ഖേദപ്രകടനമാകാം പക്ഷെ ഇന്ത്യക്ക്‌ മുമ്പില്‍ മാപ്പ്‌ പറയില്ലെന്ന ഉറച്ച നിലപാടിലാണ്‌ അമേരിക്ക. മാത്രമല്ല ദേവയാനിയുടെ കേസുമായി മുന്നോട്ട്‌ പോകുകയും ചെയ്യുമെന്ന്‌ അമേരിക്കന്‍ വിദേശകാര്യ മന്ത്രാലയം വ്യക്തമാക്കി. ദേവയാനിയുടെ അറസ്റ്റിനു ശേഷമുണ്ടായ സംഭവങ്ങളില്‍ യുഎസ് സ്റ്റേറ്റ് സെക്രട്ടറി ജോണ്‍ കെറി കഴിഞ്ഞ ദിവസം ഖേദം പ്രകടിപ്പിച്ചിരുന്നു. ഇതിനുശേഷം ഇന്ത്യ രണ്ടാവശ്യങ്ങളാണ് ഉന്നയിച്ചത്. തെറ്റ് ഏറ്റുപറഞ്ഞ് അമേരിക്ക നിരുപാധികം മാപ്പ് പറയുക, ദേവയാനിക്കെതിരായ കേസ് പിന്‍വലിക്കുക എന്നിവയായിരുന്നു ഇന്ത്യയുടെ ആവശ്യങ്ങള്‍ . രണ്ട് ആവശ്യങ്ങളും അമേരിക്ക തള്ളി.

ദേവയാനിക്കെതിരായ കേസ് ഗൗരവമുള്ളതാണെന്നും നിയമനടപടികളുമായി മുന്നോട്ടുപോകുമെന്നും യുഎസ് സ്‌റ്റേറ്റ് വക്താവ് വ്യക്തമാക്കി. സംഭവത്തില്‍ ജോണ്‍ കെറിയുമായി ചര്‍ച്ച നടത്തുമെന്ന് വിദേശകാര്യമന്ത്രി സല്‍മാന്‍ ഖുര്‍ഷിദ് ഇന്നലെ പറഞ്ഞിരുന്നു. എന്നാല്‍ സല്‍മാന്‍ ഖുര്‍ഷിദിന്റെ പ്രസ്താവന തള്ളിയ അമേരിക്ക ചര്‍ച്ച നടത്തിയിട്ടില്ലെന്നും വ്യക്തമാക്കി.

പൂര്‍ണ നയതന്ത്ര പരിരരക്ഷ ലഭ്യമാക്കുന്നതിനായി ദേവയാനിയെ യുഎന്‍ മിഷനിലേക്ക് കേന്ദ്രസര്‍ക്കാര്‍ മാറ്റിയിരുന്നു. യുഎന്‍ അക്രഡിറ്റേഷന്‍ ലഭിക്കണമെങ്കില്‍ അമേരിക്കന്‍ വിദേശകാര്യ മന്ത്രാലയത്തിന്റെ അനുമതി ആവശ്യമാണ്. അമേരിക്ക ഇക്കാര്യത്തിലും നിഷേധാത്മക നിലപാടാണ് സ്വീകരിക്കുന്നത്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha