ശ്വാസമടക്കിപ്പിടിച്ച് കാണാന്‍ ഒരു വീഡിയോ. ദീര്‍ഘകാലമായി ബിബിസി പ്രേക്ഷകര്‍ അക്ഷമയോടെ കാത്തിരിക്കുന്ന സീരീസായ പ്ലാനെറ്റ് എര്‍ത്ത് 2വിന്റെ എപ്പിസോഡ് കഴിഞ്ഞ രാത്രി പ്രക്ഷേപണം ചെയ്തിരുന്നു. ഡസന്‍ കണക്കിന് പാമ്പുകള്‍ ഒരു ഉടുമ്പിനെ പിന്തുടര്‍ന്ന് പിടിക്കാന്‍ ശ്രമിക്കുന്നതാണ് അതില്‍ ചിത്രീകരിച്ചിരിക്കുന്നത്. പാമ്പുകളുടെ പിടിയില്‍ നിന്നും കുതറി രക്ഷപ്പെട്ട ഉടുമ്പിന് പിന്നാലെ പാമ്പുകള്‍ ഒരുമിച്ച് പായുകയായിരുന്നു. ഹൃദയം നിലയ്ക്കുന്ന ഈ വീഡിയോ ഒരു ഞെട്ടലോടെ മാത്രമേ ആര്‍ക്കും കാണാന്‍ സാധിക്കുകയുള്ളൂ. ' ദി സ്‌റ്റെഫ് ഓഫ് നൈറ്റ്‌മെയേര്‍സ്' എന്ന ടൈറ്റിലിലാണീ ഫൂട്ടേജ് പ്രക്ഷേപണം ചെയ്തിരിക്കുന്നത്. പസിഫിക്ക് സമുദ്രത്തിലെ ഗാലപഗോസ് ദ്വീപില്‍ വച്ചാണീ ദൃശ്യങ്ങള്‍ ജൂണില്‍ ചിത്രീകരിച്ചിരിക്കുന്നത്.
പാമ്പുകളുടെ പിടിയില്‍ നിന്നും രക്ഷപ്പെട്ട് ഓടുന്ന ഉടുമ്പുകളെയും ഇതില്‍ ചിത്രീകരിച്ചിരുന്നു. എന്നാല്‍ മറ്റ് ചില ഉടുമ്പുകളെ പാമ്പുകള്‍ പിടികൂടി വരിഞ്ഞ് മുറുക്കുന്നതും കാണാം. ബിബിസി1ലാണീ ദൃശ്യങ്ങള്‍ പ്രക്ഷേപണം ചെയ്തിരിക്കുന്നത്. ഇവിടെ ചിത്രീകരണത്തിനെത്തിയപ്പോള്‍ ബിബിസി സംഘം ഈ പാമ്പുകളെ കണ്ട് ആദ്യം ഞെട്ടിപ്പോയെന്നും റിപ്പോര്‍ട്ടുണ്ട്. ഇത്തരത്തിലുള്ള പാമ്പുകളെ താന്‍ മറ്റെവിടെയും കണ്ടിട്ടില്ലെന്നാണ് പ്രോഗ്രാമിന്റെ അവതാരകനായ സര്‍ ഡേവിഡ് ആറ്റന്‍ബറോ വെളിപ്പെടുത്തുന്നത്. കഴിഞ്ഞ രാത്രി 8 മണിക്ക് പ്രക്ഷേപണം ചെയ്തിരിക്കുന്ന ഫൂട്ടേജ് കണ്ട് മില്യണ്‍ കണക്കിന് പ്രേക്ഷകരാണ് കണ്ട് ഞെട്ടിയിരിക്കുന്നത്. ഇത് ഒരു യഥാതദ ഭീകര സിനിമയ്ക്ക് സമാനമാണെന്നാണ് നിരവധി പേര്‍ പ്രതികരിച്ചിരിക്കുന്നത്.
ഈ പാമ്പുകളുടെ കണ്ണുകള്‍ കണ്ടാല്‍ നിസ്സാരമാണെങ്കിലും അവയ്ക്ക് ഉടുമ്പുകളുടെ ഓരോ ചലനവും നിരീക്ഷിക്കാനുള്ള ശേഷിയുണ്ടെന്നാണ് സര്‍ ഡേവിഡ് ആറ്റന്‍ബറോ പറയുന്നത്. ഈ സീരീസിന്റെ തുടര്‍ന്നുള്ള ആറ് പാര്‍ട്ടുകളാണ് പ്രക്ഷേപണം ചെയ്യാനിരിക്കുന്നത്. 2006ല്‍ പ്രക്ഷേപണം ചെയ്യപ്പെട്ട ഫസ്റ്റ് പ്ലാനറ്റ് എര്‍ത്തിന്റെ തുടര്‍ച്ചയായിട്ടാണ് ഇത് വരുന്നത്. മൂന്ന് വര്‍ഷമെടുത്തിട്ടായിരുന്നു ഇത് ചിത്രീകരിച്ചിരുന്നത്. ആദ്യ എപ്പിസോഡ് ദ്വീപിലെ ജീവികളെ കേന്ദ്രീകരിച്ചായിരുന്നു. ഇതിനായി ഒമ്പത് ലൊക്കേഷനുകളില്‍ ചിത്രീകരിച്ചിരുന്നു. അടുത്ത ആഴ്ച പ്രക്ഷേപണം ചെയ്യുന്ന എപ്പിസോഡില്‍ പര്‍വതപ്രദേശങ്ങളിലെ മൃഗങ്ങളെയാണ് കാണിക്കുന്നത്. മഞ്ഞില്‍ ജീവിക്കുന്ന അപൂര്‍ പുള്ളിപ്പുലികളെക്കുറിച്ചുള്ള ഭാഗവും ഇതില്‍ ഉള്‍പ്പെടുന്നുണ്ട്.
ഈ പരിപാടിക്കുള്ള വര്‍ധിച്ച ജനപിന്തുണ ബിബിസി ആഘോഷിക്കുന്നുണ്ട്. 9.2 മില്യണ്‍ പേരാണ് കഴിഞ്ഞ ദിവസത്തെ എപ്പിസോഡ് കണ്ടിരിക്കുന്നത്. മൊത്തം ടിവി പ്രേക്ഷകരില്‍ 36 ശതമാനം വരുമിത്. കഴിഞ്ഞ 15 വര്‍ഷമായി ബ്രിട്ടനില്‍ ഏറ്റവുമധികം പ്രേക്ഷകരുള്ള നാച്വറല്‍ ഹിസ്റ്ററി പ്രോഗ്രാമാണിത്. ആദ്യ സീരീസിനേക്കാള്‍ കൂടുതല്‍ ജനപ്രിയമാണ് രണ്ടാമത്തെ സീരീസെന്നും റിപ്പോര്‍ട്ടുണ്ട്. എന്നാല്‍ പെന്‍ഗ്വിനുകളുടെ മരണത്തെക്കുറിച്ച് ഈ പരിപാടിയില്‍ ഇതുവരെ ചിത്രീകരിച്ചിട്ടില്ല. അവയുടെ മരണം മനുഷ്യരുടെ മരണത്തോട് സാമ്യം തോന്നുന്നതിനാല്‍ അത് കാഴ്ചക്കാരെ കൂടുതല്‍ അസ്വസ്ഥരാക്കുമെന്നതാണ് കാരണമെന്നും സൂചനയുണ്ട്.