ആലപ്പോയില് യുഎന് ട്രക്കുകള്ക്കുനേരെയുണ്ടായ വ്യോമാക്രമണത്തില് 12 പേര് കൊല്ലപ്പെട്ടു
സിറിയയിലെ ആലപ്പോയില് അവശ്യ വസ്തുക്കളുമായി പോയ യുഎന് ട്രക്കുകള്ക്കുനേരെ വ്യോമാക്രമണം. സന്നദ്ധ പ്രവര്ത്തകരും ട്രക്ക് ഡ്രൈവര്മാരും അടക്കം 12 പേര് വ്യോമാക്രമണത്തില് കൊല്ലപ്പെട്ടു. സംഭവത്തിന്റെ ഉത്തരവാദിത്തം ഇതുവരെ ആരും ഏറ്റെടുത്തിട്ടില്ല. എന്നാല് ആക്രമണത്തിനു പിന്നില് റഷ്യയോ സിറിയന് സര്ക്കാരോ ആകാമെന്നാണ് യുഎസ് ആരോപിക്കുന്നത്.
സിറിയന് സൈന്യം വെടിനിര്ത്തല് പ്രഖ്യാപിച്ച് മണിക്കൂറുകള് മാത്രം പിന്നിട്ടപ്പോഴാണ് ആക്രമണം. ആലപ്പോയിലെ ഉം അല് കുബ്റ ആഭ്യന്തര സംഘര്ഷത്തിനിടെ ഒറ്റപ്പെട്ട ജനങ്ങള്ക്ക് ഭക്ഷണ സാധനവുമായി പോകുകയായിരുന്ന 31 ട്രക്കുകള്ക്ക് നേരെയാണ് ആക്രമണം നടന്നത്. 18 ട്രക്കുകളും ആക്രമണത്തില് തകര്ന്നെന്ന് യുഎന് വക്താവ് അറിയിച്ചു. എന്നാല് വ്യോമാക്രമണം നടന്നതായി യുഎന് സ്ഥിരീകരിച്ചിട്ടില്ല.
സിറിയയില് അമേരിക്കന് സഖ്യസേനയും റഷ്യയും തമ്മില് സംയുക്ത തീരുമാനത്തിലൂടെ വെടിനിര്ത്തല് കരാര് നടപ്പാക്കിയെങ്കിലും നിരവധി തവണ ലംഘിക്കപ്പെട്ടുവെന്നാണ് റിപ്പോര്ട്ട്. കരാര് ലംഘിച്ച് സിറിയന് വിമതര് സര്ക്കാര് സൈനികരെ ആക്രമിക്കുകയണെന്നു റഷ്യന് വിദേശമന്ത്രാലയം ആരോപിച്ചിരുന്നു
https://www.facebook.com/Malayalivartha
