ജര്‍മന്‍ പ്രൈവറ്റ് ജെറ്റ് മുകളിലൂടെ പറന്ന എമിറേറ്റ്‌സ് സൂപ്പര്‍ ജംബോയുടെ ശക്തിയില്‍ നിയന്ത്രണം വിട്ട് മൂന്നുതവണ മലക്കം മറിയുകയും ഒറ്റയടിക്ക് പതിനായിരം അടിയോളം താഴേക്ക് പതിക്കുകയും ചെയ്തു. എന്നാല്‍ പൈലറ്റിന്റെ എമര്‍ജന്‍സി ലാന്‍ഡിങ്ങിലൂടെ വന്‍ ദുരന്തം ഒഴിവായി. 

വലിയ വിമാനത്തില്‍നിന്ന് ആയിരം അടി താഴെയാണ് പ്രൈവറ്റ് ജെറ്റ് പറന്നിരുന്നതെങ്കിലും ആകാശപാതയിലുണ്ടായ ഉലച്ചില്‍ വിമാനത്തെ വട്ടംകറക്കുകയായിരുന്നു. വായുവിലുണ്ടായ ശക്തമായ ചലനത്തെ അതിജീവിക്കാനാകാതെ മലക്കംമറിഞ്ഞ പ്രൈവറ്റ് ജെറ്റ് തകരുമെന്നുതന്നെയാണ് ഏവരും പ്രതീക്ഷിച്ചത്. 34,000 അടി മുകളിലൂടെ പറക്കുകയായിരുന്ന വിമാനം ഒറ്റയടിക്ക് പതിനായിരം അടി താഴ്ചയിലേക്ക് വന്നു.

ഒമ്പത് യാത്രക്കാരും വിമാനജോലിക്കാരുമായി പറന്ന പ്രൈവറ്റ് ജെറ്റ് അറബിക്കടലിന് മുകളില്‍വച്ചാണ് സൂപ്പര്‍ജംബോയുടെ ശക്തിയില്‍പ്പെട്ടുലഞ്ഞത്. ജനുവരി ഏഴിനാണ് സംഭവം. മസ്‌കറ്റില്‍ നിന്ന് 630 നോട്ടിക്കല്‍ മൈല്‍ അകലെക്കൂടി പറക്കുകയായിരുന്നു ബൊംബാര്‍ഡിയര്‍ ചാലഞ്ചര്‍ ജെറ്റ്. ദുബായില്‍ നിന്ന് സിഡ്‌നിയേലേക്കുള്ള എമിറേറ്റ്‌സ് എയര്‍ബസ് ഇതേസമയം എതിര്‍ദിശയില്‍ പറക്കുന്നുണ്ടായിരുന്നു. 

ലോകത്തേറ്റവും വലിയ യാത്രാവിമാനമാണ് എയര്‍ബസ് 380. അത് വായുവിലുണ്ടാക്കുന്ന ഓളമാണ് ചെറുവിമാനത്തെ കുടുക്കിയത്. എയര്‍ബസിന്റെ ചിറകുകള്‍ വായുവിനെ കീറിമുറിച്ച് പറക്കുമ്പോഴുണ്ടാകുന്ന മര്‍ദം താഴെപ്പറന്ന ചെറുവിമാനത്തെ എടുത്തെറിയുകയായിരുന്നു. 73 മീറ്റര്‍ നീളവും 386 മുതല്‍ 560 ടണ്‍വരെ ഭാരവുമുള്ളതാണ് എയര്‍ബസ്. ചാലഞ്ചറാകട്ടെ, 21 മീറ്റര്‍ നീളവും 21 ടണ്ണോളം ഭാരവുമുള്ള കുഞ്ഞന്‍ വിമാനവും.

വിമാനത്തിന്റെ നിയന്ത്രണം ഏറ്റെടുത്ത പൈലറ്റുമാര്‍, വിമാനം നേരെ മസ്‌കറ്റ് എയര്‍പോര്‍ട്ടിലേക്ക് തിരിച്ചുവിട്ടു. വിമാനത്തിലുണ്ടായിരുന്ന യാത്രക്കാര്‍ക്കും ജീവനക്കാര്‍ക്കും സാരമായ പരിക്കുകളേറ്റു. വിമാനം ലാന്‍ഡ് ചെയ്തയുടന്‍ ഇവരെ ആശുപത്രിയിലേക്ക് മാറ്റി. പരിക്കേറ്റവരില്‍ ഒരാളുടെ നില ഇപ്പോഴും ഗുരുതരമായി തുടരുകയാണെന്ന് വാര്‍ത്ത പുറത്തുവിട്ട എവിയേഷന്‍ ഹെറാള്‍ഡ് റിപ്പോര്‍ട്ട് ചെയ്യുന്നു.