സിറിയയിലെ ബോംബാക്രമണങ്ങളുടെ ചിത്രമെടുക്കാനെത്തിയ ഫോട്ടോഗ്രഫറും സാമൂഹിക പ്രവര്‍ത്തകനുമായ അബ്ദ് അല്‍കാദര്‍ ഹാബാബ് കണ്ട കാഴ്ച കരളലിയിക്കുന്നതായിരുന്നു. കുട്ടികള്‍ കളിക്കാന്‍ പുറത്തിറങ്ങിയ സമയത്ത് അതുവഴിയെത്തിയ കാറിലുണ്ടായിരുന്നയാള്‍ സ്വയം പൊട്ടിത്തെറിക്കുകയായിരുന്നു. അഭയാര്‍ഥികള്‍ സഞ്ചരിച്ചിരുന്ന ബസുകള്‍ നിര്‍ത്തിയിട്ടിരുന്നപ്പോഴാണ് ആക്രമണമുണ്ടായത്. ഷിയ ഗ്രാമങ്ങളില്‍നിന്ന് സര്‍ക്കാര്‍ അധീനതയിലായ ആലപ്പോയിലേക്കു പലായനം ചെയ്തവര്‍ക്കു മേലെയാണു വിമതര്‍ ആക്രമണം നടത്തിയത്. 80 കുട്ടികള്‍ തത്ക്ഷണം കൊല്ലപ്പെട്ടു.

അതിനിടയില്‍ അബ്ദ് അല്‍കാദര്‍ ഹാബാ അബ്ദ് കുട്ടിയുടെ ജീവന്‍ രക്ഷിച്ചാണു ശ്രദ്ധ നേടിയത്. ഷിയ ഗ്രാമങ്ങളില്‍നിന്ന്ചിത്രങ്ങളെടുത്തു നടക്കുന്നതിനിടെയാണ് അബ്ദ് ഗുരുതരമായി പരുക്കേറ്റ ആണ്‍കുട്ടിയെ കണ്ടെത്തിയത. കുട്ടി കൈയില്‍ കടന്നു പിടിച്ചതോടെ ജീവന്‍ രക്ഷിക്കുന്നതിനെ കുറിച്ചു മാത്രമായിരുന്നു ചിന്തയെന്ന് സി.എന്‍.എന്നിനു നല്‍കിയ അഭിമുഖത്തില്‍ അബ്ദ് പറഞ്ഞു. കുട്ടിയുമായി രക്ഷാപ്രവര്‍ത്തകരുടെ അടുത്തേക്കോടുന്ന അബ്ദിന്റെ ചിത്രം സഹപ്രവര്‍ത്തകന്‍ പകര്‍ത്തിയിരുന്നു. ഈ ചിത്രം സാമൂഹിക മാധ്യമങ്ങളില്‍ വൈറലായി. കുട്ടിയെ ആംബുലന്‍സിലെത്തിച്ച ശേഷമാണ് അബ്ദിനു ശ്വാസം നേരെ വീണത്. സംഭവം അബ്ദിനെ താരമാക്കി മാറ്റിയിരിക്കുകയാണ്.