ബ്രിട്ടന്റെ പ്രതിശീര്‍ഷ വരുമാനത്തിലേയ്ക്കുള്ള യുകെയിലെ ഇന്ത്യാക്കാരുടെ സംഭാവന 6 ശതമാനം ആണെന്നും തന്മലം ഇന്ത്യാ യു-കെ ബന്ധത്തിന്റെ കെട്ടുറപ്പിന് അവര്‍ ഒരു വലിയ പങ്കു വഹിക്കുന്നുണ്ടെന്നും യുകെ യിലെ ഇന്ത്യന്‍ ഹൈക്കമ്മീഷണര്‍ നവ് തേജ്‌സിംഗ് സര്‍ണ പറഞ്ഞു. ബ്രിട്ടന്റെ ജനസംഖ്യയുടെ 2 ശതമാനം പേര്‍ ഇന്ത്യാക്കാരാണെന്നും ബ്രിട്ടനില്‍ തൊഴിലവസരങ്ങളുണ്ടാക്കുന്നതില്‍ ഇന്ത്യന്‍ തൊഴിലുടമകളും മഹത്തായ സംഭാവനകള്‍ നല്‍കുന്നുണ്ടെന്നും അദ്ദേഹം പറഞ്ഞു. ബ്രിട്ടീഷ് സമൂഹത്തിനു നല്‍കിയ സംഭാവനകള്‍ക്കായി മൂന്നു ഇന്ത്യന്‍ വംശജരായ വ്യവസായികളെ ആദരിക്കാന്‍ സംഘടിപ്പിച്ച ചടങ്ങില്‍ സംസാരിക്കുകയായിരുന്നു അദ്ദേഹം.

ബ്രിട്ടനിലെ സംരംഭകരില്‍ ഒന്നാം സ്ഥാനത്തു അമേരിക്കക്കാരും രണ്ടാം സ്ഥാനത്തുള്ളത് ചൈനാക്കാരുമാണ്. ഇന്ത്യന്‍ തൊഴിലുടമകളുടെ എണ്ണം മൂന്നാം സ്ഥാനത്താണ്. ബ്രിട്ടീഷ് സമൂഹവുമായി ഇഴുകി ചേര്‍ന്നു യുകെയുടെ വളര്‍ച്ചയ്ക്കു സഹായകമായി വര്‍ത്തിക്കുന്ന 1.5 ദശലക്ഷം വരുന്ന ബ്രിട്ടനിലെ ഇന്ത്യാക്കാരെ അദ്ദേഹം പ്രത്യേകം പ്രശംസിച്ചു.

ഇന്ത്യാ- യു.കെ ബന്ധങ്ങള്‍ക്ക് ആഴവും വ്യാപ്തിയും നല്‍കുന്നതില്‍ അവിടത്തെ ഇന്ത്യന്‍ സമൂഹത്തിന് വലിയ പങ്കുണ്ടെന്നും ബ്രിട്ടീഷ് പാര്‍ലമെന്റായ ഹൗസ് ഓഫ് കോമണ്‍സിലും ഹൗസ് ഓഫ് ലോര്‍ഡ്സിലും പ്രാതിനിധ്യം നേടി ഇന്ത്യാക്കാര്‍ ബ്രിട്ടീഷ് രാഷ്ട്രീയ രംഗത്തും തങ്ങളുടെ ഉറച്ച സാന്നിധ്യം അറിയിച്ചിരിക്കയാണെന്നു സര്‍ണ പറഞ്ഞു.

ബിസിനസ്സിന് 6 തവണയും ബ്രിട്ടീഷ് ബിസിനസ്സ് രംഗത്തിനും ബ്രിട്ടീഷ്-ഏഷ്യന്‍ സമൂഹത്തിനായി ചെയ്ത സേവനങ്ങള്‍ക്കായി രണ്ടു തവണയുമായി രാജ്ഞിയുടെ അവാര്‍ഡ് 8 തവണ നേടിയ ഇന്ത്യന്‍ വ്യവസായി ഡോ റാമി റാഞ്ചര്‍ക്ക് അദ്ദേഹം ഷീല്‍ഡ് സമ്മാനിച്ചു. 1987-ല്‍ വെറും 2 പൗണ്ട് ( ഏകദേശം 200 ഇന്ത്യന്‍ രൂപ) മൂലധനവുമായാണ് റാഞ്ചര്‍ തന്റെ സ്ഥാപനം സ്ഥാപിച്ചത്. ഇന്ന് ബ്രിട്ടനില്‍ ഏറ്റവും വളര്‍ച്ചാ നിരക്കുള്ള രണ്ടു കമ്പനികളിലൊന്നാണ്് അദ്ദേഹത്തിന്റെ കമ്പനിയെന്നും ഇന്ന് അതിന് ഏകദേശം 200 ദശലക്ഷം പൗണ്ട് വരുമാനമുണ്ടെന്നും സര്‍ണ അനുസ്മരിച്ചു.

ആന്യൂവല്‍ ഡിന്നര്‍ ഓഫ് ഫ്രണ്ട്‌സ് സര്‍ക്കിള്‍ ഇന്റര്‍നാഷണലിന്റെ നേതൃത്വത്തില്‍ റാഡിസണ്‍ പോര്‍ട്ട്മാന്‍ ഹോട്ടലില്‍ വച്ചു നടത്തപ്പെട്ട ചടങ്ങില്‍ വച്ച് മറ്റു രണ്ടു ഇന്ത്യാക്കാരെ കൂടി ആദരിച്ചിരുന്നു. യു.കെയില്‍ ഫ്രാഞ്ചൈസി സംരംഭകനായ അതുല്‍ പഥകിനേയും , കൃഷന്‍ റാലേഗിനേയുമാണ് ആദരിച്ചത്. ലണ്ടനില്‍ മക്‌ഡോണാള്‍ഡ് ഭക്ഷണശൃംഖലയുടെ 29 റസ്റ്റോറന്റുകള്‍ക്കുടമയാണ് അതുല്‍പഥക്.പഥക് ആദ്യത്തെ റസ്റ്റോറന്റ് തുടങ്ങിയത് 2003-ലാണ്. ഇന്ന് അദ്ദേഹത്തിന്റെ സ്ഥാപനങ്ങളിലെല്ലാമായി 2500 ഓളം സ്റ്റാഫംഗങ്ങളാണുള്ളത്. 1993-ല്‍ കൃഷന്‍ റാലേഗ് സ്ഥാപിച്ച ഇന്ത്യാ ലിങ്ക് ഇന്റര്‍നാഷണല്‍ എന്ന മാഗസിന്റെ ചീഫ് എഡിറ്റര്‍ ആണ് കൃഷന്‍ റാലേഗ്.