ലോകത്തിനു മുന്നില്‍ സദ്ദാം ഹുസൈന്‍ ഏകാധിപതിയാകാം, അനേകരെ കൊലപ്പെടുത്തിയ ക്രൂരനാകാം... പക്ഷേ, ഞങ്ങള്‍ പരിചയപ്പെട്ടത് മാന്യനായ വ്യക്തിയെയാണ്. അമേരിക്കന്‍ സൈന്യത്തിന്റെ കസ്റ്റഡിയില്‍ കഴിഞ്ഞ സദ്ദാം ഹുസൈനെക്കുറിച്ചുള്ള ഓര്‍മകള്‍ 'ദ് പ്രിസണര്‍ ഇന്‍ ഹിസ് പാലസ്' എന്ന പുസ്തകത്തില്‍ ഓര്‍മിക്കുന്നത് സുരക്ഷാ ഭടന്മാരിലൊരാളായ ബില്‍ ബാര്‍ഡന്‍വെപര്‍ ആണ്. 'സൂപ്പര്‍ 12' എന്നറിയപ്പെടുന്ന സുരക്ഷാ ഭടന്മാരിലൊരാളായിരുന്നു ബാര്‍ഡന്‍വെപര്‍. 
ജയിലിലെത്തി ദിവസങ്ങള്‍ക്കുള്ളില്‍ സദ്ദാം സുരക്ഷാ ഭടന്മാരുമായി സൗഹൃദത്തിലായി. 'ഒരു പക്ഷേ, അദ്ദേഹം അമേരിക്കയുടെ ശത്രുവാകാം. ഞങ്ങള്‍ പോലും അതു മറന്നു' ബാര്‍ഡന്‍വെപര്‍ എഴുതി. 
ജയില്‍ ജീവിതത്തിനിടെ ചെറിയ ചെറിയ കാര്യങ്ങള്‍ സദ്ദാമിനു സന്തോഷം പകര്‍ന്നു. റേഡിയോ പരിപാടികളായിരുന്നു പ്രധാന വിനോദം. മേരി ജെ. ബ്ലൈഷിന്റെ ഗാനങ്ങളായിരുന്നു ഏറെ പ്രിയം. ഇടയ്ക്കു ജയിലിലെ പൂന്തോട്ടത്തിലേക്കിറങ്ങും. പൂക്കളെ അദ്ദേഹത്തിന് ഏറെ ഇഷ്ടമായിരുന്നു. വ്യായാമത്തിനു പ്രത്യേക ഉപകരണവും ഉണ്ടായിരുന്നു. 
കൊഹിബ സിഗരറ്റുകളായിരുന്നു അദ്ദേഹത്തിന്റെ ദൗര്‍ബല്യം. ഫിഡല്‍ കാസ്‌ട്രോയില്‍നിന്നാണ് ആ ശീലം കിട്ടിയതെന്നു സദ്ദാം പറയുമായിരുന്നു. മധുരം അദ്ദേഹത്തിന് ഏറെ പ്രിയമായിരുന്നു. ആരോഗ്യത്തിനു ഹാനികരമെന്ന് അദ്ദേഹം വിശ്വസിക്കുന്ന വിഭവങ്ങള്‍ നിരസിക്കുകയും ചെയ്യും.
ദിവസങ്ങള്‍ കഴിഞ്ഞപ്പോള്‍ അദ്ദേഹം അടുത്ത സുഹൃത്തായി മാറി. കുടുംബകാര്യങ്ങള്‍പോലും അന്വേഷിക്കുമായിരുന്നു. ഒപ്പം മകന്‍ ഉദയ് ഹുസൈന്റെ ചെറുപ്പത്തിലെ കുസൃതികളും അദ്ദേഹം ഓര്‍ത്തെടുത്തു. മുതിര്‍ന്നപ്പോള്‍ ഇതു തലവേദനയായിമാറി. ഒരിക്കല്‍ ആഡംബരക്കാറിനെച്ചൊല്ലിയുണ്ടായ തര്‍ക്കം വെടിവയ്പിലാണു കലാശിച്ചത്. അന്ന് ഉദയ് നടത്തിയ വെടിവയ്പില്‍ നിരവധിപ്പേര്‍ കൊല്ലപ്പെട്ടു. ഉടന്‍ തന്നെ ഉദയിന്റെ കാറുകള്‍ കത്തിക്കാന്‍ സദ്ദാം ഉത്തരവിട്ടു. 
ശാന്തമായാണു തടവിലെ പരിമതികളെ അദ്ദേഹം മറികടന്നത്. 2006 ഡിസംബറിലാണ് അദ്ദേഹെത്ത തൂക്കിലേറ്റിയത്. 'ഒരു കുടുംബാംഗം നഷ്ടപ്പെട്ടതിന്റെ വേദനയാണ് എന്നില്‍ നിറഞ്ഞത്. 
അതൊരു കൊലപാതകമാണെന്നു മനസുപറഞ്ഞു. അദ്ദേഹത്തിന്റെ മൃതദേഹത്തോട് ചിലര്‍ കാട്ടിയ അനാദരവും വേദനിപ്പിച്ചു.' ബാര്‍ഡന്‍വെപര്‍ പറയുന്നു. ഇത് അദ്ദേഹത്തിന്റെ മാത്രം വികാരമായിരുന്നില്ല. മാസങ്ങളോളം സദ്ദാമിനൊപ്പമുണ്ടായിരുന്ന 12 അമേരി ക്കന്‍ സുരക്ഷാ ഭടന്മാരുടെ മനസിലും സദ്ദാം ഒരു വേദനയായി നിറഞ്ഞു.