സിറിയയിലെ ചാവേര്‍ ആക്രമണം: 68 കുട്ടികളടക്കം 112 മരണം
ആഭ്യന്തരയുദ്ധം രൂക്ഷമായ സിറിയയില്‍ കഴിഞ്ഞദിവസമുണ്ടായ ചാവേര്‍ ആക്രമണത്തില്‍ മരിച്ചവരുടെ എണ്ണം 112 ആയി ഉയര്‍ന്നു. മരിച്ചതില്‍ 68 പേര്‍ കുട്ടികളാണ്.
സര്‍ക്കാര്‍ സേനയും വിമതരും തമ്മില്‍ രൂക്ഷമായ ഏറ്റുമുട്ടല്‍ നടക്കുന്ന ഫുയാ, കഫ്രയ എന്നീ പട്ടണങ്ങളില്‍നിന്ന് ആളുകളെ ഒഴിപ്പിക്കുന്ന ബസുകള്‍ക്കുനേര്‍ക്കാണ് ആക്രമണമുണ്ടായത്. സ്‌ഫോടകവസ്തുക്കള്‍നിറച്ച കാറുമായി ബസിനു സമീപമെത്തിയ ചാവേര്‍ സ്വയംപൊട്ടിത്തെറിക്കുകയായിരുന്നു. ആക്രമണത്തില്‍ മരിച്ചവരുടെ എണ്ണം 112 ആയി ഉയര്‍ന്നെന്ന് മനുഷ്യാവകാശ സംഘടനയായ സിറിയന്‍ ഒബ്‌സര്‍വേറ്ററി ഫോര്‍ ഹ്യൂമന്‍ റൈറ്റ്‌സ് ആണ് അറിയിച്ചത്.
വിമതകേന്ദ്രങ്ങളായ ഫുയാ, കഫ്രയ പട്ടണങ്ങള്‍ സൈന്യം വളഞ്ഞതോടെയാണു അവിടെനിന്നുള്ള സാധാരണക്കാരെ ഒഴിപ്പിക്കാന്‍ ധാരണയായത്. ഈ പട്ടണങ്ങളില്‍ ആകെയുണ്ടായിരുന്ന അയ്യായിരംപേരില്‍ 2200 ആളുകളെ അലപ്പോയിലേക്കും ദമാസ്‌കസിലേക്കും മാറ്റിയിരുന്നു. ശേഷിക്കുന്നവരെക്കൂടി രക്ഷപ്പെടുത്തുന്നതിനിടെയാണ് ചാവേര്‍ ആക്രമണം നടന്നത്. നൂറിലേറെപ്പേര്‍ക്ക് സംഭവത്തില്‍ പരുക്കേറ്റിരുന്നു.
https://www.facebook.com/Malayalivartha
