പ്രതിപക്ഷം ബഹിഷ്‌ക്കരിച്ച ബംഗ്ലാദേശ്‌ തെരഞ്ഞെടുപ്പില്‍ ഭരണകക്ഷിയായ അവാമി ലീഗിന്‌ നാലില്‍ മൂന്ന്‌ ഭുരിപക്ഷത്തോടെ വിജയം. ആകെയുള്ള 300 സീറ്റുകളില്‍ എതിരില്ലാതെ ജയിച്ച 127 ഉള്‍പ്പെടെ 232 സീറ്റുകളാണ്‌ പാര്‍ട്ടി സ്വന്തമാക്കിയത്‌.

വിജയം സ്ഥിരീകരിച്ചതിനെത്തുടര്‍ന്ന്‌ , ഇന്ത്യയുമായി നദീജലതര്‍ക്കവും അതിര്‍ത്തി പ്രശ്‌നവും ഉള്‍പ്പടെയുള്ള കാര്യങ്ങളില്‍ പരിഹാരം കാണുമെന്ന്‌ പ്രധാനമന്ത്രി ഷെയ്‌ക്ക്‌ ഹസീന പ്രഖ്യാപിച്ചു.
തെരഞ്ഞെടുപ്പിനിടയില്‍ നടന്ന വ്യാപകമായ ആക്രമണങ്ങളില്‍ 25 പേര്‍ മരിച്ചു. തീവ്രവാദി സംഘടനകളുടെ പിന്തുണയോടെ നടന്ന അക്രമങ്ങളില്‍ ഇരുന്നൂറോളം ബൂത്തുകള്‍ തീവയ്‌ക്കുകയും 130 ബൂത്തുകളിലെ ബാലറ്റുകള്‍ നശിപ്പിക്കുകയും ചെയ്‌തിരുന്നു.
ഖലിദ സിയയുടെ ബിഎന്‍പി നേതൃത്വത്തിലുള്ള പ്രതിപക്ഷസഖ്യത്തിന്റെ ബഹിഷ്‌ക്കരണം, കുറഞ്ഞ പോളിംഗ്‌ ശതമാനം എന്നിവ തെരഞ്ഞെടുപ്പിന്റെ വിശ്വാസ്യതയെ പ്രതികൂലമായി ബാധിച്ചേക്കാം എന്നാണ്‌ രാഷ്‌ട്രീയ നിരീക്ഷകരുടെ അഭിപ്രായം.