പില്‍ ഇടതുപക്ഷത്തിന്‌ വിജയം. ഇടതുപക്ഷ സ്ഥാനാര്‍ത്ഥി മിഷേല്‍ ബാഷ്‌ലെ(62) ഉജ്ജ്വല വിജയമാണ്‌ നേടിയത്‌. വലതുപക്ഷ കക്ഷിയായ ഇന്റിപെന്റന്റ്‌ ഡെമോക്രാറ്റിക്‌ യൂണിയന്‍ പാര്‍ട്ടിയുടെ എവ്‌ലിന്‍ മാത്തെയിയെ വന്‍ ഭൂരിപക്ഷത്തോടെയാണ്‌ മിഷേല്‍ പരാജയപ്പെടുത്തിയത്‌. രണ്ടാം തവണയാണ് മിഷേല്‍ ബാഷ്‌ലെ പ്രസിഡന്റാകുന്നത്. 2006 മുതല്‍ 2010 വരെ പ്രസിഡന്റ് പദവിയിലുരുന്ന അവര്‍ രാജ്യത്തെ ആദ്യ വനിതാ പ്രസിഡന്റാണ്. ആദ്യഫലങ്ങള്‍ പുറത്തുവന്നതിന് പിന്നാലെ ബാഷ്‌ലെയെ സ്ഥാനമൊഴിയുന്ന പ്രസിഡന്റ് സെബാസ്റ്റ്യന്‍ പെനേര അഭിനന്ദിച്ചു.

നവംബറില്‍ നടന്ന ആദ്യഘട്ട വോട്ടെടുപ്പില്‍ ബാഷ്‌ലെ 47 ശതമാനം വോട്ടുനേടി ഒന്നാംസ്ഥാനത്ത് എത്തിയിരുന്നു. 50 ശതമാനത്തിലേറെ വോട്ട് നേടാന്‍ സ്ഥാനാര്‍ത്ഥികള്‍ക്ക് അന്ന് കഴിയാതെ വന്നതിനെത്തുടര്‍ന്നാണ് രണ്ടാംഘട്ട വോട്ടെടുപ്പ്‌ ഉണ്ടായത്‌. ധനികരും ദരിദ്രരും തമ്മിലുള്ള അന്തരം കുറയ്‌ക്കുന്ന നയങ്ങള്‍ സ്വീകരിക്കുമെന്നായിരുന്നു മിഷേലിന്റെ തെരെഞ്ഞെടുപ്പ്‌ പ്രചാരണം. ലാറ്റിനമേരിക്കയിലെ സമ്പന്ന രാജ്യമാണ്‌ ചിലി.