ഭൂചലനത്തിനു പിന്നാലെ സുനാമി മുന്നറിയിപ്പും..... വെനസ്വലേ ഭൂചലനത്തിനു പിന്നാലെ മെക്സിക്കോയിലും ഭൂചലനമുണ്ടായി. റിക്ടർ സ്കെയിലിൽ 7.3 തീവ്രതയാണ് രേഖപ്പെടുത്തിയത്. ആളപായമൊന്നും റിപ്പോർട്ട് ചെയ്തിട്ടില്ല. അയല്‍ രാജ്യങ്ങളായ ഗ്വാട്ടിമാലയിലും എൽ സാൽവഡോറിലും ശക്തമായ ഭൂചലനം അനുഭവപ്പെട്ടു.

മെക്സിക്കോയുടെ തെക്കേ അറ്റത്തുള്ള സംസ്ഥാനമായ ചിയാപാസിന്റെ തീരമായിരുന്നു പ്രഭവകേന്ദ്രം. ഗ്വാട്ടിമാലയിലും എൽ സാൽവഡോറിലും സുനാമി മുന്നറിയിപ്പ് നൽകി.

15.2 കിലോമീറ്റർ (9.44 മൈൽ) ആഴത്തിലാണ് ഭൂകമ്പം ഉണ്ടായതെന്ന് യുഎസ് ജിയോളജിക്കൽ സർവേ (യുഎസ്ജിഎസ്) . പ്രഭവകേന്ദ്രത്തിൽ നിന്ന് 300 കിലോമീറ്റർ (186 മൈൽ) ഉള്ളിലുള്ള തീരങ്ങളിൽ അപകടകരമായ സുനാമി തിരമാലകൾക്ക് സാധ്യതയുണ്ടെന്ന് യുഎസ് സുനാമി മുന്നറിയിപ്പ് സംവിധാനം അറിയിക്കുകയും ചെയ്തു.

മെക്സിക്കോയിലെയും ഗ്വാട്ടിമാലയിലെയും ചില തീരങ്ങളിൽ വേലിയേറ്റ നിരപ്പിൽ നിന്ന് 0.3 മീറ്റർ മുതൽ 1 മീറ്റർ വരെ ഉയരത്തിൽ തിരമാലകൾ എത്താൻ സാധ്യതയുണ്ടെന്നും അറിയിപ്പിലുണ്ട്. ബീച്ചുകളിൽ നിന്ന് വിട്ടുനിൽക്കാൻ ആളുകളോട് ആവശ്യപ്പെട്ടു. മെക്സിക്കോ, ഗ്വാട്ടിമാല, എൽ സാൽവഡോർ എന്നിവിടങ്ങളിലും 5 നും 6 നും ഇടയിൽ തീവ്രത രേഖപ്പെടുത്തിയ തുടർചലനങ്ങളുണ്ടായി.