ആയിരക്കണക്കിന് അമേരിക്കന്‍ പൗരന്മാരെ കബളിപ്പിച്ച് 3000 കോടി ഡോളര്‍ തട്ടിയെടുത്ത കേസില്‍ പ്രതി അറസ്റ്റില്‍. കുപ്രസിദ്ധമായ താനെ കോള്‍ സെന്റര്‍ തട്ടിപ്പ് കേസിലെ പ്രതി സാഗര്‍ താക്കര്‍ (24)എന്ന ഷാഗിയാണ് അറസ്റ്റിലായത്. തട്ടിപ്പ് നടന്ന ഇന്റേണല്‍ റവന്യൂ സര്‍വീസ് കോള്‍ സെന്ററിനു പിന്നിലെ ബുദ്ധികേന്ദ്രം ഷാഗിയായിരുന്നു. താനെ പോലീസാണ് ഷാഗിയെ ഇന്നലെ രാത്രി അറസ്റ്റു ചെയ്തത്.

തട്ടിയെടുത്ത പണം ആഡംബര ജീവിതത്തിനാണ് സാഗര്‍ എന്ന ഷാഗി ഉപയോഗിച്ചിരുന്നത്. ഒരു സംഘം ബൗണ്‍സര്‍മാരുടെ സംരക്ഷണത്തിലായിരുന്നു ഷാഗിയുടെ സഞ്ചാരം. മുംബൈയിലെ ആഡംബര നൈറ്റ് പാര്‍ട്ടികളില്‍ സജീവമായിരുന്ന സാഗറിന് മുന്തിയ ഇനം കാറുകളുടെ ശേഖരം തന്നെയുണ്ടായിരുന്നു. കാമുകിക്ക് പിറന്നാള്‍ സമ്മാനമായി 2.5 കോടി രൂപ വിലമതിക്കുന്ന ഓഡി കാറാണ് നല്‍കിയത്. ഒരു ക്രിക്കറ്റ് താരത്തില്‍ നിന്ന് 70 ലക്ഷത്തിനാണ് ഈ കാര്‍ സ്വന്തമാക്കിയത്. ഇത് ഇപ്പോള്‍ പോലീസിന്റെ കസ്റ്റഡിയിലാണ്.

ദുബായില്‍ നിന്നും നാടുകടത്തിയതിനെ തുടര്‍ന്ന് മുംബൈയില്‍ വിമാനമിറങ്ങൂന്‌പോഴാണ് ഷാഗിയുടെ കൈയ്യില്‍ വിലങ്ങൂവീണത്. 2013 മുതല്‍ വിവിധ കോള്‍ സെന്ററുകള്‍ കേന്ദ്രീകരിച്ചാണ് തട്ടിപ്പ് നടന്നത്. അമേരിക്കകാരായ 15,000 നികുതി ദായകരെയാണ് ഷാഗി ലക്ഷ്യമിട്ടിരുന്നത്. കേസില്‍ 61 പേര്‍ക്കെതിരെയാണ് യു.എസ് കോടതി കുറ്റം ചുമത്തിയിരുന്നത്. ഐആര്‍എസ്, ഇമിഗ്രേഷന്‍, ഫെഡറല്‍ ഉദ്യോഗസ്ഥര്‍ ചമഞ്ഞാണ് ഇയാള്‍ കോള്‍ സെന്റര്‍ ഇടപാടുകാരില്‍ നിന്ന് പണം തട്ടിയെടുത്തത്.

കഴിഞ്ഞ വര്‍ഷം ഒക്ടോബറിലാണ് തട്ടിപ്പ് പുറത്തുവന്നത്. കോള്‍സെന്റര്‍ നടത്തിപ്പുകാരായ 70 പേരെയും 700 ഓളം ജീവനക്കാരെയും പോലീസ് പിടികൂടിയിരുന്നു. ഇവരെ ചോദ്യം ചെയ്തതില്‍ നിന്നാണ് ഷാഗിയുടെ പേര് പോലീസിന് ലഭിച്ചത്. ഇതിനകം തന്നെ ഷാഗി രാജ്യം വിട്ടിരുന്നു. ദുബായിലേക്ക് കടന്ന ഇയാള്‍ക്കെതിരെ പോലീസ് ലുക്കൗട്ട് നോട്ടീസും നല്‍കിയിരുന്നു.

വിദേശത്തെ കോള്‍ സെന്ററില്‍ ജോലിക്കാരനായ ജഗദീഷ് കനാനിയുടെ ഉപദേശം സ്വീകരിച്ച് 16ാം വയസ്സിലാണ് സാഗര്‍ ഈ രംഗത്തെത്തിയത്. സാഗറുമായുള്ള ബന്ധത്തില്‍ ഇയാളും അറസ്റ്റിലായിരുന്നു.