ആഴ്‌ചകളോളം നീണ്ടുനിന്ന വിവാദങ്ങള്‍ക്കൊടുവില്‍ ഇന്ത്യന്‍ നയ തന്ത്രജ്ഞ ദേവയാനി ഇന്ത്യയില്‍ തിരിച്ചെത്തി. യുണൈറ്റഡ്‌ എയര്‍ലൈന്‍സ്‌ വിമാനത്തില്‍ രാത്രി പത്തുമണിക്ക്‌ ഡല്‍ഹിയിലെത്തിയ ദേവയാനിയ്‌ക്ക്‌ ഗംഭീര സ്വീകരണമാണ്‌ ലഭിച്ചത്‌. വിദേശകാര്യ മന്ത്രാലയത്തിലെ ഉന്നത ഉദ്യോഗസ്ഥര്‍ ദേവയാനിയെ സ്വീകരിച്ചു. ദേവയാനിയെ കാത്തു നിന്ന മാധ്യമപ്പടയോട്‌ ദേവയാനി ഒന്നും പറഞ്ഞില്ല.
ഭാവിയിലും ദേവയാനിയെ കുടുക്കാനുള്ള തന്ത്രങ്ങളാണ്‌ അമേരിക്ക മെനയുന്നത്‌. ദേവയാനിക്ക്‌ ഇന്ത്യ പൂര്‍ണ നയതന്ത്ര പരിരക്ഷ ഉറപ്പാക്കിയതിനാല്‍ ദേവയാനിക്കെതിരെ കേസെടുക്കാന്‍ അമേരിക്കയ്‌ക്ക്‌ കഴിഞ്ഞിരുന്നില്ല. ദേവയാനിക്കുമേല്‍ യു.എസ്‌. കോടതി ഇന്നലെയാണ്‌ വിസാതട്ടിപ്പിന്‌ ഔദ്യോഗികമായി കുറ്റം ചുമത്തിയത്‌. നയതന്ത്രപരിരക്ഷയുള്ള ദേവയാനിയെ വിചാരണ ചെയ്യാനാവാത്തതിനാലാണ്‌ ഇന്ത്യയിലേക്കു മടങ്ങാന്‍ യു.എസ്‌. ആവശ്യപ്പെട്ടത്‌. ദേവയാനിയെ ന്യൂഡല്‍ഹിയിലെ വിദേശകാര്യ മന്ത്രാലയത്തിലേക്കു ഇന്ത്യ മാറ്റി നിയമിച്ചു. 

എന്നാല്‍ ദേവയാനിയുടെ ഭര്‍ത്താവും മക്കളും അമേരിക്കയിലാണ്‌. ഭര്‍ത്താവ്‌ അമേരിക്കന്‍ പൗരത്വമുള്ള ഇന്ത്യന്‍ വംശജനാണ്‌. കുട്ടികളാകട്ടെ അമേരിക്കയില്‍ പഠിക്കുകയും ചെയ്യുന്നു. അതിനാല്‍ ദേവയാനിക്ക്‌ എപ്പോഴെങ്കിലും അമേരിക്കയില്‍ മടങ്ങിയെത്തിയേ പറ്റൂ. അന്നേരം നയതന്ത്ര പരിരക്ഷയില്‍ നിന്നും ദേവയാനിയെ ഒഴിവാക്കിയാല്‍ അറസ്റ്റ്‌ ചെയ്‌ത്‌ ജയിലിലടയ്‌ക്കാനാണ്‌ അമേരിക്കയുടെ ശ്രമം. മാത്രമല്ല നയതന്ത്ര പരിരക്ഷയോടെ അമേരിക്കയില്‍ പ്രവേശിക്കാന്‍ ശ്രമിച്ചാല്‍ വിസ അനുമതിയും നല്‍കുകയില്ല.

അതേസമയം ഇന്ത്യയിലെ അമേരിക്കന്‍ എംബസിയിലെ മുതിര്‍ന്ന ഉദ്യോഗസ്‌ഥനെ ഇന്ത്യ പുറത്താക്കി. പുറത്താക്കപ്പെട്ട യു.എസ്‌. ഉദ്യോഗസ്‌ഥനോട്‌ 48 മണിക്കൂറിനകം ഇന്ത്യ വിടണമെന്നും ആവശ്യപ്പെട്ടു.

വീട്ടുജോലിക്കാരിക്കുള്ള വിസാ അപേക്ഷയില്‍ തെറ്റായ വിവരങ്ങള്‍ നല്‍കിയെന്നാണ്‌ ദേവയാനിക്കെതിരേയുള്ള കേസ്‌. ഡിസംബര്‍ 12നായിരുന്നു അറസ്‌റ്റ്‌. അറസ്‌റ്റും നഗ്നയാക്കി പരിശോധിച്ചതും വന്‍വിവാദമായിരുന്നു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha