ഇന്ത്യയിലെ ബാങ്കുകളില്‍ നിന്ന് 7000 കോടി കടമെടുത്ത ശേഷം തിരിച്ചടയ്ക്കാതെ ബ്രിട്ടനിലേക്ക് മുങ്ങിയ വിവാദ മദ്യ വ്യവസായിയും കിംഗ്ഫിഷര്‍ എയര്‍ലൈന്‍സ് ഉടമയുമായ വിജയ് മല്യയ്ക്ക് മാസം ആഴ്ചയില്‍ 16 ലക്ഷം രൂപ ചെലവിടാന്‍ ലണ്ടനിലെ ഹൈക്കോടതി അനുമതി നല്‍കി. നേരത്തെ ഇത് 4.5 ലക്ഷമായിരുന്നു. വിമാനം പാട്ടത്തിന് നല്‍കുന്ന സിംഗപ്പൂരിലെ കമ്പനിയെ കബളിപ്പിച്ചതുമായി ബന്ധപ്പെട്ട് 577 കോടി രൂപ പിഴ അടയ്ക്കാന്‍ കോടതി ഉത്തരവിട്ടതിന് പിന്നാലെയാണ് ഹൈക്കോടതിയുടെ ഇപ്പോഴത്തെ വിധി.

ബാങ്കുകളില്‍ നിന്നെടുത്ത വായ്പ തിരിച്ചടയ്ക്കാത്ത കേസില്‍ മല്യയെ ലണ്ടനിലെ കോടതി അറസ്റ്റു ചെയ്ത ശേഷം ജാമ്യത്തില്‍ വിട്ടിരുന്നു. ഇന്ത്യയിലെ 17 ബാങ്കുകളില്‍നിന്നുള്ള 7000 കോടി രൂപ വായ്പയും പലിശയുമടക്കം 9000 കോടി രൂപയുടെ കടബാദ്ധ്യതയാണ് മല്യയ്ക്കുള്ളത്. കടം തിരിച്ചടയ്ക്കാതെ 2016 മാര്‍ച്ചില്‍ ലണ്ടനിലേക്കു കടക്കുകയായിരുന്നു മല്യ. 

കുറ്റവാളികളെ കൈമാറുന്നതിനുള്ള കരാര്‍ പ്രകാരം മല്യയെ വിട്ടുതരണമെന്ന് ആവശ്യപ്പെട്ട് ഇന്ത്യ ബ്രിട്ടനെ സമീപിച്ചിട്ടുണ്ട്. ഈ കേസില്‍ ഏപ്രില്‍ 16നും 17നുമായി കോടതി അന്തിമവാദം കേള്‍ക്കും.