കുത്തിയിറങ്ങുന്ന വേദനയിലും ഒരാള്‍ക്ക് എങ്ങനെയാണ് മനസു നിറഞ്ഞ് ചിരിക്കാനാകുക?. പ്രത്യേകിച്ച് ബോംബുകളുടെ ഭീകര ശബ്ദങ്ങള്‍ക്കിടയില്‍ ജനിച്ചു വളര്‍ന്നവര്‍ക്ക്. സിറിയയില്‍ നിന്നുമാണ് ഹൃദയ സ്പര്‍ശിയായ ഈ കാഴ്ച.
കഴിഞ്ഞ ദിവസം സിറിയയിലെ ആലപ്പോയില്‍ അഭയാര്‍ത്ഥി ബസിനു നേരെ നടന്ന ചാവേര്‍ ആക്രമണത്തില്‍ ഗുരുതര പരുക്കേറ്റ പെണ്‍കുട്ടി ക്യാമറയ്ക്കു നേരെ നോക്കി ചിരിക്കുന്ന ഒരു വീഡിയോയാണ് ഇപ്പോള്‍ പുറത്തു വന്നിരിക്കുന്നത്. തലയില്‍ സാരമായുള്ള മുറിവ് കെട്ടിവെച്ചിരിക്കുകയാണ്. മുഖത്തേറ്റ മുറിവ് ബാന്‍ഡേജുകൊണ്ട് മറച്ചിരിക്കുന്നു. മനസും ശരീരവും ഒരു പോലെ വേദനിക്കുമ്പോള്‍ അവര്‍ തനിക്ക് നേരെ നീണ്ട ക്യാമറയെ നോക്കി ചിരിക്കുന്നു. സിറിയന്‍ അറബ് ന്യൂസ് ഏജന്‍സിയാണ് പെണ്‍കുട്ടിയുടെ വീഡിയോ പുറത്തുവിട്ടിരിക്കുന്നത്.
ഇക്കഴിഞ്ഞ ശനിയാഴ്ച നടന്ന ആക്രമണത്തില്‍ 120 ലധികം പേരാണ് കൊല്ലപ്പെട്ടത്. ഇതില്‍ അധികവും കുട്ടികളായിരുന്നു. 68 ഓളം കുട്ടികള്‍ മരിച്ചതായാണ് സന്നദ്ധ പ്രവര്‍ത്തകര്‍ പറയുന്നത്. സര്‍ക്കാര്‍ നിയന്ത്രിത മേഖലയില്‍ നിന്ന് ജനങ്ങളെ ഒഴിപ്പിച്ചുകൊണ്ടുപോകുകയായിരുന്ന വാഹനവ്യൂഹത്തിന് നേരെയായിരുന്നു ആക്രമണം നടന്നത്. മരിച്ചവരുടെ ശരീരങ്ങള്‍ പ്രദേശത്ത് ചിതറിക്കിടന്നത് വേദനിപ്പിക്കുന്ന കാഴ്ചയായിരുന്നു.