കൊലപാതകങ്ങള്‍ ഫേസ്ബുക്കില്‍ പോസ്റ്റ് ചെയ്യുന്നത് തടയും!
കൊലപാതകം അടക്കമുള്ള ഭീതിജനക രംഗങ്ങള്‍ ഫേസ്ബുക്കില്‍ പോസ്റ്റ് ചെയ്യുന്നതു തടയുമെന്നു ഫേസ്ബുക്ക് സി.ഇ.ഒ മാര്‍ക്ക് സുക്കര്‍ ബര്‍ഗ്. ക്ലീവ്‌ലാന്‍ഡ് കൊലപാതകരംഗം ഫേസ്ബുക്കില്‍ പോസ്റ്റ് ചെയ്യപ്പെട്ടതും വ്യാപകമായി ഷെയര്‍ ചെയ്യപ്പെട്ടതും കടുത്ത പ്രതിഷേധം ഉയര്‍ത്തിയ സാഹചര്യത്തിലാണ് സുക്കര്‍ ബര്‍ഗിന്റെ പ്രഖ്യാപനം.
ക്ലീവ്‌ലാന്‍ഡില്‍ 74-കാരനായ റോബര്‍ട്ട് ഗോഡ്വിന്‍ സീനിയറിനെ അക്രമി വെടിവച്ചുകൊല്ലുന്ന രംഗമാണ് ഫേസ്ബുക്കില്‍ പോസ്റ്റ് ചെയ്യപ്പെട്ടത്. ഇതു വ്യാപകമായി ഷെയര്‍ ചെയ്യപ്പെട്ടു. രണ്ടു മണിക്കൂറോളം ഇതു ഫേസ്ബുക്കില്‍ ലഭ്യമായിരുന്നു. കമ്പനിയിലെ സോഫ്റ്റ് വെയര്‍ വിദഗ്ധരുടെ വാര്‍ഷിക സമ്മേളനത്തില്‍ സംസാരിക്കവേയാണ് ഇത്തരം ഭീതിജനകമായ വീഡിയോകള്‍ ഫേസ്ബുക്കില്‍ അപ്‌ലോഡ് ചെയ്യുന്നതു തടയുമെന്നു സുക്കര്‍ബര്‍ഗ് പറഞ്ഞത്. റോബര്‍ട്ട് ഗോഡ്വിനിന്റെ വീഡിയോ ക്ലിപ് ഫേസ്ബുക്കില്‍ പ്രചരിക്കാന്‍ ഇടയായതില്‍ അദ്ദേഹത്തിന്റെ കുടുംബത്തോടു സുക്കര്‍ബര്‍ഗ് ഖേദം അറിയിച്ചു.
കൊലപാതകം അടക്കമുള്ള ഭീതിജനകമായ രംഗങ്ങള്‍ ഫേസ്ബുക്കില്‍ പോസ്റ്റ് ചെയ്യുന്നുണ്ടോയെന്നു കര്‍ശനമായി നിരീക്ഷിക്കുമെന്നു അദ്ദേഹം പറഞ്ഞു. ഈ നിരീക്ഷണ സംവിധാനം മെച്ചപ്പെടുത്തുന്നതിനെക്കുറിച്ചും കമ്പനി ആലോചിക്കും. നൂറു കോടിയിലേറെ വരുന്ന ഫേസ്ബുക്ക് ഉപയോക്താക്കള്‍ ഇടുന്ന പോസ്റ്റുകള്‍ പരിശോധിക്കാനും മറ്റും ഏതാനും ആയിരങ്ങളിലൊതുങ്ങുന്ന ജീവനക്കാരെയാണ് നിയോഗിച്ചിരിക്കുന്നത്. ഇതു ഫലപ്രദമല്ല എന്നാണ് ക്ലീവ്‌ലാന്‍ഡ് സംഭവം തെളിയിക്കുന്നത്.
https://www.facebook.com/Malayalivartha
