ബ്രിട്ടനില്‍ മുപ്പതു വര്‍ഷമായി പ്രചാരത്തിലുണ്ടായിരുന്ന ഒരു പൗണ്ട് നാണയത്തിനു പകരമുള്ള പുതിയ നാണയം ഇന്നുമുതല്‍ വിനിമയത്തിന്. നിലവിലുള്ള സ്വര്‍ണക്കളര്‍ റൗണ്ട് നാണയത്തിനു പകരമിറക്കുന്നത് കൂടുതല്‍ തിളക്കമേറിയ 12 വശങ്ങളുള്ള നാണയമാണ്.

വ്യാജനിര്‍മാണം സാധ്യമല്ലാത്ത രീതിയിലുള്ള സുരക്ഷാ മുദ്രകളോടെയാണ് ഈ നാണയം തയാറാക്കിയിരിക്കുന്നത്. പുതിയ നാണയങ്ങള്‍ വിപണിയില്‍ എത്തിയാലും പഴയ നാണയത്തിന്റെ മൂല്യം ഒക്ടോബര്‍ 15 വരെ നിലനില്‍ക്കും. അതുവരെ രണ്ട് നാണങ്ങളും ക്രയവിക്രയത്തിനായി ഉപയോഗിക്കാം.

ഒക്ടോബര്‍ 15 കഴിഞ്ഞാല്‍ പഴയ നാണയത്തിനു വിപണിമൂല്യം ഉണ്ടാകില്ല. കുട്ടികളുടെയും മറ്റും നാണയകുടുക്കകളിലായി (പിഗി ബാങ്ക്) ഏകദേശം 1.3 ബില്യണ്‍ പഴയ നാണയങ്ങളുടെ ശേഖരമുണ്ടാകുമെന്നാണ് സര്‍ക്കാര്‍ കണക്ക്. ഇവയെല്ലാം ഇക്കാലയളവില്‍ ചെലവാക്കി തീര്‍ക്കുകയോ മാറ്റിയെടുക്കുകയോ ചെയ്യണം.

വ്യാപകമായ തോതില്‍ കള്ളനാണയങ്ങള്‍ പ്രചരിക്കുന്നതായി കണ്ടെത്തിയതോടെയാണ് പുതിയ ഡിസൈനില്‍ നാണയമിറക്കാന്‍ അച്ചടിയുടെ ചുമതലക്കാരായ റോയല്‍ മിന്റ് തീരുമാനിച്ചത്. നിലവില്‍ ബ്രിട്ടനില്‍ പ്രചാരത്തിലുള്ള ഒരു പൗണ്ട് നാണയത്തില്‍ മുപ്പതില്‍ ഒരെണ്ണം വീതം കള്ളനാണയമാണെന്നാണ് സര്‍ക്കാര്‍ കണ്ടെത്തിയത്. ഈ അവസ്ഥ പരിഹരിക്കാനാണ് പുതിയ നീക്കം.

വെള്ളിനിറത്തിലുള്ള റൗണ്ടിനു പുറത്ത് പന്ത്രണ്ട് വശങ്ങളുള്ള സ്വര്‍ണനിറത്തിലുള്ള ചുറ്റോടുകൂടിയ നാണയമാണ് പുതുതായി പുറത്തിറക്കുന്നത്. ഒറ്റനോട്ടത്തില്‍ രണ്ടുപൗണ്ട് നാണയത്തിന്റെ ചെറിയ പതിപ്പായി തോന്നും. എന്നാല്‍ ഇതില്‍ സുരക്ഷാ ലിഖിതങ്ങള്‍ ഏറെയാണ്. പൗണ്ട് സ്‌റ്റെര്‍ലിങ്ങിനെ സൂചിപ്പിക്കുന്ന അടയാളം (ക്ഷ) വിവിധ കോണുകളില്‍ തിരിച്ചും മറിച്ചും നോക്കുമ്പോള്‍ ഒന്ന് എന്ന നമ്പരായി കാണിക്കുന്നതാണ് ഇതില്‍ ഏറ്റവും വലിയ പ്രത്യേകത.

കൂടാതെ മൈക്രോ ലെറ്ററിംങ്ങും നഗ്‌നനേത്രങ്ങള്‍കൊണ്ട് കാണാന്‍ കഴിയാത്ത നേര്‍ത്ത തടിപ്പുകളുമെല്ലാം ഉള്‍ക്കൊള്ളിച്ചിട്ടുണ്ട്. ഒരു വശത്ത് രാജ്ഞിയുടെ പുതിയ മുഖചിത്രവും മറുവശത്ത് ഇംഗ്ലണ്ട്, വെയില്‍സ്, സ്‌കോട്ട്‌ലന്‍ഡ്, നോര്‍ത്തേണ്‍ അയര്‍ലന്‍ഡ് എന്നീ ഫെഡറല്‍ സ്‌റ്റേറ്റുകളെ സൂചിപ്പിക്കുന്ന റോസ്, തിസില്‍, ലീക്ക്, ഷാംറോക്ക് എന്നീ പുഷ്പങ്ങളടങ്ങിയ മുദ്രയുമാണ്. നിലവിലുള്ള നാണയത്തേക്കാള്‍ അല്‍പം കനംകുറഞ്ഞ പുതിയ നാണയത്തിന് വ്യാസം അല്‍പം കൂടുതലുണ്ട്.

പുതിയ നാണയം ഇറക്കുന്നകാര്യം സര്‍ക്കാര്‍ നേരത്തെ പ്രഖ്യാപിച്ചതാണെങ്കിലും രാജ്യത്ത് പലയിടത്തും പാര്‍ക്കിങ്, വെന്‍ഡിങ് മെഷീനുകളില്‍ ഇതുപയോഗിക്കാന്‍ വേണ്ട മാറ്റങ്ങള്‍ ഇനിയും വരുത്തിയിട്ടില്ല. കണ്‍സിലുകള്‍ക്കും സ്ഥാപനങ്ങള്‍ക്കുമെല്ലാം വന്‍തുക ചെലവു വരുന്ന പ്രക്രിയയാണിത്.

പൂര്‍ണമായും ഈ മാറ്റം വരുന്നതുവരെ പലയിടങ്ങളിലും ആളുകള്‍ പുതിയ നാണയങ്ങള്‍കൊണ്ട് ബുദ്ധിമുട്ടും. ആറുമാസത്തിനുള്ളില്‍ ഇവയെല്ലാം പുന:ക്രമീകരിക്കാനുള്ള തിരക്കിലാണ് സ്ഥാപനങ്ങള്‍. സൂപ്പര്‍ മാര്‍ക്കറ്റുകളുടെ ട്രോളികള്‍ പോലും ഇത്തരത്തില്‍ പരിഷ്‌കരിക്കേണ്ടതുണ്ട്.