ലണ്ടനില്‍ പുലര്‍ച്ചെ മോസ്‌ക്കിന് നേരെ നടന്ന തീവ്രവാദി ആക്രമണത്തില്‍ ഒരാളുടെ മരണവും 8 പേരുടെ പരിക്കുകളും സ്ഥിരീകരിച്ചു. സംഭവ സ്ഥലത്തുണ്ടായിരുന്ന സാക്ഷികളിലൊരാളുടെ മൊഴിയനുസരിച്ച് അക്രമികളിലൊരാള്‍ ''ഞാന്‍ എല്ലാ മുസ്ലീമുകളെയും കൊന്നൊടുക്കു''മെന്ന് അലറിവിളിച്ച് പറഞ്ഞതായി അന്വേഷണ ഉദ്യോഗസ്ഥര്‍ പറയുന്നു. ഇയാളെ തത്സമയം തന്നെ പിടികൂടിയിരുന്നു. 48 വയസ്സ് പ്രായം വരുന്ന അക്രമിയെയാണ് പോലീസ് പിടികൂടിയത്.

വെസ്റ്റ് മിനിസ്റ്റര്‍,മാഞ്ചസ്റ്റര്‍,ലണ്ടന്‍ ബ്രിഡ്ജ് എന്നീ സ്ഥലങ്ങളില്‍ ആഴ്ചകള്‍ക്കപ്പുറം നടന്ന തീവ്രവാദി ആക്രമണങ്ങളുടെ ദുരന്ത വേദനകളില്‍ നിന്നും മുറിവുണങ്ങും മുന്‍പാണ് ഇന്ന് ഫിന്‍സ്ബറി പാര്‍ക്കിലെ മുസ്‌ലീം പള്ളിയ്ക്ക് നേരെയുണ്ടായ ആക്രമണം. മോസ്‌ക്കിലെ പ്രാര്‍ത്ഥന കഴിഞ്ഞ് നോമ്പ് മുറിക്കലിന് ശേഷം പുറത്തേക്കിറങ്ങിയവര്‍ക്ക് നേരെയാണ് വാന്‍ ഓടിച്ച് കയറ്റി ആക്രമണം നടത്തിയത്. ആക്രമണവുമായി ബന്ധപ്പെട്ട് സംഭവ സ്ഥലത്ത് നിന്നും പിടികൂടിയ ഒരാള്‍ മാത്രമാണ് ഇപ്പോള്‍ പോലിസിന്റെ കസ്റ്റഡിയില്‍.ആക്രമണം നടക്കുന്ന സമയത്ത് അവിടെ നിന്നും വാഹനം ഇടിക്കുന്നതില്‍ നിന്നും രക്ഷപ്പെട്ട അബ്ദുല്‍ റഹ്മാന്‍ സലേഹി എന്നയാളാണ് ബി.ബി.സി വാര്‍ത്തയോട് കാര്യങ്ങള്‍ വെളിപ്പെടുത്തിയത്. ''അയാള്‍ ഉറക്കെ വിളിച്ച് പറഞ്ഞു,ഞാന്‍ എല്ലാ മുസ്ലീമുകളെയും കൊല്ലും''...പിന്നീട് ഞാനും കുറച്ചാളുകളും ചേര്‍ന്ന് അയാളെ പിടികൂടി.അപ്പോള്‍ അയാള്‍ പറഞ്ഞു ''എന്നെ കൊല്ലൂ! ഞങ്ങള്‍ നിങ്ങളെ കൊല്ലില്ല,നിങ്ങള്‍ എന്തിനാണ് ഇത് ചെയ്തത് എന്ന് ചോദിച്ചു.അയാള്‍ ഒന്നും പ്രതികരിച്ചില്ല''ദൃക്‌സാക്ഷി വെളിപ്പെടുത്തുന്നു.ആക്രമണത്തിന് ശേഷം ലണ്ടന്‍ നഗരം മൊത്തം പോലീസിന്റെ നിരീക്ഷണത്തിലാണ്. അക്രമിക്കായുള്ള തെരച്ചില്‍ ഊര്‍ജിതമാക്കിയിട്ടുണ്ട്. ഉടന്‍ പിടികൂടും എന്ന പ്രതീക്ഷയിലാണ് പോലീസും ജനങ്ങളും.