മുന്‍ അമേരിക്കന്‍ പ്രസിഡന്റ് ബറാക് ഒബാമയുടെ ആരോഗ്യ പരിരക്ഷ പദ്ധതിക്ക് മാറ്റം വരുത്താനുള്ള പ്രസിഡന്റ് ഡോണാള്‍ഡ് ട്രംപിന്റെ നീക്കങ്ങള്‍ക്ക് തിരിച്ചടി. ജനപ്രതിനിധി സഭയില്‍ വെച്ച പുതിയ ബില്‍ വോട്ടടുപ്പിന് മുമ്പ് തന്നെ പിന്‍വലിച്ചു. ട്രംപിന്റെ പാര്‍ട്ടിയായ റിപ്പബ്‌ളിക്കന്‍ പാര്‍ട്ടിയില്‍ നിന്നടക്കം എതിര്‍പ്പുണ്ടാവുമെന്ന് തിരിച്ചറിഞ്ഞാണ് ട്രംപ് ജനപ്രതിനിധി സഭയില്‍ നിന്ന് ആരോഗ്യ പരിരക്ഷ പദ്ധതി സംബന്ധിച്ച പുതിയ ബില്‍ പിന്‍വലിച്ചത്.

റിപ്പബ്‌ളിക്കന്‍ പാര്‍ട്ടിയിലെ തീവ്രവലതുപക്ഷ നിലപാടുള്ള ഫ്രീഡം കോക്കസും മിതവാദികളും ട്രംപിന്റെ നീക്കത്തിന് എതിരാണെന്നാണ് റിപ്പോര്‍ട്ട്. ട്രംപിന്റ പുതിയ ആരോഗ്യനയം ഒബാമ കെയറിലെ പല നിയമങ്ങളും നില നിര്‍ത്തുന്നുവെന്നും ഇത് അംഗീകരിക്കാന്‍ കഴിയില്ലെന്നുമാണ് ഫ്രീഡം കോക്കസിെന്റ നിലപാട്. എന്നാല്‍ പുതിയ നിയമത്തില്‍ 20 ദശലക്ഷം പേര്‍ക്ക് ആരോഗ്യ ഇന്‍ഷുറന്‍സിന്റ ഗുണം ലഭിക്കില്ലെന്ന് ആരോപിച്ചാണ് മിതവാദികള്‍ ബില്ലിനെ എതിര്‍ത്തത്. 20 റിപ്പബ്‌ളിക്കന്‍ പാര്‍ട്ടി അംഗങ്ങള്‍ ബില്ലിനെ പിന്തുണക്കുന്നില്ലെന്നാണ് റിപ്പോര്‍ട്ട്. ഇതിനെ തുടര്‍ന്നാണ് ജനപ്രതിനിധിസഭയില്‍ നിന്ന് ബില്ല് പിന്‍വലിക്കാന്‍ ട്രംപ് ഭരണകൂടം തീരുമാനിച്ചത്.

തെരഞ്ഞെടുപ്പ് പ്രചാരണവേളയില്‍ ഒബാമ കെയറിനെ ദുരന്തം എന്നായിരുന്നു ട്രംപ് വിശേഷിപ്പിച്ചത്. താന്‍ അധികാരത്തിലെത്തിയാല്‍ ഒബാമ കെയര്‍ നിര്‍ത്തലാക്കുമെന്നും ട്രംപ് അറിയിച്ചിരുന്നു. എന്നാല്‍ ജനപ്രതിനിധി സഭയില്‍ ഭൂരിപക്ഷമുണ്ടായിട്ടും പുതിയ ബില്ല് പാസാക്കാന്‍ കഴിയാത്തത് കനത്ത തിരിച്ചടിയാണ് ട്രംപിന് നല്‍കിയിരിക്കുന്നത്.