ഇന്ത്യക്കാര് ഏറ്റവുമധികം ആശ്രയിച്ചിരുന്ന വിസകള് ഓസ്ട്രേലിയ നിര്ത്തലാക്കി
ഓസ്ട്രേലിയയിലേക്ക് കുടയേറാന് ഇന്ത്യക്കാര് ഏറ്റവുമധികം ആശ്രയിച്ചിരുന്ന വിസകള് ഓസ്ട്രേലിയ നിര്ത്തലാക്കി. താല്ക്കാലിക ജോലികള്ക്കായി വിദേശികള്ക്ക് അനുവദിക്കുന്ന 457 വിസയാണ് നിര്ത്തലാക്കിയത്. രാജ്യത്തിന്റെ പൊതു താല്പ്പര്യം പരിഗണിച്ചാണ് തീരുമാനമെന്ന് ഓസ്ട്രേലിയന് പ്രധാനമന്ത്രി മാല്ക്കം ടാണ്ബുള് പറഞ്ഞു.
95,000 വിദേശികളാണ് നിര്ത്തലാക്കിയ വിസകള് ഉപയോഗിച്ച് നിലവില് ഓസ്ട്രേലിയയില് ജോലി ചെയ്യുന്നത്. ഇതില് ഭൂരിഭാഗവും ഇന്ത്യക്കാരാണ്. ഓസ്ട്രേലിയയില് വര്ധിച്ചുവരുന്ന തൊഴിലില്ലായ്മ പരിഹരിക്കുന്നതിന്റെ ഭാഗമായാണ് നടപടി.
ജോലികളില് ആദ്യ പരിഗണന ഓസ്ട്രേലിയക്കാര്ക്കായിരിക്കുമെന്ന് മാല്ക്കം ടാണ്ബുള് പറഞ്ഞു. ഓസ്ട്രേലിയന് ജോലികളും മൂല്യങ്ങളും മുന്നിര്ത്തിയുള്ള മാറ്റമാണിതെന്നാണ് അദ്ദേഹം പറയുന്നത്. വിദഗ്ദരായ തൊഴിലാളികളെ തങ്ങള് സ്വാഗതം ചെയ്യുന്നുവെന്നും എന്നാല് ജോലിക്കുവേണ്ടി പാസ്പോര്ട്ട് എടുത്തുവരുന്നവര്ക്കായി ഇനി 457 വിസ അനുവദിക്കില്ലെന്നും അവ ഓസ്ട്രേലിയക്കാര്ക്കായിരിക്കുമെന്നും അദ്ദേഹം പറഞ്ഞു.
രാജ്യത്തെ തൊഴിലിടങ്ങളില് ആവശ്യത്തിന് തൊഴിലാളികളെ ലഭ്യമാകാത്തതുകൊണ്ടാണ് വിസ അനുവദിച്ചിരുന്നതെന്നും എന്നാല് ഇതിന്റെ മറവില് പരിശീലനവും വൈദഗ്ദ്യവുമില്ലാത്ത തൊഴിലാളികളെ കൊണ്ടുവരുന്നതായും മാല്ക്കം ടാണ്ബുള് പറഞ്ഞു. പകരമായി പുതിയ വിസകളായിരിക്കും കൊണ്ടുവരികയെന്നും അദ്ദേഹം കൂട്ടിച്ചേര്ത്തു. നിര്ത്തലാക്കിയ വിസ പ്രകാരം ഓസ്ട്രേലിയയിലെത്തുന്ന വിദേശിക്ക് സ്വന്തം കുടുംബത്തെ കൂടി കൊണ്ടുവരാന് സാധിക്കുമായിരുന്നു. ഈ സൗകര്യമാണ് ഇന്ത്യക്കാര് കൂടുതലായി ഉപയോഗിച്ചിരുന്നത്.
നിര്ത്തലാക്കിയവയ്ക്ക് പകരമായി കൊണ്ടുവരുന്ന വിസയില് തൊഴില് മേഖലകള് പരിമിതപ്പെടുത്തുമെന്നാണ് സൂചന. കൂടാതെ ഇത് അനുവദിക്കുന്നതിന് കൂടുതല് മാനദണ്ഡങ്ങള് ഏര്പ്പെടുത്തും. ആത്യാവശ്യമായ സാഹചര്യങ്ങളില് മാത്രം ആവശ്യത്തിന് സ്വദേശികളെ ലഭിക്കാതെ വരുമ്പോള് വിദേശ തൊഴിലാളികളെ അനുവദിക്കുക എന്നതാണ് പുതിയ സര്ക്കാര് നയം.
https://www.facebook.com/Malayalivartha
