അഫ്ഗാനിസ്ഥാനിലെ മസാര്‍ ഇ-ഷരീഫ് സൈനിക താവളത്തിനുനേരെ താലിബാന്‍ നടത്തിയ ആക്രമണത്തില്‍ 140 അഫ്ഗാന്‍ സൈനികര്‍ കൊല്ലപ്പെട്ടു. വെള്ളിയാഴ്ചയാണ് സൈനിക വേഷത്തിലെത്തിയ ഭീകരര്‍ ആക്രമണം നടത്തിയത്. ഒട്ടേറെപ്പേര്‍ക്കു പരുക്കേറ്റു. മരണസംഖ്യ ഇനിയും ഉയരുന്നതിനുള്ള സാധ്യതയുണ്ടെന്ന് അധികൃതര്‍ വ്യക്തമാക്കി. എന്നാല്‍ മരണസംഖ്യ സംബന്ധിച്ച ഔദ്യോഗിക സ്ഥിരീകരണം ഇതുവരെ ഉണ്ടായിട്ടില്ല. അഫ്ഗാനിലെ ബാള്‍ക്ക് പ്രവിശ്യയിലാണ് മസാര്‍ ഇ-ഷരീഫ് സൈനിക താവളം സ്ഥിതിചെയ്യുന്നത്.

അഫ്ഗാന്‍ സൈനികരുടെ വേഷത്തിലെത്തിയ പത്തോളം താലിബാന്‍ ഭീകരരാണ് ആക്രമണം അഴിച്ചുവിട്ടത്. സൈനിക വാഹനത്തിലെത്തിയ ഇവര്‍ സൈനികര്‍ ഭക്ഷണം കഴിക്കുന്നതിനിടെ വെടിവയ്പ്പു നടത്തുകയായിരുന്നു. വെള്ളിയാഴ്ച നമസ്‌കാരത്തിനുശേഷം പുറത്തിറങ്ങിയവര്‍ക്കെതിരെയും വെടിവയ്പ്പുണ്ടായി. ഗ്രനേഡുകളും റോക്കറ്റ് ലോഞ്ചറുകളും തോക്കുകളും ഉപയോഗിച്ചായിരുന്നു ആക്രമണം.

താലിബാന്റെ ഒട്ടേറെ മുതിര്‍ന്ന നേതാക്കളെ സൈന്യം കൊലപ്പെടുത്തിയെന്നും ഇതിനുള്ള പകരംവീട്ടലാണ് ആക്രമണമെന്നും താലിബാന്‍ വക്താവ് സൈബുല്ല മുജാഹിദ് വാര്‍ത്താക്കുറിപ്പില്‍ അറിയിച്ചു. സംഭവത്തില്‍ അഫ്ഗാന്‍ സര്‍ക്കാര്‍ അന്വേഷണം പ്രഖ്യാപിച്ചു.